Lazarus a myaty maktei o myorif huruk
11
1-2 *O a hnu Betaniake neke wamwankye it ma ani a Lazarus. Lazarus neke kluruk i ma wasi kbaike mdedan a ksyalik ma yala ma myaty. Ma myorif yor rahyetake enaru ti hnu desy, ma rahyeta deru neke it a ani Maria, ode it a ani Marta. *Ma Maria neke, i ne ana ialik nul mahona mtelaske ti ity Ebut Yesuske lwaunare ne, maktei o inal hukake ma ikur ne. 3 Dendye Lazarus rahyeta deru desike rano kita Yesuske ma rbohe, “Ebo, ara naramy Lazarus a mulobak neke kluruk i ma wasi kbaike mdedan a ksyalik.”4 Kyoat Yesuske itomolu nyano desike bonyo tyanuk ma byohe, “Lazarus wasi kbai desike ana lema ktyabahunw a i. Keskye ktela desike kdi ti, ma ksyusu ohe Hulasokwe wasi haretke lan a ksyalik. Ode khyali ktela madi ti desy, desikeo ana irire rleru Hulasokwe Ananke.”
5 Ode Yesuske lyobak Maria yor wai Marta rtabal narat Lazarus ne bain-bain. 6 Keskyede kyoat Yesuske itomolu o Lazarus kluruk i desy bonyo, lema yalurw ma bya, de imin ti sah Yordanke seridake, neke sekwe enaru huruk. 7 Ode sew deru desike kyelak eta bonyo, nenmo Yesuske tyanuk ti wasi matoha Iare ma byohe, “Mmya ma tulak ity bai propinsi Yudeake.”
8 Dendye wasi matoha Iare rhalas I ma rbohe, “Tuanggurw, nenmo sekwe enai ne kyelak eta neke iry manety lulw ti Yahudi-nare ral hature ma rala ma ratdya a rhunw a O o so, ode kyanmwane mubuma tulak ity bai so huruk ne de?”
9 Lemade Yesuske tyanuk ma byohe, “De lema ti sekwe sasam ne, sekwe syon jamke hean a kresi enaru e? Ma kolnye iry a malakut ti msarinke, desikeo ana lema itunas, kali madelaf kidelaf ti nuske ktem ne kyadelaf salke ti i. 10 Klala iry malakut ti kelerakokke, desikeo ana itunas, kali lema kika madelaf ma bisa ma yatos salke ma lyakut ti.”
11 Maktei o Yesuske tyanuk ti wasi matoha Iare huruk ma byohe, “Ity wait Lazarus neke i desi yenaf, dendye ana kbwa ti kswabyatar a i.”
12 Dendye Yesuske wasi matoha Iare rtanuk ti I ma rbohe, “Amam Lan O, kolnye Lazarus i desi yenaf bo, desike eras kali ana lema soso bonyo eras a i de.”
13 Yesuske wasi matoha Iare rtanuk koldyesy kali rrekan o tun Yesuske itanuk desike kbuanke ohe, Lazarus neke yenaf kola kyalamo raenaf bony ne. Keskye tun Yesuske itanuk desike kbuanke o Lazarus neke myaty de.
14 Lemadendye Yesuske tyanuk ma syisy hela ti sir ma byohe, “Lazarus neke myaty de. 15 Keskyede eras ti e ti khyali Lazarus imaty o lema kumin o so ne. Ode ana mtyohak ma Yaw ma kbyilak, kali ktela desike kdi ti de. Lemade senweke, mmya ma tba ti tseak Lazarus.”
16 Lemade Tomas a kyalamo rahaly a anike o Didimus ne,† neke Yesuske wasi matoha Ike it ne dakun, ma tyanuk ti lianare ma byohe, “Mmya ma ttoha Tuanggurkwe ma tba, ma biar ma myaty, desikeo tmaty tor a I dakun!”
17 Kyoat Yesuske yor wasi matoha Iare ranait hnu Betaniake bonyo, irire rlosu ti Yesuske ma rbohe, “Lazarus myaty de, ma ti ramlin a i ti bobke kuranke sekwe enaat mane de.”
18 Hnu Betania neke knyey a Yerusalem, ma anakyai kasonanakke kiloke enatelw. 19 Lemade irire ribun a rosy Yerusalem ma rmai Betania ma raluka Marta yor Maria khyali naratke ti imaty ne. 20 Ode kyoat Marta itomolu ma Yesuske ima bonyo, bya ti yait Yesuske, klala Maria imin ti sekye kralake bo. 21 Lemade Marta tyanuk ti Yesuske ma byohe, “Amam Lan O, kolnye mumin ma mor aramy ti ne bo, desikemo naraku lema myaty. 22 Ode biar ma koldyesy, keskye senweke khwe ohe, kolnye muten nam sai ta sai toha Hulasokwe, desikeo ana yal nam muten desike ti O.”
