Ti sew Inamreske Yesuske nyoha iry a simake serit a kimaty ne ma sima desike eras
3
Lemade sekwe enai ne kyelak eta bonyo,
Yesuske syukar ei Yahudi-nare sey rasambayan tike.
Ti desike irkye it a sima wanke kmyaty.
Markus 3:1-19
2 Ti desy dakun o iry manosy lui Farisi-nare robak a ksala ma rmanadu Yesuske,
dendye rabalmat ti I o ana ti sew Inamreske ne,
nyoha irire wait a kbainare ma eras sir ta lema.
3 Dendye Yesuske tyanuk ti iry a sim mamaty desy ma byohe,
“Mmwa ma mumdiry ti lulw san.”
Lemade iry desike bya ti imdiry ti lulkwe.
4 Maktei o Yesuske tyanuk ti iry a mamin ti desikre de byohe,
“Kena e ohe,
ktyoha tnyetak ity wait kubkubakke mo,
tala sai ti sew Inamreske de?
Tala eraske ta,
tala atyatke de?
Taorif irire ta,
tamatik irire de?”
Keskyede iry desikre mamwaw a sir bo.
5 Lemade Yesuske kyeyer ti iatos iry desikre mumu ne,
ode ralake kitol ti iry desikre usut a khatu malkyakaw ne.
Dendye tyanuk ti iry a sim mamaty desy ma byohe,
“Mlwol simamkwe ma!”
Iry desike ilol simake bonyo,
simake eras elik!
6 Lemade iry manosy lui Farisi desikre rbetik toha sey rasambayan tike,
ma rba loran elik ti rawahuk sir a ror raja Herodes wasi irire,
ma rtanuk maiske ma rreky ma rtabahunw a Yesuske.
Yesuske nyoha kbainare toha iry ribunke ma eras sir
7 Lemadendye Yesuske yor wasi matoha Iare rbai Tasi Kakan Galileake kserike,
ma soso sir toha iry ribun desikre,
keskyede iry ribun manosy Galilea desikre rtoha Yesuske.
Ode ribun a rosy Yudea dakun,
8 ode dum a rosy Yerusalem,
ode dum a rosy lasmyer Idumeake,
ode dum a rosy kseri timur sah Yordanke,
ode dum a rosy hnu mamin ti lasmyer Tiruske ode Sidonke dakun.
Iry desikre mumu neke,
rma ma rseak Yesuske,
kali rtomolu ktela Yesuske ialanare mumu de.
9 *Lemade kyoat Yesuske iatos iry desikre ma ribun sir,
desike bonyo yaso wasi matoha Iare ma rasosan aroke ti I,
ma syai ma yajar iry ribun desikre,
ma yajar sir mo,
kete masekan ti I.
10 Dendye Yesuske yajar sir maktei bonyo,
nenmo nyoha iry a klurukare wait a kbainare,
ma khyury ma iry a kluruk lenla inoha wait kbainare ne,
neke it de syekan it,
ma robak ma rkumak I.
11 Klala iry a ngkeskwaure rasukar sirare,
kolnye ratos Yesuske,
desike bonyo rsakitil ti Yesuske wasi lulululw ne,
ode reik ma rbohe,
“Oi neke Hulasokwe Anan a O!”
12 Keskyede Yesuske tyerik malkyakaw sir,
ma kete rahes ti irire ohe,
ese I ne Yesuske ne.
Yesuske yilik irkye hean a kresi enaru ma wasi nyaso sir
13 Lemadendye Yesuske syai bai kususwanke,
ode yabuk iry a ibuma ana iilik sir ma raka nyaso ti I desy,
lemade iry desikre rma ma rait a I.
14 Dendye yilik iry a iou sir ti ralake ne,
neke irkye hean a kresi enaru,
ma tyanuk ti sir de byohe,
“Kilik a e,
ma myor Yaw ma ana kaso e ma ti myabrita Brit Eraske.
15 Ode kal haretke ti e,
ma bisa ma myesak a ngkeskwaure toha irire dakun.”
