Yesuske ihliak tunke ti tenanke ohe I neke majaga eras dombake
10
Lemade Yesuske tyanuk ti iry ribun mamin ti desike huruk ma byohe, “Mtyomolu mamak nam kutanuk ne! Esei desike syukar ei dombanare wait oke, keskyede lema syukar yosy a oke wasi holholatke, de syai yosy a oke wasi hakarke ma syukar ei o desy kralake, desikeo iry desike iry a manametke i desy, dete lemamo iry a manal resake ma isoruk nam ne i desy. 2 Klala esei desike syukar yosy a oke wasi holholatke, desikeo i desike domba desikre wait iry majaga sirke i desy. 3 Dendye iry majaga holholatke kmata desike ana lyakat holholatke ti majaga domba desy. Ode kyoat majaga domba desike yabuk wasi domba desikre it o it ne ma ktyoha anitare, desikeo domba desikre ratomolu ral telake bonyo, rba ti rait a i ma yeuk sir ma rbai mloskye. 4 Ode kyoat majaga domba desike yeuk wasi domba desikre mumu ei mloskye, desikeo majaga domba desike lyakut a myuna, ode wasi dombanare rtoha i, kali domba desikre rtomolu ral telake de. 5 Keskye kolnye iry salikke it a yabuk domba desikre, desikeo domba desikre lema rtoha i, de ra-la ma soso sir toha iry desy, kali tel maabuk sir desike ksyalik i ti domba desikre wait majaga sirke telake.”6 Yesuske ihes tun inahliak desy ti iry desikre, keskyede iry desikre lema rhe tun inahliak desike kbuanare. 7 Lemade Yesuske tyanuk ti sir huruk ma byohe, “Mtyomolu mamak nam kutanuk ne! Yau neke keluk holholat a domba desikre wait oke. 8 Dendye iry a ramaa kmuna Yaw nekre, ma rabohe sir neke majaga domba sir, iry desikre iry a manametare sir desy, dete lemamo iry a manal resatare ma rasoruk nam ne sir desy. Keskyede domba desikre lema rbuma rtomolu sir, kali lema rhe iry desikre, kali telatare ksyalik a i. 9 Nde. Yau neke keluk holholatke, dendye esekar ne rsukar rosy a holholat ne, desikeo ana kaorif a sir. Ode ana kujaga sir ma rsukar de rbetik rosy holholat ne, ma rba ti ratot wen a tnyeinare kituhw tiare, ma kyeluk kotw ma ra. 10 Keskyede manametke mya, cuma mo mya ma inamet, ode tyabahunw iry, ode iskyui-iskyay namit-namit. Klala Yau neke, kmwa ma kala irire ma rmorif eras, ode kal mauskwe ti sir dakun.
11 Yau neke majaga domba eras Yaw. Ode majaga domba eraske, I neke yal tenanke ma myaty eta wasi dombanare. 12 Klala iry makarya ma iobak a ksewanke ne, i neke lema majaga domba i, ode lema wasi domba desikre dakun. Dendye kolnye yatos asw utanke ma mya, desikeo tyutuk lakhidik domba desikre, ode ila toha wen desy. Lemade asw utan desike mya ma kyuty o hyehar a domba desikre, ma khyury ma domba desikre raskyui-raskyay toha wen desy. 13 Ode iry makarya desike ila ma tyutuk lakhidik domba desikre, kali ryekan o i neke cuma mo iry makarya i bo, dendye lema syeak mamak domba desikre.
14 Klala Yau neke majaga domba eras Yaw, ma khwe wasikw dombanare, ode wasikw dombanare rhe Yaw. 15 Kola ne Amaku hye Yaw, ode khwe Amakw. Ode Yaw dakun o ana kal tenakkwe ma kmwaty eta wasikw domba desikre. 16 Ode wasikw domba salik ramin dakun,† keskye lenla keuk sir mai oke krala ne ma ramin ti, ma ror wasikw domba ida nekre ti wen sasamke. Lemade musti mo keuk domba salik desikre mai oke krala ne dakun. Ana rtomolu ral telakkwe dakun. Ode wasikw domba salik desikre ana rawahuk sir a ror wasikw domba ida nekre ma raka lui ma lui sasam sir, ode wait majagake sasasam a I bo, neke Yaw.
Dombanare ramin ti wait oke kralake (10:1)
17 Dendye Amaku lyobak Yaw, kali kal tenakkwe ma kmwaty eta wasikw domba nekre, mamode ana kmworif huruk. 18 Ode lema irkye it a bisa ma tyabahunw a Yaw, de kmwesan a klwura tenakkwe ti iry syalik ma rtabahunw a Yaw. Ode Yau ne kmwesan a wasikw haretke ma bisa ma klwura tenakkwe ma kmwaty, ode Yau neke wasikw haretke dakun ma kmwesan a kala tenakkwe ma kmyorif huruk. Neke Amaku yaso Yaw ma kala koldyesy.”
19 Kyoat iry Yahudi desikre ratomolu ma Yesuske itanuk koldyesy bonyo, it de yal it huruk 20 ma dum a rtanuk de rbohe, “Hei! Kete mtyomolu iry mahukat desy, kali ngkeskwakwe syukar a I de.”
