Wamfwet maaldotkwe
8
Ode Yesuske byetik toha Yerusalem ma syai bai Kususwan Zaitunke. 2 Ode bolbolbol ne bonyo yorw ma byai Hulasokwe Seike huruk. Lemade iry ribunke rma ma rait I ti desy. Lemadendye Yesuske tyaklulw ti kintal Hulasokwe Seike ma yajar iry ribun desikre. 3 Ode malmata Yesuske yajar iry ribun desikre ti desy, desikeo iry mahe snurat o tnyetak Musake ror iry manosy lui Farisi-nare rhait wamfwetke it daku Yesuske, ma rtutuk wamfwet desy ti iry ribun desikre wait kditlalanke. Wamfwet desike yaldotw kali yenaf yor wamwany salik, ma irire rkumak i ti kyoat yenaf yor wamwany desy.4 Ode iry mahe snurat o tnyetak Musake ror iry manosy lui Farisi desikre rtanuk ti Yesuske ma rbohe, “Tuanggurw, aramy myait wamfwet ne elik, ma yenaf yor irkye it a lai. 5 *Ode ti tnyetak Musake kbyohe, kolnye wamfwetke it ma yaldotw, desikemo ral hature ma ratdya i nini myaty bo. Lemadendye aramy myena ohe, ktyoha O mo kolkyabei ti ktela maoly ne de?”
6 Iry desikre rtanuk koldyesy ma rhury Yesuske, ma kolnye Yesuske tyanuk sal tunke it bonyo roit salke ti I elik. Keskyede Yesuske tyukar ei hahke, ode yal tanake it ma kyesy nam dum ti lasmyerke. 7 Ode iry desikre lema ramres ti raena Yesuske ne. Lemade Yesuske imdiry ode tyanuk ti sir ma byohe, “Ti ei ne mumu neke, kolnye esei desike kyoman ma lema ika wasi lim o sal, desikemo iry desike yal hatkwe ma yatdya wamfwet desy kmuna.” 8 Maktei o Yesuske tyukar ei hahke huruk ode yal tanake ma kyesy huruk ti lasmyerke.
9 Keskyede kyoat iry maoit sal ti wamfwet desike ratomolu Yesuske ma itanuk koldyesy bonyo, iry desikre ratsam-ratsam a rbetik toha wen desy ma rba, neke kyala kyosy auskwe ma ti kyait amurkye, ode lenla Yesuske myesan a yor wamfwet desy ti iry ribun desikre wait kditlalan ne bo. 10 Lemade Yesuske imdiry ode tyanuk ti wamfwet desy ma byohe, “Eno, iry maoit sal ti o nekre rbai ka? De lema ramin ma rukun a o e?”
11 Dendye wamfwet desike hyalas Yesuske ma byohe, “Amam Lan O, iry desikre lema ramin de.”
Dendye Yesuske tyanuk ti wamfwet desy huruk ma byohe, “Yaw dakun o lema kukun a o. Lemade mbwa, ode kyala kyosy senwe kete mala lim o sal de.”]
Yesus neke I ne idelaf ti nuske ktem ne
12 *Lemade Yesuske tyanuk huruk ti iry ribun mawahuk sir ti desy ma byohe, “Yau neke keluk damar ma kdwelaf iry mamin ti nuske ktem ne. Lemadendye esei desike tyoha Yaw, desikeo i desike ana lema lyakut ti kelerakokke de, de ana lyakut ti madelaf a manety mormyorif manal nini namke ti i.”
13 *Dendye iry manosy lui Farisi a mamdiry ti desikre rtanuk ti Yesuske ma rbohe, “Oi neke mtwanuk a tenamkwe kmyesan bo! Dendye irire lema bisa ma rtohak tun mutanuk desikre, kali musti mo iry salik a rhe a kmuna ma rma dakun ma rlosu ma aramy ohe nam mutanuk desikre mlay ta sal.”
