Yesuske yala iry matmabol a kyala kyosy radur ti ike ma eras i
9
Ode kyoat Yesuske yor wasi matoha Iare rlakut ma rba, desikeo yatos wamwankye it ma matanare kbyol kyala kyosy radur ti ike de. 2 Dendye Yesuske wasi matoha Iare rena I ma rbohe, “Tuanggurw, esei ne iala lim o sal mane, kihury ma radur ti iry ne o matanare kibol ne de? Neke kyosy a wasi lim o sal ialake kmyesan ta, kete kyosy a lim o sal ena o ama-na raala-nare de?”3 Lemade Yesuske hyalas sir ma byohe, “Iry desike matanare kibol ne lema khyali wasi lim o sal, ode lema khyali ena o ama-na wait lim o sal dakun, de Hulasokwe yala koldyesy mamode irire bisa ma ratos Hulasokwe wasi haretke ma kkyarya ti iry a matmabol desy. 4 Lemade ity neke musti mo tkarya Iry a maaso Yaw ne wasi karyaare ti msarin a nggora ne, kali ana sewahke kmya, desikeo lema bisa ma tkarya de. 5 *Kali Yau ne madelaf a Yaw, ode kyoat kumin ti nuske ktem ne a nggora, desikeo Yau ne kudelaf a iry a mamin ti nuske ktem ne ralat a kralanare ne.”
6 Kyoat Yesuske itanuk koldyesy maktei bonyo, iniw ei lasmyerke, ode iswail wasi iniw desy kyor a lasmyerke ma kola ne wekat ne, maktei o yal wekat desy ma kyasa ti iry matmabol desike matanare, 7 ode tyanuk ti iry desy ma byohe, “Mbwai wer ratutur ma kani Siloamke, ma ti mut matamure ti wer so.”
Siloam ne kbuanke o, “Iry a raasoke.” Lemade iry desike bya ti yut matanare ti wer ratutur a Siloam desy, maktei o yulak i bonyo myatakit elik de.
8 Ode kyoat iry matmabol desike yulak i bai wait sekye, desikeo wait serkyaitare ror iry mahe i o matanare kibol ode iten nam ne, it de yena it ma rbohe, “De lema iry ne i ne matanare kibol ode iten nam ne e?”
9 Ode dum a rtanuk ma rbohe, “Mlay, iry ne i ne de.”
Klala dum a rbohe, “Lema i, de iry neke yola i.”
Dendye iry dai matmabol desike byohe, “Mlay, yaw ne.”
10 Lemade iry desikre rtanuk ti i de rbohe, “Ode kolkyabei mane bisa ma mumatakit ne de?”
11 Dendye iry matmabol dai desike hyalas iry desikre ma byohe, “Irkye it ma ani Yesus, I ne iala matakure ma eras ne. Neke iniw ei lasmyerke, ode iswail iniwan desy kyor lasmyerke ma kola wekat ne, maktei o yal wekat desy ma kyasa ti matakure. Maktei o yaso yaw ma kbwa ti kut matakure ti wer ratutur a Siloamke. Ode kyoat kut matakure maktei bonyo kmwatakit elik!”
12 Lemade iry desikre rena i de rbohe, “Mane iry desike imin o ka?”
Desikeo iry matmabol dai desike hyalas sir ma byohe, “Lema khwe.”
13 Lemade iry desikre ror iry matmabol dai desy ba ti iry manosy lui Farisi-nare. 14 Kali kyoat sew a Yesuske ihora lasmyerke kyor iniwanke, ma ikasa ti iry matmabol dai desy matanare ma imatakit ne, desikeo ti sew Inamreske ma desy. 15 Lemade iry a Farisi desikre dakun o rena iry desy ma rbohe, “Kolkyabei mane mumatakit ne de?”
Dendye iry desike hyalas sir ma byohe, “Irkye it ma ihora iniwanke kyor lasmyerke ma kola wekat ne, maktei o yal wekat desy ma kyasa ti matakure, ode yaso yaw ma kbwa ti kut matakure bonyo kmwatakit elik mane!”
16 Lemade iry a Farisi desikre dum a rtanuk ma rbohe, “Iry maala iry matmabol neke matanare ne, I desike lema elik ma iry a Hulasokwe iasoke, kali tnyetak Musake kbyohe, ‘Ti sew a Inamreske mo lema kika makarya ti sew desy.’ Keskye Iry desike kyarya ti sew Inamreske bo.”
Klala dum a rtanuk ma rbohe, “Keskye kolkyabei mane iry a maka wasi lim o salke bisa ma yala nyatos masalsyalik i maoly desy ne de?”
Ma ktela desike ne khyury ma iry manosy lui Farisi desikre it de syorw sala it.
17 Maktei o iry a Farisi desikre rena iry matmabol dai desy de rbohe, “Ktyoha o mo Iry a maala o ma mumatakit desike esei bain de?”
Lemade iry matmabol dai desike hyalas sir ma byohe, “I desike, iry manety Hulasokwe wasi nyanoke it desy.”
18 Keskyede iry a manety lulw ti Yahudi desikre rabrai ma rtohak ohe iry matmabol dai desike bain-bain o kola matanare kbyol, ode senwe nenmo myatakit ma ne. Dendye raso ma rabuk ena o ama, 19 ma rena sir ma rbohe, “Anamkye i ne bain e? Ode mlay bain o kyoat radur ti i o matanare kbyol e? Dendye kolkyabei mane bisa ma imatakit ne de?”
