Yesuske yal kotw ti irkye ribunke enasim a kbyilak ma ra
6
Sekwe enai ne kyelak eta bonyo, Yesuske yor wasi matoha Iare ramin ti namwata Tasi Kakan Galileake, dendye rsai aroke ma rbai namwata tasi kakan desike seridake. Tasi Kakan Galilea ne kyalamo rhaly o Tasi Kakan Tiberiaske dakun. 2 Ode kyalamo Yesuske byai kabei ta kabei bo, desikeo iry ribunke lui-lui sir ma rtoha I, kali ratos a ktela masalsyalik ialanare ti iry a klurukare de. 3 Ode kyoat Yesuske yor wasi matoha Iare ranait namwata tasi kakan desy seridake bonyo, rsai bai kususwanke, ma ti rtaklulw ti desy. 4 Kyoat desy dakun o Yahudi-nare wait sew lan Paskahke kyarasy de.† 5 Ode kyoat desike Yesuske byitil matake ma yatos o iry ribun lan ne lui-lui sir ma rma ma rait a I ti desy, lemade tyanuk ti Filipus ma byohe, “Filipus o, tliw a kotw o kabei ma tal ti iry desikre mumu ma bisa ma ra de?” 6 Yesuske hye Filipus ralake kralake de, keskye tyanuk ti Filipus koldyesy ma syeak o Filipus ana hyalas kolkyabei. Kali Yesuske myesan a hye ohe ana byuma yala sai.7 Lemade Filipus hyalas Yesuske ma byohe, “Wah, Tuanggurw, kolnye tal kuban blyawan bokbokke atkwe enaru (200)† ma tliw a rotkye ti iry desikre mo, ana lema kyait iry desikre mumu, biar ma rabini-rabini ma irkye sasam o yosy tebikan dakun!”
8 Lemade Yesuske wasi matoha Ike it, ma ani Andreas, neke Simon Petrus wai i, ma tyanuk de byohe, 9 “Tuanggurw, ti neke naman wamwankye it ma hina roty jelaike enasim, ode maskye enaru bo.† Keskye kolnye tal ti iry nekre ma ra, desikeo lema kyait sir, kali ribun sir a ksyalik.”
10 Lemade Yesuske tyanuk ti wasi matoha Iare ma byohe, “Myaso iry ribun lan desikre ma rtaklulw.”
Ti wen desy dakun o tnyeinare ribun, dendye iry ribun lan desikre rtaklulw ti tnyei-na khahanare. Ode ti iry ribun lan desikre wamwanire rmesan bonyo, aryaritke irkye ribunke enasim sir (5000). Klala lenla raki wamfwetare ror namanare. 11 Lemade Yesuske yal roty o masy desikre, ode syambayan ma syalak eraske ba ti Hulasokwe. Maktei o Yesuske byini-byiny a roty o masy desikre, ode yal ti wasi matoha Iare ma rahe ti iry ribun lan desikre, ma iry desikre ra roty o masy desikre nini rabesbesur. 12 Ode kyoat iry desikre raknam ma rabesur bonyo, Yesuske tyanuk ti wasi matoha Iare ma byohe, “Miwahuk a kotu ktera desikre, ma kete rabyata.”
13 Dendye Yesuske wasi matoha Iare, rili rahuk a roti ktera desikre bonyo, kbyenw a kolakye hean a kresi enaru (12).
14 Kyoat iry ribun lan desikre ratos a ktela masalsyalik a Yesuske iala desike bonyo, it de tyanuk ti it ma rbohe, “Mlay bain, Iry neke iry a manety Hulasokwe wasi nyano a takita-takita ne I ne, ma myai nuske ktem ne mane!”*
15 Ode Yesuske hye ohe, iry desikre ralkyau sir ma rala ma rpaksa I ma ika Raja ti sir. Lemadendye Yesuske byetik toha wen desy, ma byai kususwanke it, ma ti myesan ti desy bo.