14 Lemade Yesuske tyanuk ti iry desikre ma byohe, “Biar ma ktwanuk tenakkwe kmyesan, keskye nam kutanuk desike mlay, kali khwe ohe, Yau neke kosy kabei ma kmwa, ode ana kolik Yaw ma kbwai kabei. Klala ei neke lema mhye o kosy kabei ma kmwa, ode lema mhye o ana kolik Yaw o kbwai kabei. 15 Ei neke myukun tun ti irire ma ktyoha irkye irekanke, klala Yau neke lema kukun tun ti irkye it dakun ti nuske ktem ne. 16 Keskye kolnye kukun tun ti iry mamin ti nuske ktem ne, desikeo nam kuukun desike ana ktyoha ksala mlaire. Kali lema kmwesan kukun tun ma kohut, de kor Amakw a maaso Yaw ne aramiru myukun tun ma myohut ma desy. 17 Kali ti wasimy tnyetak manosy Musake ne rkesy ohe, kolnye irkye enaru ratos namke it, ode rtanuk nam raatos desy, desikeo nam ratanuk desike irire bisa ma rtohak ohe, nam ratanuk desike mlay ma kdi ti bain. 18 Kola dene Yaw ne, ma irkye enaru rtanuk tenakkwe kmyesan, neke Yaw, ode Amakw a maaso Yaw ne.”
19 Lemadendye iry desikre rena Yesuske huruk de rbohe, “Koldyesikemo Amamw neke imin o kabei de?”
Desikeo Yesuske hyalas sir ma byohe, “Kolnye lema mhye Yaw, desikemo lema mhye o Amakw ne esei dakun. Ode kolnye mhye Yaw, desikemo ana mhye Amakw dakun.”
20 Ode Yesuske yajar iry desikre mumu ti kintal Hulasokwe Seike, neke knyey a wen raluk natzarare tike. Keskyede iry desikre lema bisa ma rkumak I, kali lenla kyait Yesuske wasi sew a Hulasokwe itunik ma imatkye.
Esei desike lema tyohak ti Yesuske ana myaty yor wasi lim o sal desikre bo
21 Lemadendye Yesuske tyanuk ti iry manosy lui Farisi desikre huruk ma byohe, “Ana kala ma kbwai wen salik. Ode ei neke lema bisa ma mbyai wen ana kuba tike. Ode ana myobak a Yaw, keskyede ana lema bisa ma mitot Yaw, de ana myaty myor wasimy lim o sal miala desikre bo.”
22 Ode kyoat Yesuske itanuk koldyesy bonyo, iry manety lulw ti Yahudi-nare it de tyanuk ti it ma rbohe, “Ta iry neke yala ma tyabahunw tenanke mane itanuk ma ibohe, ‘Ei neke lema bisa ma mbyai wen ana kuba tike.’ ”
23 Dendye Yesuske tyanuk ti sir de byohe, “Ei ne mumu ne myosy a lasmyerke khaha ne, klala Yaw neke kosy a wen sra eraske. Ei ne mumu ne nuske ktem ne wasi e, klala Yau neke nuske ktem ne lema wasi Yaw. 24 Lemadendye dai ktwanuk ti e ma kbwohe, ei neke ana myaty myor wasimy lim o sal. Kali kolnye lema mtyohak ohe, Yau neke Iry a kutanuk I ti e ne, neke Yaw ne, desikemo ei ne ana myaty myor wasimy lim o sal miala desikre bo.”
25 Dendye iry manety lulw desikre rena Yesuske ma rbohe, “Kali O neke, esei O de?”
Lemade Yesuske hyalas sir ma byohe, “Lulswoke klwosu nam ribun a kihali tenakw neke ti e de. Dendye mbyuma klwosu nam sai huruk ti e de? 26 Ode wasimy ktela ribun ne bisa ma ktwanuk ma ana kal ma kukun a e. Keskyede lenla kala nam desy, de nam ana kala ma kutanuk ti nuske ktem ne, neke cuma mo nam kutomolu toha Amakw a maaso Yaw ne nam itanukare bo. Ode nam itanukare mlay.”
27 Keskyede iry desikre lema rhe ohe, nam Yesuske itanuk desikre, neke tyanuk Ama o wen sra eraske ma desy.
28 *Lemadendye Yesuske tyanuk ti iry desikre ma byohe, “Kolnye ana kyoat ei neke msyalak Irkye Ananke† bai akwe ktutuke ma atatat I de, desikeo nenmo ana mhye ohe, Yau neke Iry a mikita ne I desy. Ode ana mhye ohe lema kala namke it dakun ma ktyoha kubuke, de musti mo nam kuala nekre ktyoha Amaku ibuke bo. Kali nam kutanuk nekre mumu ne ktyoha nam iajar ma Yaure. 29 Ode Amakw maaso Yaw neke I ne inonor a Yaw ne. Ode lema lyura Yaw ma kmwesan, kali sew kyaki nekre nam kuala nekre mumu ne ktyoha nam ibuare bo.”
