Yesuske nyoha kbaike toha irkye it ti sew Inamreske ti wer ratuturke it ma kani Betesdake
5
Kyoat Yesuske nyoha iry lan makarya ti raja Herodes desike ananke wasi kbaike ma eras i bonyo,
Yesuske byetik toha propinsi Galileake,
ma yulak I bai nus Yerusalemke,
ma tyoha Yahudi-nare wait sew lanke it huruk.
2 Ti nus Yerusalem desike wer ratuturke it a kimin ti nus desy,
ma knyey a nus desike wasi lorkye kmatake it.
Ma lory ne kani Lory a Dombake.
Ode wer ratutur desike ti tel Ibranike desikeo kani Betesda,
ode wer ratutur desike wasi barandake enasim.
3 Ode ti baranda desikre rulik iry isy masunure ribun sir ti desy.
Neke iry a matmabol o,
mahau sir o,
iry mablukut nekre,
[ma rakita wer mamin ti wer ratutur desy ma kiwaway.
4 Kali seure rait o,
nyaso manosy laitke yorw ei wer ratutur desike kralake ma iwawai wer desy ma kiwaway,
ma kolnye iry isy masunw desikre it a yorw kmuna ei wer ratuturke krala desy,
ti kyoat wer desike kiwaway ne,
desikeo wasi kbaike kitayar ma eras i elik.]
5 Ti desy dakun o wamwany mablukutke it ma isike ksunw ainke hean-telw kresi walw de (38).
6 Ode kyoat Yesuske yatos iry desy,
ode hye o iry desike isike ksunw soso de,
lemade Yesuske yena i ma byohe,
“Wai,
mou ma eras o e?”
7 Lemade iry desike hyalas Yesuske ma byohe,
“Amam Lan O!
Kou ma eras yaw,
keskye lema kika iry manauk yaw ei wer ratuturke krala desy,
ti kyoat wasi wer desike kiwaway a nggora ne.
Ode kolnye kala ma korw ei wer ratutur desy,
desikeo irire rmuna yaw de,
ma rorw ei wer ratutur desy.”
8 Lemade Yesuske tyanuk ti iry desy ma byohe,
“Desikemo mumdiry,
ode mal wasimw kwarkye,
ode mlwakut ma mbwa!”
9 Kyoat Yesuske itanuk koldyesy maktei bonyo,
iry desike eras a i elik.
Lemade imdiry,
ode yal wasi kwarkye,
ode lyakut ma bya.
Keskye ktela desike kdi ti ti sew Inamreske.
10 *Dendye iry manety lulw ti Yahudi-nare rtanuk ti iry a nenmo eras a i desy ma rbohe,
“Hei!
Senweke sew Inamreske ne,
dendye lema bisa ma mhwar wasimw kwarkye ma mlwakut ba.
Kali ktyoha ity wait kubkubakke mo,
irire lema bisa ma rkarya namit-namit ti sew Inamreske.”
11 Keskyede iry desike hyalas iry manety lulw desikre ma byohe,
“Iry dai manoha wasikw kbaike ma eras yaw ne,
neke byu ma yaw de byohe,
‘Mal wasimw kwarkye,
ode mlwakut ba.’ ”
12 Lemade iry desikre rena i ma rbohe,
“Esei ne iaso o ma munal wasimw kwarkye ma mulakut ba ne de?”
13 Keskyede iry a nenmo eras a i desike lema hye ohe,
esei ne iala wasi kbaike ma eras a i ne,
kali irire ribun sir ti wen desy,
ode Yesuske o bya de,
ma iry desike lema myatakit I de.
14 Ode lema soso bonyo,
Yesuske yait iry desike huruk ti kintal Hulasokwe Seike.
Lemade tyanuk ti iry desy ma byohe,
“Senweke eras o de.
Lemade kete mala lim o sal de,
ma kete kyal nini masunkwe kdyan owo lan ma kbyilak wasimw kbai dai desy.”
15 Lemade iry desike byetik ma ti ihes ti iry manety lulw ti Yahudi-nare ma byohe,
“Yesuske I ne inoha wasikw kbaike ma eras a yaw ne.”
16 Lemade iry manety lulw ti Yahudi desikre nenmo raway ma rsorw a Yesuske,
ma robak a ksala ma rkordalam a I,†
kali nyoha irire wait a kbainare ti sew Inamreske ma eras a sir.