Yesuske lyakut ti tasike kakanke khahake
16 Kyoat a kyala ma sewah bonyo, Yesuske wasi matoha Iare rorw ei namwata tasi kakanke. 17 Ode rakita Yesuske nini kelerkok de, keskye Yesuske lenla mya ma yait sir. Dendye Yesuske wasi matoha Iare rsai aroke, ode rhaya aro desy ma rbai hnu Kapernaumke, ma ktyoha nam Yesuske iaso ti sir a kmuna desy de. 18 Ode lema soso bonyo, eskwe mety ma besanare lan. 19 Ode kyoat rhaya aro desy ma kasonanke anakyai lalwakwe ribunke enasim ta nem ne de (5000m-6000m), desikeo ratos ti o Yesuske lyakut ti tasike khahake ma mya sara wait aroke. Dendye ramtaut ma ksyeman sir a ksyalik. 20 Keskyede Yesuske tyanuk ti wasi matoha I desikre ma byohe, “Kete mimtaut, kali Yau ne.”
21 Lemadendye wasi matoha I desikre ralatare kimukmuka i, ma ral Yesuske ei wait aroke kralake. Ode lema rhe mait bonyo wait aroke ksyara i ti wen raba tike de.
Iry ribunke robak Yesuske
22 Ode wasi bolbolke bonyo, iry ribun lan mamin ti tasi kakanke wasi seridake a nggora neke, rhe ohe detke aroke cuma mo sasam a kbyaly ti desy bo, ode Yesuske wasi matoha Iare rsai aro desy ma rba de, keskyede iry ribun lan desikre rhe dakun o Yesuske lema yor wasi matoha Iare ma rba. 23 Kyoat desy o, aroke enai ne kyosy a nus Tiberiaske, ma kmya ma kbyaly ti desy, ma knyey a wen a Yesuske isambayan ma isalak eraske ba ti Hulasokwe ti rotkye, ma iry ribun lan desikre rana ne. 24 Ode kyoat iry ribun lan desikre ratos ohe, Yesuske yor wasi matoha Iare lema ramin ti desy bonyo, iry ribun lan desikre rsai aro desikre, ma rbai hnu Kapernaumke ti robak Yesuske o so.
Yesus neke Roty a manety mormyorifke
25 Kyoat iry ribun lan desikre ranait Yesuske ti tasi kakanke seridake bonyo, rena I ma rbohe, “Tuanggurw, hekyab ne munait wen ne ne de?”
26 Dendye Yesuske hyalas sir ma byohe, “Mtyomolu mamak nam kutanuk ti e ne: Miobak Yaw neke, lema khyali ktela masalsyalik i a kuala desikre wasi kbuanare, ma ksyusu ohe esei ne Yaw ne, de miobak Yaw neke cuma mo khyali kotw a kunal ti e ma mina ma mibesur bony ne. 27 Mnyenas! Mindil ma mikarya ne, neke kete mkyarya ma myobak kotw a ana busu ma kibtasy ma ktei ne, de musti mo mkyarya ma myobak kotw a kinety a mormyorif manal nini namke ti e ne. Kotw desike ne ana Irkye Anan Yau ne kal ti e, kali Yaw neke Amakw Hulasokwe byitil sima ma Yaw de.”
28 Lemade iry desikre rena Yesuske ma rbohe, “Desikemo musti mo aramy myala sai ma ktyoha Hulasokwe ibuke de?”
29 Dendye Yesuske hyalas sir ma byohe, “Nam Hulasokwe ibuma mialake, neke mtyohak ti Iry a Hulasokwe iaso I ne.”
30 Dendye iry desikre rtanuk ma rbohe, “Koldyesikemo mala nyatoske it ma aramy myatos, mamode aramy mtyohak ti O. Lemade sai ne ana muala ne de? 31 Kali kyoat ity ebnwo matrumat ramin ti wen malosy-loskye, desikeo ra kotw a rabohe manna ne.† Kola dene rakesy ti Kitab Lanke ma kbyohe, ‘Musa yal roty manosy wen sra eraske ti sir ma ra.’*”
32 Lemadendye Yesuske tyanuk ti iry desikre ma byohe, “Mtyomolu mamak nam kutanuk ne: heitlulswo Musa lema yal roty manosy wen sra eraske ti ity ebnwo matrumat, de Amaku I ne inal roty manosy wen sra eraske ti sir ne. Ode senweke I ne byuma yal roty a bain-bain manosy wen sra eraske ti e dakun. 33 Kali roty a nenmo Hulasokwe inal desike, neke roty a maoru kyosy a wen sra eraske, ma kyal mormyorif manal nini namke ti irkye ti nuske ktem ne.”