23 Lemade Yesuske tyanuk ti Marta de byohe, “Marta, naramu ana myorif huruk.”
24 Dendye Marta tyanuk ti Yesuske ma byohe, “Khwe ohe ana naraku myorif huruk yor irire mumu, ti sew a nuske ktem ne ana kilodur ne, neke sew a Hulasokwe ana iukun irkye ne.”
25 Lemade Yesuske hyalas i ma byohe, “Yau neke kmwesan a kala mamatire ma rmorif huruk, ode kmwesan a kal mormyorif manal nini namke ti irkye. Lemadendye esei desike tyohak ma Yaw, desikeo ana myorif nini nam, biar ma myaty dakun de. 26 Ode esei ta esei bo ma imorif ne mo tyohak ma Yaw, desikeo ana matmyaty manal nini namke lema kena i de. Dendye Marta o, mtwohak ktela kutanuk ne ta lema de?”
27 Lemade Marta hyalas Yesuske ma byohe, “Ou, Amam Lan O! Ktwohak ohe Oi neke Mesias O, neke iry a Hulasokwe isusu ma muka Raja ode muaorif irkye ne, ode Hulasokwe Anan O, ode Oi ne Iry a aramy mikita ma ana imai nuske ktem ne, Oi ne.”
28 Ode Marta itanuk koldyesy maktei bonyo, yulak i bai wait sekye ma yabuk wai Maria ma tyanuk kakakan ti i ma byohe, “Tuanggurkwe mya de, ma yabuk a o. I ne yala ma yait hnuke mane.”
29 Ode Maria itomolu tun desike bonyo, byitil i ma lyahlaha mirin ma bya ti yait Yesuske. 30 Keskyede kyoat desike Yesuske lenla syukar ei hnu Betaniake kralake, de imin ti wen a dai Marta itun a yor I tike a nggora. 31 Kyoat iry a rama ma raaluka Maria desike raatos ma Maria ibitil i ma lyahlaha mirin ma iba bonyo, iry desikre ramlurw de rtoha i, kali rrekan o Maria yala ma bya ti syer o ratkye. 32 Ode kyoat Maria inait wen a Yesuske imin tike, ma iatos Yesuske bonyo, syakitil ti Yesuske wasi lulululw ne, ode tyanuk ma byohe, “Amam Lan O, kolnye mumin ma mor aramy ti ne, desikemo naraku lema myaty.”
33 Ode kyoat Yesuske yatos Maria ma syer, ktyabal iry manor i desikre ma rser a ror i dakun, desikeo khyury ma Yesuske ralake ksyal a ksyalik. Lemade tyanuk ti Maria ma byohe, 34 “Ti wen kabei ne miamlin naramw ti ne de?”
Lemade iry desikre rhalas Yesuske ma rbohe, “Amam Lan O, mmwa ma ti matos!”
35 Kyoat Yesuske itomolu koldyesy bonyo syer. 36 Lemade iry desikre it de tyanuk ti it ma rbohe, “Myatos, lyobak Lazarus bain-bain!”
37 Keskyede ti iry desikre dum a rtanuk ma rbohe, “Iry neke I ne iala iry matmabolke ma imatakit ne, ode kyanmwane lema bisa ma yala Lazarus ma kete imaty ne de?”
38 Ode kyoat inait Lazarus wasi asake, desikeo Yesuske ralake ktyabal ma ksyal huruk. Asa neke bobke kuranke ma ramlin Lazarus ti, ode ral hatw lan ne ma rkahat eta bobke kuran desy. 39 Lemade Yesuske tyanuk ma byohe, “Mlyilik hatw a kieteta bobke kuran desike ei kserike.”
Keskye Lazarus rahyeta Marta ne hyalas Yesuske ma byohe, “Amam Lan O, naraku myaty ma ramlin i sekwe enaat de, ma tbunanke khyon de!”
40 Lemade Yesuske tyanuk ti Marta ma byohe, “Ktwanuk ti o deny ohe, kolnye mtwohak ma Yaw, desikeo ana matos ohe Hulasokwe wasi haretke lan a ksyalik!”
41 Lemadendye iry desikre rlilik hatw desy ei kserike. Maktei o Yesuske yatnyarak ei laitke ode tyanuk ma byohe, “Amo, kswalak eraske ba ti O, kali Oi neke mtwomolu wasikw sambayan ne de. 42 Ode khwe deny ohe kyaki-kyaki ne Oi neke mtwomolu Yaw, keskyede iry ribun mamdiry ma rakoal Yaw neke lenla rhe. Lemade ktwanuk kolnye ma rtomolu ode rtohak ohe, Oi ne muaso Yaw ne.”
