Kalkal lan insake o hnu Kanake
2
Kyoat Yesuske yilik Natanael yor Filipus ma rtoha I,
ma sekwe enaru a kyelak eta bonyo,
kalkal lan insake it a kdi ti o hnu Kanake,
ti propinsi Galileake.
Kyoat desy o Yesuske ena-na tyoha kalkal desy dakun.
2 Ode kalkalke kebu desike nyot a Yesuske yor wasi matoha Iare dakun,
ma ti rtoha kalkal desy.
3 Kyoat kalkal desike klyakut,
desikeo hinat tasy maiskye kwen makitkye ktei,
lemade Yesuske ena-na tyanuk ti Yesuske ma byohe,
“Toto,
kalkal neke hinat tasy maiskye kwen makitkye ktei de.”
4 Dendye Yesuske hyalas ena ma byohe,
“Eno,
kyanmwane mulosu ma yaw ne de?
Lenla kyait wasikw sekwe ma klwosu Yaw ti irire.”
5 Keskyede Yesuske ena-na tyanuk ti kalkal desike wasi makaryaare ma byohe,
“Kolnye Yesuske tyanuk sai ti e,
desikeo mtyoha ma myala kola nam itanukke.”
6 Ode ti desike lkuskye nem,†
ma kyalamo rtutuk ti desy ma ral wer ti.
Kali ktyoha Yahudi-nare wait ktela kubkubakke,
ma musti mo ral wer desikre ma rut simat o lwaut ma nelnyely.
Lkusy desikre lan,
ma bisa ma ralik werke anakyai literke atw (100) ti lkuskye sasam.
7 Lemade Yesuske tyanuk ti makarya desikre ma byohe,
“Myalik werke ti lkusy desikre ma kbyenw.”
Dendye makarya desikre rtoha ma ralik wer ti lkusy desikre nini kbyenw.
8 Maktei bonyo Yesuske tyanuk ti sir huruk ma byohe,
“Mbyay a werke tebikan toha lkusy desy it,
ode myety ba ti kalkalke kebu desy ma tyeman aduk.”
Dendye makarya desikre rbay a werke tebikan toha lkuskye it,
ma rety ba ti kalkalke kebu desy.
9 Kyoat kalkalke kebu desike iteman wer desy bonyo,
wer desike kihihi i ma ktyoy tasy maiskye kwen makitkye de.
Keskye lema hye ohe,
tasy maiskye kwen desike kyosy kabei.
Klala makarya desikre rhe tasy maiskye kwen desike kinoskye.
Lemadendye kalkal desy kebuke yabuk wamwany masa desy,
10 ode tyanuk ti wamwany masa desy de byohe,
“Kyalamo ti kalkalare mo irire rlik tasy maiskye kwen makity eraske a kmuna,
ma irire renw ma kinanal sir maktei bonyo,
nenmo rlik tasy maiskye kwen makity lema eraske.
Klala oke lema!
De mswosan tasy maiskye kwen makity eras ne nini jam ne mane!”
11 Ktela masalsyalik i neke Yesuske yala ti hnu Kanake o propinsi Galileake.
Ode ktela masalsyalik i neke nyatos a Yesuske iala kmuna ma ksyusu wasi haret lan ne ode wasi madelaf lan ne.
Ode wasi matoha Iare rtohak ti I.
12 *Maktei o Yesuske byai hnu Kapernaumke,
neke bya o yor ena,
ode wainare,
ode wasi matoha Iare,
ma ramin ti desike sekwe enai ne.
Yesuske yesak iry maketa nam ti kintal Hulasokwe Seike
13 *Kyoat Yahudi-nare wait sew lan Paskahke kyarasy bonyo,
Yesuske byai nus lan Yerusalemke.†
14 Ode ti kintal Hulasokwe Seike,
Yesuske yatos iry maketa saby o,
domba o,
manu hahy nekre ti desy.
Ode yatos iry maliku kuban nekre ma rtaklulw ti desy dakun.†
15 Kyoat Yesuske iatos ktela desikre bonyo,
tyalik taskye ma kola obobanke,
ma yal ma yesak biby o saby o,
iry maliku kuban desikre toha kintal Hulasokwe Sei desy.
Ode hyau balik meja raliku kuban tike,
ma kuban o nam ribun desikre kiskyui-kiskyay ti desy.
16 Maktei o tyanuk ti iry a maketa manu hahy desikre ma byohe,
“Myaditi lakhidik wasimy namit-namit toha ne!
Kete myal Amakw wasi Sekye ti kindika wen raketa nam tike.”
17 Kyoat Yesuske itanuk koldyesy bonyo,
wasi matoha Iare rnenas ral mait nam irire rakesy ti Kitab Lanke ti kibohe,
“Hulasow O,
klwobak Seimkwe a ksyalik.
Ma wasikw kulobak ne kola ne kkwoman mo kele rorif akye ti ralakkwe krala ne,
ma khyury ma ana kbya nini irire rtabahunw Yaw khyali.”*
Yesuske yesak iry maketa namare toha kintal Hulasokwe Seike (Yoh. 2:15)
18 Lemadendye usu khatu Yahudi-nare rterik Yesuske ma rbohe,
“Hei!
Mala sai ne de?
Musti mo mala ktela masalsyalik ike it ma aramy myatos,
ma klyosu ohe,
mlay bain o,
Oi ne haretke kimin a O ma mesak irire toha wen ne.”
19 *Lemade Yesuske hyalas a sir ma byohe,
“Miskyaik Hulasokwe Sei ne,
ode ana sekwe enatelw o kswadiri de.”
20 Desike bonyo rbu ti I de rbohe,
“Akwa,
ainke hean-at a kresi nem neke (46) irire rsadiri Hulasokwe Sei ne,
ode ohe Oi neke mbwohe bisa ma mswadiri ti sekwe enatelw bony e?
Ara lema mtyohak!”
21 Keskyede usu khatu Yahudi desikre lema rhe tun Yesuske itanuk desy kbuanke,
kali Yesuske ihliak Hulasokwe Seike ti tenanke ma desy.
22 Lemadendye kyoat Yesuske imaty maktei o imorif huruk toha iry mamatire bonyo,
wasi matoha Iare nenmo rnenas ral mait tunke khatu itanuk desy.
Dendye khyury ma wait tohtohakke ktyabal ma rtohak ti nam rakesy ti Kitab Lanke kralake ne,
ode ti tun a Yesuske itanukare dakun.
Yesuske hye irkye ralake kralake
23 Ode almatmata sew lan Paskahke kdi ti,
desikeo Yesuske imin o Yerusalem a nggora.
Ode irire ratos Yesuske ma yala nyatos masalsyalik iare,
ma khyury ma ribun sir a rtohak ti I.
24 Keskyede Yesuske lema tyohak sir,
kali hye ralat a kralanare de.
25 Ode Yesuske lema ikita ma irkye it a lyosu irire totatare ti kolkyabei ne ti I,
kali I neke hye irire ralat a kralanare mumu de.