Yesuske wainare lema rtohak ti I
7
Maktei o, Yesuske lyakut a lyola nus o hnu mamin ti propinsi Galileake ktem desy.† Yesuske lyakut ti wen desike, kali byuma soso i toha propinsi Yudeake. Ode Yesuske byuma soso i toha propinsi Yudeake, kali ti propinsi Yudeake iry manety lulw ti Yahudi-nare robak a ksala ma rtabahunw a I. 2 *Kyoat desy dakun o Yahudi-nare wait a sew lanke kyarasy de, neke sew a kyalamo rabohe, sew lan Ramin ti Lasyery a Ranal Aw Ktafranare ma Rataruk ne.† 3 Ode Yesuske wainare rtanuk ti I ma rbohe, “Wai, adoko mbwai propinsi Yudeake. Mbwai so ma wasimw matoha Oare bisa ma ratos a ktela masalsyalik i a muala desikre. 4 Kali kolnye esei desike byuma iry ribunke rhe i, desikemo kete ihunik a ktela ialanare. Dendye kolnye mbwuma iry ribunke rhe O, desikeo mbwai propinsi Yudeake ti mala ktela masalsyalik i nekre ti so, ma iry ribunke ti nuske ktem ne ratos dakun.”5 Yesuske wainare rtanuk ti I koldyesy, kali Yesuske wai desikre dakun o lema rtohak ti I.
6 Lemade Yesuske hyalas sir ma byohe, “Lenla kyait a sekwe ma kbwai Yerusalem, de kolnye hekyabei ta hekyabei bo, ode mbyuma mbya, desikeo kyosy a e bo. 7 Kali iry mamin ti nuske ktem neke lema ramnisik a e, de ramnisik Yaw, kali Yau ne ktwanuk a wait ktela atyat raalanare. 8 Dendye kolnye mbyuma mbya ti mtyoha sew lan desy, desikeo mbyai so ma myor iry ribun desikre ma mtyoha. Klala Yau neke lema kbwa, kali lenla kyait wasikw sekwe.”
9 Yesuske tyanuk ti wainare koldyesy ma rba, ode I a imin ti Galilea sekwe enai ne aduk.
Yesuske yajar irire ti wen rasambayan tike
10 Ode kyoat a Yesuske wainare rbai Yerusalem ti rtoha sew lan desy bonyo, Yesuske tyoha ba dakun, keskye lema yala tenanke ma kbyetik ti iry ribun a mamin ti desikre. 11 Ode ti sew lan desike iry manety lulw ti Yahudi-nare, ralkyaw sir ma robak a I ti sew lan desy, ma rena ti de rena ma de rbohe, “Wan ne ika?”
12 Desikeo iry ribun matoha sew lan desike rabububw, ma dum a rtanuk ma rbohe, “Iry a raobak desike iry a eraske.” Klala dum a rtanuk dakun ma rbohe, “Iry ne lema eras I! Kali kyalamo I ne ikakmet a iry ribunke ne.” 13 Keskyede lema irkye it a ires ma ihes Yesuske ti ribunke khahake, kali ramtaut iry manety lulw ti Yahudi desikre.
Yesuske tyanuk tenanke kmyesan
14 Ode kyoat sew lan desike klyakut sekwe nenma enatelw ta enaat ne bonyo, Yesuske syukar ei kintal Hulasokwe Seike, ma yabrita Hulasokwe tunanare ti iry ribunke. 15 Kyoat manety lulw ti Yahudi desikre ratomolu Yesuske ma iajar bonyo rheran a ksyalik, ma it de yena it ma rbohe, “Kolkyabei mane iry ne ihe telke ma itanuk nam ribun nekre ne de? Iry neke lema syukar a ity wait skolke o de?”
16 Lemade Yesuske tyanuk ti sir ma byohe, “Amam e! Nam kuajar nekre lema kyosy a Yaw, de nam kuajar nekre kyosy a Hulasow a maaso Yaw ne. 17 Dendye esei desike you ma yala nam Hulasokwe ibuare, ana i desike hye ohe nam kuajar nekre kyosy a Hulasokwe bain-bain, de lema kyosy a nam kurekanare kmyesan bo. 18 Dendye esei desike tyanuk nam irekanare kmyesan, i desike yobak alanke ti tenanke kmyesan bo, keskyede kolnye esei desike yobak alanke ti Hulasow a maaso ike, desikemo iry desike lema ikakmet, de tyanuk nam a mlaire. 19 De lema Musa i ne inal a Hulasokwe wasi tnyetakare ti e ne e? Keskyede ei neke lema irkye it a tyoha tnyetak desikre mumu elik. Ode kyanmwane miobak a ksala ma mitabahunw a Yaw ne de?”