Nam a mlay Hulasokwe iajarare kyaditi irire toha wait lim o sal
30 Kyoat Yesuske itanuk ktela desikre mumu bonyo iry a Yahudi-nare ribun a rtohak ti I. 31 Dendye Yesuske tyanuk ti iry Yahudi matohak ti I desikre ma byohe, “Kolnye ei neke mimorif kyaki-kyaki ne mtyoha nam kuajar ti e desikre, desikemo ei neke iry matoha Yaw nekre ei ne bain. 32 Ode ei neke ana mhye nam a mlay Hulasokwe iajarare. Ode nam a mlay iajar desikre ana kyaditi e ma lema mika at ti nuske ktem ne de.”†
33 *Lemade iry desikre rtanuk ti Yesuske ma rbohe, “Aramy neke Abraham tesnwo natu aramy, ode aramy ne dakun o lenla aramy mika at ti irkye it elik! Ode kyanmwane mutanuk ma mubohe, ‘Ana lema mika at ti nuske ktem ne de?’ ”
34 Dendye Yesuske tyanuk ti sir ma byohe, “Mtyomolu mamak nam kutanuk ne! Esei desike yala lim o sal, desikeo ika at ti lim o sal ma desy. 35 Ode atke lema bisa ma imin ti wasi amam lanke wasi sekye kralake nini nam, de amam lanke ananke myesan a imin ti amam lan desike wasi sekye krala desy nini nam bo. 36 Lemadendye kolnye Hulasokwe Ananke yaditi e toha lim o sal de, desikeo mlay bain-bain o yaditi e ma lema mika at ti lim o sal ma desy.”
Abraham tesnwo natu lema matohak ti Hulasokwe
37 Dendye Yesuske syaur tun itanukke huruk ma byohe, “Ode khwe ohe, ei neke Abraham tesnwo natu e, keskyede myalkyaw e ma mtyabahunw a Yaw, kali lema mlyura ma tunakure kimin ti ralami kralanare. 38 Ode nam sai Amaku yala ma ksweak de, desike ne kutanuk ne. Klala ei ne mtyoha nam a amamkye iajar ti eare bo.”
39 Lemade iry desikre† rhalas Yesuske ma rbohe, “Ara amamkye i ne Abraham!”
Dendye Yesuske tyanuk ti sir ma byohe, “Lema! Kali kolnye ei neke Abraham anan a e bain-bain, desikemo kyaki-kyaki ne ana mkyarya karya Abraham ikaryaare dakun. 40 Keskyede nam mikaryake ne: myalkyaw e ma mtyabahunw a Yaw, biar ma Yau neke ktwanuk a ktela mlaire ti e, neke ktela mlay kutomolu toha Hulasokwe ne. Ode Abraham neke lema elik ma yala ktela maola miala desy! 41 Keskyede kete theran, kali tetap ma myala nam a amamkye ialanare bo.”
Kyoat iry desikre ratomolu Yesuske ma itanuk koldyesy bonyo, rhalas Yesuske ma rbohe, “Hei! Aramy neke lema naman ana let aramy, de ara amamkye sasasam bo, neke Hulasokwe myesan bo.”