20 Lemade iry matmabol dai desike ena o ama-na rhalas iry manety lulw ti Yahudi desikre ma rbohe, “Ara anamkye i ne bain, ma kyoat aramy midur ti i o matanare kbyol de. 21 Keskyede ktela madi ti i ma imatakit ne, neke lema aramy mhye. Ode iry maala i ma imatakit ne, lema aramy mhye I dakun. Ode ara anamy ne lan a i dakun de ma hye toha lbweta de, dendye myena i ma ihes ti e bo!”
22 Iry matmabol dai desike ena-na yor ama de rtanuk koldyesy, kali ramtaut iry manety lulw ti Yahudi-nare, kali iry desikre rohut ti sasam de ma rbohe, “Esei desike you ohe Yesus ne Mesias I,† desikemo iry desike lema bisa ma syukar ei Yahudi-nare wait sey rasambayan tiare de.” 23 Desike ne kihury ma ena-na yor ama de rtanuk ma rabohe, “Ara anamy ne lan a i de, dendye myena i bo.”
24 Lemadendye iry manety lulw ti Yahudi desikre, rabuk iry matmabol dai desy huruk ma rtanuk ti i ma rbohe, “Mal Hulasokwe Anike ma muhwab ohe, nam mutanuk desike mlay! Kali aramy mhye ohe, iry desike iry a lim o sal I.”
25 Dendye iry matmabol dai desike hyalas iry desikre ma byohe, “Lema khwe o iry desike yala lim o sal ta lema, de kuheke kyalake matakure kbyol ma lema kmwatakit, keskye senweke kmwatakit de!”
26 Lemade iry desikre rena iry matmabol dai desy huruk ma rbohe, “Neke yala o kolkyabei mane mumatakit ne de?”
27 Lemade iry matmabol dai desike hyalas sir ma byohe, “Hei, dai ktwanuk ti e de, keskyede lema mbyuma mtyomolu. Ode kyanmwane miena huruk ne de? Ta ei ne mbyuma iry desike wasi matoha e dakun de?”
28 Keskyede iry desikre rahmwai iry matmabol dai desy ma rtanuk ti i ma rbohe, “Hei, oi neke mtwoha iry desy, klala aramy neke aramy mtyoha Musa. 29 Kali aramy neke mhye ohe, Hulasokwe itun a yor Musa elik, klala iry desike lema aramy mhye ohe, wasi haretke kyosy kabei.”
30 Lemade iry matmabol dai desike hyalas iry desikre ma byohe, “Khweran a ksyalik, kolnye mbyohe lema mhye ohe iry desike wasi haretke kyosy kabei! Keskye bisa ma mhye ohe I ne iala matakure ma bisa ma kumatakit ne. 31 Keskyede the ohe Hulasokwe lema tyomolu iry maka wait lim o sal nekre wait sambayanare. De iry a maalan Hulasokwe, ode ratoha tunanare ne, sir desike ne Hulasokwe hyalas wait sambayanare ne. 32 Kali kyala kyosy khyehyeike ti kyoat Hulasokwe yala nuske ktem ne, desikeo lenla ttomolu irkye it elik, ma bisa ma yala iry a kyoat radur ti i o matanare kibol kola yaw ne, ma myatakit elik. 33 Keskyede kolnye iry desike Hulasokwe lema yaso I, desikemo I desike lema bisa ma yala namit-namit.”
34 Kyoat iry matmabol dai desike itanuk koldyesy maktei bonyo, iry desikre rtanuk ti i ma rbohe, “Hei, oi neke kyoat enamu idur ti o bonyo wasimw lim o sal ribun de, ode kyanmwane mrwekan o bisa ma muajar aramy ne de?”
Lemade iry desikre rtian lakhidik iry matmabol dai desike ei mloskye, ode rbu eta i ma lema syukar ei Yahudi-nare sey rasambayan tiare dakun de.
Iry a lema mahe Hulasokwe rola ne iry matmabolke
35 Ode kyoat Yesuske itomolu ohe, iry manety lulw ti Yahudi-nare rbu eta iry matmabol dai desy ma lema syukar Yahudi-nare sey rasambayan tiare de, desikeo Yesuske bya ti yobak iry matmabol dai desy ma yait i, ode tyanuk ti i de byohe, “Mtwohak ti Irkye Ananke ta lema de?”†
36 Keskye iry matmabol dai desike hyalas Yesuske ma byohe, “Amo, esei I de? Mlwosu iry desy ma yaw, ma bisa ma ktwohak ti I.”
37 Lemade Yesuske tyanuk ti iry matmabol dai desy ma byohe, “Oi neke matos I de. I ne itun a yor o ne a nde.”
38 Lemade iry matmabol dai desike hyalas Yesuske ma byohe, “Ktwohak ti Ebukw a O ne!” Lemade iry matmabol dai desike syakitil ode you ti Yesuske.
39 Lemade Yesuske tyanuk ti iry matmabol dai desy ma byohe, “Hulasokwe ana yukun irkye kali kmwai nuske ktem ne de.† Kumai nuske ktem ne ma iry a matmabolke bisa ma myatakit, klala iry a mabohe mamatakitke ana matake kbyol ma lema myatakit de.”†
40 Keskyede iry manosy lui Farisi mamin ti desike dum a ratomolu Yesuske ma itanuk koldyesy bonyo, rena I ma rbohe, “Mtwanuk koldyesy kali mrwekan mo aramy matamire kbyol ma lema aramy mhye namit-namit dakun e?”
41 Lemadendye Yesuske tyanuk ti sir ma byohe, “Kolnye myou ma mbyohe matamire kbyol, desikemo Hulasokwe lema yukun e ti khyali wasimy lim o sal. Keskyede kali mtyanuk ma mbyohe mmyatakit, desikeo Hulasokwe ana yukun e ti khyali wasimy lim o sal.”