34 Lemade iry desikre rtanuk ma rbohe, “Amam Lan O, desikemo kyaki-kyaki ne, mal roty desike ma aramy!”
35 Dendye Yesuske hyalas sir ma byohe, “Yaw ne Roty a manety mormyorifke. Dendye esei desike mya ma yait Yaw ma tyohak ma Yaw, desikemo ana lema imlar ti kiba knaru ne de, ode ana lema byatu ti kiba knaru ne de. 36 Keskyede kola ktwanuk ti e de, ode ana senwe koly ma ktwanuk ti e huruk mane, neke kolnye: Biar ma myatos Yaw de, keskyede ti ralamy kralanare ne, lema mtyohak ma Yaw. 37 Klala iry a Amaku inal sir ma Yaw ma wasikw iry a sir ne, iry desikre mumu ne ana rma ma rait Yaw. Ode ana lema ktwian sir elik. 38 Kali korw toha wen sra eraske ma kuma ne, neke lema ktyoha kubuke, de ktyoha Amakw a maaso Yaw ne ibuke. 39 Ode Amakw a maaso Yaw neke ibuke kolnye: Iry a inal sir ma Yaw ma wasikw a sir mumu ne, ana lema sasam a myaty ti kiba knaru ne de, de Yaw ne kmwesan a kaorif sir huruk ti sew a nuske ktem ne ana kilodur ne, neke sew a Hulasokwe ana iukun irkye ne.† 40 Kali nam Amaku ibu nekre ne: iry a raou ohe Hulasokwe Anan Yaw ne, ode ratohak ma Yaw ne, iry desikre mumu ne ana rmorif nini nam, ode Yaw neke ana kaorif sir huruk ti sew a nuske ktem ne ana kilodur ne.”
41 Keskyede iry a Yahudi-nare rakunkunw, kali lema rou ktela Yesuske itanuk ohe, I neke roty a maoru kyosy a wen sra eraske ne. 42 Dendye iry desikre it de tyanuk ti it ma rbohe, “De Yesus ne lema the ena o ama e? De lema I neke Yusuf anan a I e? Ode kyanmwane ibohe, ioru yosy a wen sra eraske ne de?”
43 Lemade Yesuske hyalas sir ma byohe, “Kete mikunkunw ti nam kutanuk desy. 44 Kali lema irkye it a bisa ma mya ma yait Yaw, kolnye Amakw a maaso Yaw neke lema yor i ma Yaw. Dendye kolnye esei desike mya ma yait Yaw, desikeo ana kaorif i huruk ti sew a nuske ktem ne ana kilodur ne. 45 *Neke kola ne iry manety Hulasokwe wasi nyanoare rkesy ti Kitab Lanke ma kbyohe, ‘Iry desikre mumu ne ana Hulasokwe yajar a sir.’ Dendye esei desike tyomolu Amaku nam iajarare, ode tyoha, desikeo nenmo iry desike mya ma yait Yaw. 46 Lema irkye it a myatakit Amakw, de lenla iry a Amaku iaso I ne bo, I neke myatakit Ama de.
47 Mnyenas, esei desike tyohak ma Yaw, desikeo i desike mormyorif manal nini namke kimin a i. 48 Kali Yaw ne Roty manety mormyorifke. 49 Heitlulswo ti wen malosy-loskye, ity ebnwo matrumat ra kotw a rabohe, manna ne, keskye rmaty mumu de. 50 Keskyede esei desike nya Roty a bain-bain manosy wen sra eraske, desikemo i desike ana lema myaty. 51 Kali Yaw neke Roty a manety mormyorifke ma kyoru kyosy a wen sra eraske, ma kolnye esei desike nya Roty ne, desikeo ana myorif nini nam. Roty a ana kunal ti nuske ktem ne ma irire bisa ma ramorif ne, neke tenakkwe desy.”
52 Dendye kyoat iry Yahudi-nare ratomolu Yesuske ma itanuk koldyesy bonyo, it de yal it, ma rtanuk ma rbohe, “Kolkyabei mane iry neke inal a tenanke ma ta-na ne de?”