42 Lemadendye Yesuske tyanuk ti sir huruk ma byohe, “Kolnye mlay bain o amamy a Hulasokwe, desikemo ana mlyobak a Yaw, kali Yau neke kbwetik kosy a Hulasokwe. Ode kuma ne dakun o lema ktyoha kubuke, de kyosy Amakw maaso Yaw ne ibuke. 43 Ode kyanmwane lema mhye nam kutanuk nekre kbuanare ne de? Lema mhye kali ei neke lema myou ma mtyomolu nam kuajarare. 44 Kali ei neke ngkeskwaure wait uskwe khatuke anan e, ma mdyakin ma mtyoha ktela atyat ialanare ma myala dakun. Ode kyala kyosy khyehyeike ngkeskwaure wait uskwe khatu ne i ne itabahunw a irire ne, ode imnisik nam a mlaire, kali nam a mlaire lema kimin ti ralake kralake elik. Ode tyanuk kakmetke kmyesan bo, kali totanare desy. Kali i neke kakmetke kusno ktem kimin i. Ode kakmet ribun lan mamin nuske ktem ne mumu ne, neke kyosy a i. 45 Dendye ei ne lema myou elik ma mtyohak nam kutanuk ti eare, kali nam kutanuk desikre mlay. 46 Lemade ti ei ne mumu ne, bisa ma irkye it a syusu ohe, Yau neke kala lim o sal e? Yau neke ktwanuk a nam a mlaire, ode kyanmwane lema mitohak ma Yaw ne de? 47 Lemadendye kolnye esei desike Hulasokwe anan a i, desikemo kyaki-kyaki ne dyakin ma tyomolu Hulasokwe tunanare. Klala ei neke lema Hulasokwe anan a e, dendye lema mdyakin ma mtyomolu Hulasokwe tunanare.”
Abraham lenla imin bonyo Yesuske imin a kmuna de
48 Lemadendye iry Yahudi a lema raou ti Yesuske ne rtoran Yesuske ma rbohe, “Kolnye aramine mitanuk ma mbyohe, Oi neke iry a Samaria O† ma ngkeskwakwe syukar a O de, desikeo lema sal aramy o de?”
49 Dendye Yesuske hyalas iry desikre ma byohe, “Lema koldyesy! Yau neke ngkeskwakwe lema syukar Yaw. De Yau neke kalan Amakw, klala ei neke lema myalan a Yaw. 50 Ode Yau neke lema kobak ma irire ralan Yaw. Keskyede Hulasokwe byuma musti mo irire ralan Yaw, ode I ne ana yukun tun ti irkye. 51 Dendye mtyomolu mamak nam kutanuk ne: iry a matomolu tun kutanukare ode itoha ne, i desike ana lema myaty, de myorif nini nam!”
52 Lemade iry desikre rtanuk ti Yesuske ma rbohe, “Senweke ara mhye ohe, Oi ne ngkeskwakwe syukar a O! Kali Abraham a myaty de, kola ne iry manety Hulasokwe wasi nyanoare o ramaty dakun ne. Keskyede mtwanuk ma mbwohe, ‘Iry a matomolu tun kutanukare ode tyoha, i desike ana lema myaty de myorif nini nam.’ 53 Keskye the ohe ara musumy Abraham yor iry manety Hulasokwe wasi nyanoare rmaty, ode Oi neke mrwekan o esei O de? Mrwekan ohe lan a O ma mbwilak a ara musumy Abraham ne e?”
54 Lemadendye Yesuske tyanuk ti iry desikre ma byohe, “Kolnye kmwesan a klweru Anikkwe, desikeo lema kika kbuan ma Yaw. De Amakw a miabuk o Hulasow a misakitil ode miou ti I neke, I ne ileru Yaw ne. 55 Keskyede ei neke lema mhye I, klala Yau ne khwe I. Ode kolnye ktwanuk ma kbwohe, lema khwe I, desikeo kukakmet kola e dakun ma desy. Keskyede Yau ne khwe I, ode ktwoha tunanare. 56 Ode amamy Abraham neke byuma yatos sew a kuma ne ma kdi ti. Ode kyoat Abraham yatos sew a kuma desike kdi ti de, desikeo ktela desike kyala ralake ma ksyenan a ksyalik.”
57 Lemade iry desikre rtanuk ti Yesuske ma rbohe, “Wasimw ainke lenla kyait hean-sim dakun, dendye kolkyabei mane bisa ma mtwanuk ma mbwohe muatos Abraham ne de?”
58 Dendye Yesuske tyanuk ti sir ma byohe, “Mtyomolu mamak tun kutanuk nekre, kyoat lenla radur ti Abraham bonyo, YANWE kumin de.”†
59 Lemade iry desikre ratomolu Yesuske ma itanuk koldyesy bonyo, ral hature ma rala ma ratdya I. Keskyede Yesuske itina tenanke, ode lyakut ba ma tyutuk lakhidik iry desikre ti kintal Hulasokwe Sei desy.