43 Kyoat Yesuske itanuk koldyesy maktei bonyo, yatela ma telake lan ma byohe, “Lazarus, mbwetik mai mlosy san!”
44 Kyala mait bonyo Lazarus byetik toha wasi asa desike ma myai mloskye. Keskyede kain lenan malilikwe khyul eta sima o lwau nekre a nggora, ode kain ranal ma rakahat eta uno mata ne dakun o, kyeteta uno mata nggora. Lemade Yesuske tyanuk ti iry mamin ti desikre ma byohe, “Myaditi kain desikre ba, ode mlyura i ma lyakut ba.”
Iry manety lulw ti Yahudi-nare rtanuk maiske ma robak a ksala ma rtabahunw a Yesuske
45 Lemadendye ti iry a Yahudi rama ma raaluka Maria ti rala masalke desy, sir ne ratos ktela masalsyalik i a Yesuske iala desike bonyo, ribun a rtohak ti Yesuske elik. 46 Klala ti iry desikre dum a lema rtohak, dendye rba ti rahes ktela Yesuske iala desike ti iry manosy lui Farisi-nare. 47 Lemadendye iry a Farisi desikre, rtabal iry mabaa klen ti irkye yor Hulasokwe ne wait usu khatunare, neke rabuk Iry Lan Maohut Tun ti Yahudi-nare, ma rawahuk sir ma rtanuk ti sir ma rbohe, “Ana tala iry ne kolkya? Mane iry neke yala ktela ribun masalsyalik iare mane o de! 48 Ode kolnye tlura iry neke ma yala kolnye bo, desikemo ana irire ribun a rtohak ti I. Ma khyury ma Mahareta Romawike ana rma ma raskyui-raskyay ity wait Hulasokwe Sei ne, ode raskyui-raskyay ity wait bangsa Yahudi ne dakun!”
49 Keskye irkye it ma ani Kayafas, neke iry mabaa klen lan lahuk ti irkye yor Hulasokwe ti ainke krala desy, neke tyanuk ma byohe, “Ei neke lema mhye namit-namit! 50 Ode lema mhye ohe, lemamo iry sasam neke myaty ma yeluk iry ribunke ma kete rmaty. Kali kolnye iry desike lema myaty, desikeo ana khyury ma suldat Romawi-nare rma ma rtabahunw a ity wait bangsa Yahudi ne ma tmaty mumu.”
51 Ode Kayafas tun itanuk desike, neke lema kyosy a tenanke kmyesan, de i neke iry mabaa klen lan lahuk ti irkye yor Hulasokwe ti ainke krala desy, dendye i neke Hulasokwe syusu i ma tyanuk de byohe, “Yesuske ana myaty ma yeluk ity wait bangsa Yahudi ne.” 52 Ode Yesuske imaty ne, lema myaty ma yeluk bangsa Yahudi desy kmyesan bo, de myaty ma yeluk Hulasokwe wasi iry mamin ti wen kabei ta kabei bo, ti nuske ktem ne mumu, ma ana yeti yahuk sir ma rety ral sasamke.
53 Lemadendye kyala kyosy sew desy, iry manety lulw ti Yahudi desikre rtanuk maiske ma musti mo rtabahunw a Yesuske. 54 Lemadendye Yesuske lema syusu I ti iry ribunke de. De byetik toha nus Yerusalem desy ma byai hnuke it ma kani Efraim, neke knyey a wen malosy-loskye, ma yor wasi matoha Iare ramin ti desy.
55 Ode kyoat iry Yahudi-nare wait sew lan Paskahke kyarasy de,† desikeo iry ribunke rosy a wait nus o hnu nekre, ma rbai Yerusalem ti rtoha ktela raala tenatare ma nelnyely ne, mamode bisa ma rtoha sew lan Paskah desy. 56 Ode kyoat iry ribun desikre rawahuk sir ti kintal Hulasokwe Seike, desikeo rseak robak Yesuske, keskye lema rmatakit I, dendye it de tyanuk ti it ma rbohe, “Mryekan kolkya? Iry neke ana lema mya ma tyoha Sew Lan ne e?”
57 Kyoat desy dakun o iry manosy lui Farisi-nare, ror iry mabaa klen ti irkye yor Hulasokwe ne wait usu khatunare, ral haretke ma kolnye esei desike hye ohe Yesuske imin ti kabei, desikeo musti mo mya ma lyosu ti sir, ma ti rkumak a I.