20 Lemade iry ribun desikre rhalas Yesuske ma rbohe, “Mhwukat e, ta kete ngkeskwakwe syukar O de! Esei ne ibuma itabahunw a O ne de?”
21 Dendye Yesuske hyalas iry desikre ma byohe, “Ei neke mhyeran a Yaw, kali kkwarya ti sew Inamreske, neke knwoha irkye wasi kbaike ma eras i de. 22 *Keskye ei neke mkyarya ti sew Inamreske dakun, kali kyoat naman wamwankye wasi sekwe ma ratosa i ne kdi ti sew Inamreske, desikeo tetap ma myatosa naman wamwany desy bo.† Ode the ohe, ktela raatosa tenatare ne, lema kyosy tnyetak Musa desy, de ktela desike kyosy a ity ebnwo matrumatare ma desy. Kali lenla tnyetak Musake kimin, desikeo ktela raatosa tenatare ne kimin a kmuna de. 23 *Ode kolnye myatosa namanare tenatare ti sew Inamreske, ma ktyoha tnyetak Musake, desyo lema namit-namit.† Dendye kyanmwane mika keyer a Yaw ti kolnye kunoha irkye wasi kbaike ma eras i elik ti sew Inamreske ne de? 24 Dendye kete myukun irire mo ktyoha nam miseakare bo, de musti mo myukun irire neke ktyoha ktela mlaire.”
Irire robak ma rhe ohe Yesus neke bain-bain o Iry a Hulasokwe isusu I ma ika Raja ode iaorif irkye ne ta lema
25 Kyoat desike iry mamin ti Yerusalem desikre dum a rtanuk ma rbohe, “De lema iry neke I ne ity wait manety lulw ti Yahudi nekre raobak I ma ratabahunw a I ne e? 26 Ode myatos bo, iry neke yajar Hulasokwe tunanare ti iry ribunke, keskyede iry manety lulw ti Yahudi desikre, lema irkye it a tyanuk namit-namit ti I elik. Kali anakyai manety lulw desikre rhe ohe, I neke Mesias a I.† 27 Keskyede kolnye Mesiaske mya, desikeo ana lema the ohe yosy kabei de mya. Klala iry a matun neke the wena inoskye de.”
28 Ode malmata Yesuske yabrita Hulasokwe tunanare ti kintal Hulasokwe Seike, desikeo yatela ma byohe, “Mlay! Ei neke mhye Yaw, ode mhye hnu a kunoskye. Keskyede kuma neke, lema kyosy a kmwesan a kubuke, de Yau neke Amaku yaso Yaw. Ode Amakw neke Iry mlakye, keskyede lema mhye I. 29 Klala Yau neke khwe I, kali heitlulswo Yau neke kor a I, ode I neke yaso Yaw ma kmwai nuske ktem ne mane.”
30 Ode kyoat manety lulw ti Yahudi-nare ratomolu Yesuske ma itanuk koldyesy bonyo ralkyaw sir ma rkumak a I, keskyede lema kika iry ma bisa ma rkumak a I, kali lenla kyait Yesuske wasi sew a Hulasokwe itunik ma ana imatkye. 31 Lemadendye ti iry a mamin ti kintal Hulasokwe Seike, neke ribun a rtohak ti I, ode rtanuk ma rbohe, “Mesiaske I ne. Kali lema irkye it a bisa ma yala ktela masalsyalik iare ma kbyilak ktela masalsyalik a Iry ne iala nekre elik.”
Iry a manety lulw ti Yahudi-nare rreky ma rkumak Yesuske
32 Lemadendye iry manosy lui Farisi desikre rtomolu iry ribun desikre ma rahes Yesuske ohe Yesus neke Mesias a I. Dendye iry manosy lui Farisi desikre rba ti ror iry mabaa klen ti irkye yor Hulasokwe ne wait usu khatunare, ma rabuk suldat majak ti Hulasokwe Seike, ode raso sir ma ti rkumak Yesuske. 33 Lemadendye Yesuske tyanuk ti iry ribun desikre ma byohe, “Ana kor e ti ne, keskye lema soso, kali kala ma kbwa ti kait Amakw maaso Yaw ma kumai nuske ktem ne. 34 Ode ei neke ana myobak a Yaw, keskyede ana lema minal a myor Yaw, kali ei neke lema bisa ma mbyai wen ana kuba tike.”
35 Lemadendye iry manety lulw ti Yahudi desikre, it de tyanuk ti it ma rbohe, “Iry ne yala ma byai kabei ne ana lema tanal a tor I ne de? De kete byuma bya ti yait iry a Yahudi mamin hnuare o negara salik, ma yajar ity wait iry a mahe tel Yunani nekre o so. 36 Ode tuna itanuk ma ibohe, ‘Ity neke ana tobak a I, keskye ana lema tatot I, ode lema bisa tbai wen ana iba tike dakun.’ Neke kbuan sai de?”