53 Lemadendye Yesuske tyanuk ti sir ma byohe, “Nam kutanuk ti e ne mlay: kolnye ei neke lema mi Irkye Ananke tenanke,† ode lema myenw a larake, desikeo ana mormyorif manal nini namke lema kimin a e. 54 Klala esei desike nya tenakkwe ode yenw a larakkwe, desikeo i desike mormyorif manal nini namke kimin a i ti kiba knaru ne, ode ana kaorif a i ti sew a nuske ktem ne ana kilodur ne. 55 Kali tenakw neke kotkwe desy bain-bain ma ra, ode larakw neke werke desy bain-bain ma renw. 56 Lemade esei desike nya tenakkwe ode yenw larakkwe, desikeo imin ti Yaw, ode kumin ti i. 57 Amakw a mamorif neke, yaso Yaw, ode wasikw mormyorifke kyosy Amakw. Kola dene iry a ra-na tenakkwe ne, neke ana wait mormyorifke kyosy a Yaw. 58 Yaw neke Roty a bain-bain manosy wen sra eraske, ma lema kola roty a ity ebnwo matrumat ra-na desy. Kali biar ma ity ebnwo matrumat ra roty manna desy, keskye ramatkye bo, kali manna desike kotkwe desy bo. Klala iry ma-na Roty a manosy wen sra eraske ne, ana rmorif nini nam ti kiba knaru ne.”
59 Nam ribun lan Yesuske itanuk desikre, neke tyanuk ti kyoat yajar ti sey rasambayan tike, ti hnu Kapernaumke.
Yesuske wasi matoha Iare ribun a rtutuk lakhidik a I ma lema rtoha I de
60 Ode kyoat iry desikre ratomolu tun a Yesuske itanuk desikre bonyo, wasi matoha Iare ribun a rtanuk ma rbohe, “Nam a Yesuske iajar nekre ksunw ksyalik. Ma ana ese bisa ma yala yal ma tyoha de!”
61 Keskye Yesuske hye wasi matoha Iare nam rakunkunw khyalike de. Lemade Yesuske tyanuk ti sir ma byohe, “Kyanmwane wasikw tun a khatu kutanuk desikre kyala e ma mibrai mitohak ma Yaw huruk ne de? 62 Nenmo ktwanuk koldyesy bonyo ralamire kakan de. Apalai kolnye ei neke ana myatos Irkye Anan Yau ne, ma kulak Yaw ma kswai bai wen sra eraske huruk o, ana mkyoman kolkya? 63 Hulasokwe Memeanke kmyesan a kyal mormyorif manal nini namke ti irkye. Irkye amalkyauke lema kyor i ei mormyorif manal nini namke. Klala tun kutanuk ti ei neke tun a khatu manosy Hulasokwe Memeanke, ode tun a khatu nekre kyety mormyorif manal nini namke ti e. 64 Keskye ti ei neke dum a lema mtyohak.”
Yesuske tyanuk koldyesy, kali kyala kyosy a yilik wasi matoha I desikre, desikeo hye deny ohe, ti wasi matoha I desikre esekar ne ana lema ratohak ti I ne, ode esei ne ana iketa I ne.
65 Dendye Yesuske tyanuk huruk ti sir ma byohe, “Koldyesike mane Yaw neke klwosu ti e ohe, lema irkye it a mya ma yait Yaw, kolnye Amaku lenla yal i ma Yaw aduk.”
66 Kyala kyosy a Yesuske itanuk koldyesy maktei bonyo, nenmo wasi matoha Iare ribun a rtutuk lakhidik Yesuske, ma lema rou ma rtoha I de. 67 Lemadendye Yesuske yena wasi matoha I dehean a kresi enaru desy ma byohe, “Kete kyal nini ei neke mtyutuk lakhidik Yaw, ma mbya dakun de?”
68 *Lemade Petrus a hyalas I ma byohe, “Amam Lan O, sew kyaki ne mmwesan a mtwanuk tun manety mormyorif manal nini namke ma aramy, dendye ana aramy mbya ti myor kabei huruk de? 69 Aramy neke mtyohak ode aramy mhye deny ohe, Oi neke Iry a nelnyelnyely a Hulasokwe iaso ma imai nuske ne I ne O.”
70 Lemadendye Yesuske hyalas ma byohe, “Yaw ne kmwesan a kuilik iry a dehean a kresi enaru e ne. Keskyede ti ei neke irkye sasam a ngkeskwaure wait uskwe khatuke hyareta i de!”
71 Iry a Yesuske itanuk i desy neke ksyusu Yudas a Simon Iskariotke anan desy, kali Yudas neke i ne ana iketa Yesuske ne, biar ma Yudas neke Yesuske wasi matoha Ike it ne dakun.