17 Keskyede Yesuske tyanuk ti iry manety lulw ti Yahudi desikre ma byohe,
“Amaku kyarya ti sew nekre mumu,
ma ti kyait senwe mane,
biar ma sew a Inamreske dakun.
Lemade Yaw dakun o kkwarya ti sew nekre mumu dakun.”
18 Lemade iry manety lulw ti Yahudi-nare ralkyaw sir ma rtabahunw a Yesuske,
neke ti khyali Yesuske ibilak wait ktela kubkubakke,
ti kibu eta ma kete kika iry a makarya ti sew Inamreske ne.
Ode lema desy bo,
de ti khyali Yesuske ibohe,
Ama-na I ne Hulasokwe dakun ne.
Kali nam itanuk desy ksyusu ohe,
Yesuske yala tenanke kola Hulasokwe dakun ma desy.
Yesuske lyosu ohe I neke Hulasokwe Anan a I
19 Lemadendye Yesuske tyanuk ti iry desikre ma byohe,
“Mtyomolu mamak nam kutanuk ne.
Yaw ne Hulasokwe Anan Yaw.
Dendye kuala namare ne lema ktyoha kubuke,
de kolnye ksweak Amakw ma yala nam sai desy,
desikeo musti mo ksweak toha ma kala dakun.
20 Kali Amaku lyobak Anan Yaw ne,
ode syusu nam iala nekre mumu ti Anan Yaw kmwesan bo.
Ode Amaku ana syusu ma Yaw,
ma ana kkwarya wasi karya lan nekre,
ma kbyilak nam nenmo kukarya desy dakun.
Ma kolnye myatos,
desikeo mhyeran.
21 Kali Amaku yala iry mamatire ma rmorif huruk,
kola ne Yaw dakun ma ana kala iry mamaty a kuilik nekre ma rmorif huruk.
22 Ode Amaku lema yukun irkye it dakun,
de yal haret ukun nekre mumu ma Anan Yaw ne de.
23 Mamode irire mumu ne ralan Anan Yaw ne,
kola ne raalan Amakw ne.
Kali kolnye esei desike lema yalan Hulasokwe Ananke,
desikeo i desike lema yalan Amakw maaso Yaw ne dakun.
24 Lemade mtyomolu mamak nam kutanuk ne.
Esei desike tyomolu tun kutanuk nekre,
ode tyohak ti Amakw Hulasow a maaso Yaw ne,
desikeo i desike ana myorif nini nam ti kiba knaru ne.
Ode i desike ana ukunke lema kdyan i dakun.
Kali i desike Hulasokwe yaditi i toha matmyatkye,
ma yal i ei mormyorif manal nini namke de.
25 Ode mtyomolu mamak nam kutanuk ne.
Iry a lema ratohak ti Hulasokwe ne,
neke rola dene iry mamatire de.
Keskye ana kyait sekwe,
ode sew desike kyait dakun de,
ma iry a maola mamaty desikre sir ne mumu ne ana rtomolu Hulasokwe Anan Yaw ne telakkwe.
Ode esei desike tyomolu telakkwe ode tyoha nam kutanuk desy,
desikeo ana myorif nini nam.
26 Kali kola dene mormyorifke kimin Amakw,
ma yala irkye ma myorif.
Ode koldyesy dakun o,
yal wasi haret desy ma Anan a Yaw ne,
ma mormyorifke kimin a Yaw dakun,
ma kala irkye ma myorif dakun.
27 Ode Amaku yal wasi haretke ma Anan Yaw ne,
ma kukun tun ti irkye,
kali Yaw neke Irkye Anan Yaw dakun.
28 Lemadendye kete mhyeran ti nam kutanuk desy.
Kali ana kyait sekwe bonyo,
iry mamatire mumu ne ana rtomolu Hulasokwe Anan Yaw ne telakkwe.
29 *Dendye iry a ramorif mo raala ktela erasare ne,
neke ana rbetik toha wait asa ramlin sir tiare,
ma kala sir ma rmorif nini nam.
Klala iry a ramorif mo raala ktela atyatare ne,
neke ana rbetik toha wait asa ramlin sir tiare dakun,
ma kukun sir.