21 Klala iry desikre dum a rhalas iry matun desikre ma rbohe, “Nam mitanuk desikre lema mlay, kali kolnye ngkeskwakwe syukar iry desy, desikemo lema bisa ma itun koldyesy! Ode lema bisa ma ngkeskwakwe yala iry matmabolke ma myatakit dakun kola iry desy.”
Iry manety lulw ti Yahudi-nare lema rou Yesuske
22 Ode lema soso bonyo oras a mrinke kyait de. Ode sew lan a Rsaa Sen ti Hulasokwe Seike ne kdi ti Yerusalem, ma iry Yahudi-nare rala kalkal inaknamke, ma ral ma rnenas a kyoat a heitlulswo rasaa sen ti Hulasokwe Seike ne.† Kyoat desike dakun o Yesuske imin ti Yerusalem, 23 ma malmata lyakut ti Baranda Salomoke ti Hulasokwe Seike. 24 Dendye iry Yahudi-nare dum a rma ma rkoal eta Yesuske, ode rtanuk ti I ma rbohe, “Hekyabei o mlwosu ma aramy ohe, esei O de, ma kete ara ralamire kakan! Ode kolnye Oi neke Mesias O,† desikemo mlwosu elik ma aramy, ma aramy mhye.”
25 Lemade Yesuske hyalas sir ma byohe, “Ktwanuk ti e de, keskyede lema mtyohak ma Yaw. Ode Yau ne kal Amaku wasi haretke,† ma kala ktela masalsyalik iare, ma ksyusu ti e ohe, esei Yaw. 26 Keskyede ei neke lema mbyuma mtyohak, kali ei neke lema wasikw domba e. 27 Wasikw dombanare rtomolu telakkwe, ode khwe wasikw dombanare, ode rtoha Yaw. 28 Ode ana matmyaty manal nini namke lema kena sir, de Yau neke kal mormyorif manal nini namke ti sir, ode lema irkye it a bisa ma isoruk yal sir toha simakkwe kralake elik. 29 Kali Amaku yal sir ma Yaw de, ode Amaku wasi haretke lan ma kbyilak kabei ta kabei bo, dendye lema irkye it a bisa ma isoruk yal sir toha Amaku simake kralake elik. 30 Yau ne kor Amakw ne nam sasam aramy bo.”
31 Lemade iry Yahudi desikre ral hature huruk ma ral ma rala ma ratdya a rhunw a Yesuske. 32 Dendye Yesuske tyanuk ti sir ma byohe, “Kala nyatos masalsyalik iare ribun ti e ma myatos de, kali Amaku yaso Yaw ma kala. Dendye nyatos masalsyalik kabei ne kihury ma myala ma miatdya mihunw a Yaw ne de?”
33 *Lemade iry desikre rhalas Yesuske ma rbohe, “Aramy miatdya O neke lema kali kyosy a ktela eras muala desikre, de kyosy a ktela mukanak Hulasokwe ne. Kali Oi neke iry a O bo, keskye mala tenamkwe ma mais kola Hulasokwe.”
34 Dendye Yesuske hyalas iry desikre ma byohe, “Keskye the ohe, rkesy ti wasimy Kitab Lanke ma klyosu ohe, Hulasokwe tyanuk ti irire ma byohe, ‘Ei neke, hulasow a e.’* 35 Ode the ohe Hulasokwe tunanare lema bisa ma kihihi i. Dendye kolnye Hulasokwe byohe, iry a ratomolu tunanare ne, sir ne, hulasow a sir, 36 dendye kyanmwane mibohe kukanak Hulasokwe, ti khyali kubohe, Hulasokwe Anan Yau ne! Kali Yau neke Amaku myesan yilik Yaw, ode yaso Yaw ma kmwai nuske ktem ne mane. 37 Dendye kolnye lema kala nyatos masalsyalik i a Amaku iaso ma kuala nekre, desikemo kete mtyohak ma Yaw. 38 Klala kolnye kala nyatos masalsyalik i a Amaku iaso ma kuala nekre, desikemo mtyohak ti nam kuala desikre, biar ma lema mtyohak ma Yaw. Ode kolnye mtyohak ti nam kuala desikre, desikeo ana bisa ma mhye bain-bain ohe, Amaku imin ti Yaw, ode Yaw neke kumin ti Amakw.”
39 Kyoat iry desikre ratomolu ma Yesuske itanuk koldyesy bonyo, robak a ksala huruk ma bisa ma rkumak I, keskyede lema bisa, kali Yesuske lyakut ma isia I ti sir ma lyakut ba, ode tyutuk lakhidik sir ti desy.
Yesuske imin ti sah Yordanke seridake
40 *Maktei o Yesuske yulak I huruk ma byai sah Yordanke seridake ti imin ti, neke wen heit a Yohanes ibabtis irire tike. 41 Ode iry ribunke rma ma rait Yesuske ti wen desy, ode it de tyanuk ti it ma rbohe, “Yohanes lema yala nyatos masalik ike it elik, keskyede nam ribun a Yohanes itanuk a khyali Iry ne, neke mlay ksyalik.”
42 Dendye ti wen desike irire ribun a rtohak ti Yesuske.