Yesuske yor iry a dehean a kresi enaru iilikare (3:15)
16 Ode iry a dehean a kresi enaru Yesuske iilik desikre neke:
Simon,
a Yesuske iaki anike ti Petrus ne.
17 Ode Yakobus yor wai Yohanes,
neke Zebedeus anan a sir.
Iry deru neke Yesuske yaki anitare ti Boanergeske,
neke kbuanke o krutuke ananare.†
18 Ode Andreas,
Filipus,
Bartolomeus,
Matius,
Tomas,
Yakobus,
neke Alfeus ananke,
Tadeus,
Simon (iry a lui Zelot desy),†
19 ode Yudas Iskariotke,
ma i ne ana iketa Yesuske ne.
Yesuske yajar irire ma rhe ngkeskwaure wait totare
20 Lemade Yesuske yulak I huruk bai sey ramin tike.
Keskye iry ribunke rtoha I ma rbai sey desy dakun,
ma khyury ma Yesuske yor wasi matoha Iare lema bisa ma raknam o renw elik.
Markus 3:20-35
21 Kyoat desy dakun o irire dum a rtanuk ma rbohe,
“Yesuske hyukat de!”
Dendye kyoat Yesuske wai o hatnima nekre ratomolu tun desy bonyo,
rma ma robak ma ral I ma ana ror I bai wait a hnuke.
22 *Ode iry a mahe snurat o tnyetak Musa manosy a nus Yerusalemke rtanuk ma rbohe,
“Iry desike Beelzebul a syukar I!†
Kali yal ngkeskwaure wait uskwe khatuke amalkyauke,
ma yal ma yesak ngkeskwaure.”
23 Lemade Yesuske yabuk iry ribun desikre,
ode ihliak tunke ma yal ma yena sir de byohe,
“Kolkyabei ma ngkeskwaure wait uskwe khatuke,
bisa ma yesak ngkeskwaure wait uskwe khatuke de?
24 Ode kolnye ti nuske it,
ma iry mamin tiare it de syorw a it ma rakahrea,
ma rahe a rasakar sir,
desikeo khyury ma nus desike kiskyui-kiskyay.
25 Kola ne sekye kralake it ma kolnye it de lema yor eras it,
desikeo sekye krala desike kiskyui-kiskyay dakun.
26 Koldyesy dakun o kolnye ngkeskwaure wait uskwe khatuke yor wasi ngkeskwaw matoha iare,
it de syorw a it ma rakahrea ma rahe a rasakar sir,
desikeo khyury ma wait haret desikre lema kyal nini nam,
de kimres tei klen bo.
27 Kola dene irire dum a ralkyaw sir,
ma rsukar ei iry malkyakakwe it a wasi sekye ma ranamet wasi malolkye,
desikemo khyehyei neke musti mo rikat iry malkyakaw desy aduk,
maktei o nenmo bisa ma rsukar ei wasi sekye,
ti ranamet wasi malolkye.
28 Dendye mtyomolu ma ktwanuk ti e,
kolnye esei desike yala lim o sal,
ode ikanak irire,
desikeo ana Hulasokwe bisa ma syos sala desy ba.
29 Keskyede esei desike ikanak Hulasokwe Memeanke,
desikeo ana Hulasokwe lema syos sala desy ba.
De iry desike hyar wasi lim o sal desike nini nam.”*
30 Yesuske tyanuk koldyesy kali irire dum a rtanuk ma rbohe,
“Ngkeskwakwe syukar I.”
Iry matohak Hulasokwe tunanare neke rola Yesuske ena o wai
31 Lemade Yesuske ena-na yor Yesuske wainare rma ma rseak I,
keskye ramdiry ti mloskye,
ode raso ma rabuk Yesuske.
32 Ode irire ribun moluk a rtaklulw ma rkoal Yesuske,
dendye dum a rlosu ti Yesuske de rbohe,
“Matos!
Enamw yor waimure sir ne mloskye,
ma robak ma rseak a O.”
33 Keskyede Yesuske hyalas sir ma byohe,
“Esekar ne enakw o waikw a sir ne de?”