30 Ode kala namit-namit neke lema kyosy a kmwesan kubuke bo.
De kolnye kukun irkye,
desikeo ktyoha nam kutomolu toha Amakw Hulasokwe ne.
Dendye kuukun tun ti irkye ne mlay,
kali lema ktwoha kubuke,
ode lema kuseak mat,
de ktwoha Amakw maaso Yaw ne ibuke.
31 Ode Yaw neke kolnye kmwesan a kuhes tenakkwe bo,
desikemo anakyai irire ana lema rtohak ohe nam kuhesare mlay.
32 Keskyede irkye it a ihes Yaw ti e dakun.
Iry desike Amakw Hulasokwe I desy.
Ode khwe ohe nam ihes ti e ti kihali Yaw desike mlay.
33 *Ode ei ne dakun o myaso irire ma ti rena Yohanes Mababtiske,
ti khyali Yaw.
Ode nam itanuk a khyali Yaw desikre mumu ne mlay dakun.
34 Yaw ne lema kobak ma irkye ihes Yaw ti e,
ma iry desike byohe nam kutanukare mlay.
De ktwanuk koldyesy kali kbwuma ei neke mtyohak nam Yohanes itanukare,
ti kihali Yaw ne,
mamode ei neke mtyohak ti Hulasokwe,
ma ana Hulasokwe yaorif a e.
35 Kali kyoat Yohanes yor a e,
desikeo yola damarke ma kdyelaf ode knyely,
ma mdyakin ma mimin ti wasi madelaf desy,
ma mtyomolu nam itanukare.
Keskye lema soso bonyo lema mdyakin ma mtyomolu i huruk.
36 Keskyede nam kuala nekre eras,
ode kika kbuan ma kbyilak nam Yohanes itanuk ti kihali Yaw ne.
Kutanukke kbuanke o,
nam kutanukare ode nyatos masalsyalik i a kualanare,
neke kala ma mhye o esei ne Yaw ne.
Kali Amaku yaso Yaw ma kkwarya wasi karya desikre.
Ode wasi karya kukarya desikre klyosu ohe,
Amaku yaso Yaw ma kmwai ne mane.
37 *Ode Amakw maaso Yaw ne,
I neke ihes Yaw ti e dakun.
Keskye ei neke lema mtyomolu telake,
ode lema myatakit matake dakun.
38 Ode tunanare dakun o lema kmyon ti ralamy kralanare,
kali lema mbyuma mtyohak ma Yaw a Iry a Hulasokwe iaso ma kuma ti e ne.
39 Ode ei ne dakun o mbyaca Kitab Lanke ma mbyihy mamamak nam rakesy ti krala desy,
kali mryekan ohe Kitab Lan desike kyety mormyorif manal nini namke ti e.
Keskyede lema mhye ohe,
Kitab Lan desike kisike mumu ne klyosu Yaw ma desy.
40 Keskyede ei ne mibrai ma mmya ma myait Yaw,
mamode kal mormyorif manal nini namke ti e.
41 Ode Yaw ne dakun o lema kobak ma irkye yalan Yaw.
42 Kali khwe e de,
neke khwe ohe ei neke lema myal ralamy kralanare tebibikan dakun ti Hulasokwe.
43 Yaw neke Amaku yaso Yaw ma kmwaa kor wasi haretke,
keskyede lema myou ma myal Yaw.
Klala iry salikare rmaa ror wait haret mesmesan-are,
desikeo myou ma myal sir.
44 *Ode ei ne myobak ma iry salik a ralan e,
ode myalan sir dakun.
Klala lema mbyuma myobak ma Hulasow sasasam ne yalan e.
Koldyesike mane lema bisa ma mitohak ma Yaw ne.
45 Biar ma koldyesy keskye kete mryekan ohe,
ana koit salke ti e ti Amaku wasi lulululw ne.
Lema.
De ana iry maoit salke ti e neke Musa,
i ne mimea ti i ne.
46 Kali kolnye mtyohak ti nam Musa ikeskye bain-bain,
desikemo ana mtyohak elik ma Yaw dakun.
Kali Musa kyesy nam ribun lan ne ti Kitab Lanke ne,
neke klyosu Yaw ma desy.
47 Keskyede ei ne lema mtyohak ti nam Musa ikesy nekre,
dendye ana kolkyabei ma bisa ma mtyohak ti nam kutanukare de?”