Yesus neke wer maorif irkye
37 *Ode ti Sew Lan deitw Ramin ti Lasyerire desy, neke wasi sew manosy lyakwe eras ma kbyilak wasi sew a mamunanare. Dendye ti sew manosy lyaw desike Yesuske imdiry ode yatela ti iry ribun desikre ma byohe, “Kolnye kabei desike byatu, desikeo mya ma yait Yaw ma kal werke ti yenw. 38 *Ode esei desike tyohak ma Yaw, desikeo i desike ralake kralake ana kola dene rakesy ti Kitab Lanke ma kbyohe, ‘Wer manety mormyorifke ana knyaha ti ralake kralake.’ ”†
39 Yesuske tyanuk koldyesy ma ksyusu ohe, wer manety mormyorif desike Hulasokwe Memeanke desy. Ode Yesuske lyosu ohe ana Hulasokwe yal Memean desike ti iry a matohak ti Yesuske ne. Keskyede kyoat desike Hulasokwe lenla yal Memean desike ti iry a matohakare, kali Yesuske lenla myaty ode myorif huruk, ma syai bai wen sra eraske ma Ama Hulasokwe lyeru o byitil Anan Yesuske Anike ma atat.*
40 Ode kyoat a iry ribun desikre ratomolu Yesuske tuna desike bonyo, dum a rtanuk ma rbohe, “Mlay bain, I neke iry a manety Hulasokwe wasi nyanoke I ne, ti heitlulswo Hulasokwe ihatetak ma ana ima ne.”
41 *Klala iry dum a rbohe, “I neke Mesiaske I ne.”
Keskyede dum a rtanuk dakun ma rbohe, “Lema koldyesy! Kali iry neke yosy a propinsi Galileake, keskye the ohe, kyoat a Mesiaske mya, desikeo lema yosy a Galilea. 42 Kali Kitab Lanke ktyanuk ma kbyohe, Mesias neke, raja Daud tesnwo natu I, ode yosy a hnu Betlehemke ti propinsi Yudeake, kali raja Daud neke yosy a Betlehem.”
43 Ode kalyauke bonyo, iry ribun desikre it de yal it a khyali Yesuske, ma dum a rtohak ti I, ode dum a lema rtohak ti I. 44 Ode dum a rbuma rkumak Yesuske, keskye lema irkye it a kyumak Yesuske elik.
Iry manety lulw ti Yahudi-nare lema rtohak ti Yesuske
45 Maktei o suldat majak ti Hulasokwe Seike lema rkumak Yesuske, de rulak sir ma rba o ramranran bai iry lan maaso sir ma rakumak Yesuske ne, neke iry mabaa klen ti irkye yor Hulasokwe wait usu khatunare ror iry manosy lui Farisi-nare. Ode kyoat iry lan desikre ratos suldat desikre ma rma o lema rkumak Yesuske ma ror I, dendye rena suldat desikre ma rbohe, “Kyanmwane lema minor iry desike mai ne, ne de?”
46 Dendye suldat majak desikre rhalas ma rbohe, “Edo, lenla aramy myatos ode mtyomolu irkye it ma itun kola Iry ne elik.”
47 Lemade iry a Farisi desikre rtanuk ti suldat majak desikre ma rbohe, “Ta kete iry desike ikakmet a e dakun ma desy de! 48 Lenla elik ma ei neke mtyomolu ohe, iry manety lulw ti Yahudi-nare, dete lemamo iry manosy lui Farisi-nare kola aramy ne, neke rtohak ti iry desy e? Lema o de! 49 Keskyede iry ribun desikre rtohak ti iry desy, kali lema rhe tnyetak Musake. Dendye Hulasokwe keyerake kimin ti iry ribun desikre ma ana tyuhar sir ba!”
50 *Ode ti desike iry manosy lui Farisike it ma iwahuk i a yor sir ti desy dakun, ma ani Nikodemus. Ma Nikodemus neke kola bya ti syeak Yesuske de.† Dendye Nikodemus tyanuk ti iry desikre ma byohe, 51 “Amam e! Kolnye ktyoha tnyetak Musake, desikemo lema bisa ma tukun irire, kolnye lenla the wait tun o snyary nekre o mlay ta sal.”
52 Kyoat Nikodemus itanuk koldyesy bonyo, iry desikre rhalas i ma rbohe, “Hei, oi ne iry a Galilea o dakun kola iry desy e? Lemamo mbwihy mamak a Kitab Lan desy ma mhwe ohe, lema kika iry a manety Hulasokwe wasi nyanoke ma rosy a propinsi Galileake!”