Brit Eras
Yohanes
ikeskye
Kristus neke Hulasokwe Tuna mamorifke
1
*Kyala kyosy khyehyeike ma lait o lasmyer ne lenla kimin,
desikeo Hulasokwe Tuna neke imin de.
Tuna neke yor Hulasokwe,
ode Tuna neke Hulasokwe I desy.†
2 Ma kyala kyosy khyehyeike I neke yor Hulasokwe de.
3 Ode Hulasokwe yal Tuna desy ma yal ma yala nam ribun nekre mumu.
Ode kolnye Tuna desike lema imin,
desikeo nam ribun lan iala nekre lema bisa ma kimin dakun.
4 Tuna desike I ne inal mormyorifke ti nam mamorif nekre mumu,
ode wasi mormyorifke kyety madelafke ti irire mumu.
5 Ma madelaf desike kdyelaf ti kelerakokke,
ode kelerakok desike lema bisa ma khyareta kyal madelaf desy.
6 *Lemade Hulasokwe yaso irkye it,
neke ani Yohanes,†
7 ma Yohanes neke i ne ima ma yabrita madelaf desy ti irire ne,
ma irire mumu ne bisa ma rtomolu ma rtohak.
8 Ode madelaf desike lema Yohanes,
de Yohanes neke i ne iabrita madelaf desy ti irire ne.
9 Klala Iry a madelaf desike madelaf a I bain-bain.
Ode myai nuske ktem ne.
I neke dyelaf irire mumu.
10 Ode I neke myai nuske ktem a iala ne,
keskye nuske ktem neke lema rhe o ese I elik.
11 Ode I ne mya ma yait wasi bangsake,†
keskye wasi bangsake lema rou ma ral I.
12 Klala iry manal I ode ratohak ti I neke,
yal hakke ti sir,
ma sir neke ana Hulasokwe anan a sir.
13 Ode iry a Hulasokwe inal sir ma anan a sir neke,
lema khyali irkye idur hahak a sir ne,
ta lemamo khyali saw o lay rabuma raka anat ne,
de Hulasokwe myesan yala sir ma anan a sir.
14 Hulasokwe Tuna neke mya kola irkye ne,
ma myorif yor ity ti nuske ktem ne,
ode tatos wasi haretke ode wasi madelafke de.
Ode Ama-na yal haret o madelaf desy ti I,
kali I neke Hulasokwe Anan sasasam I.
Ode Hulasokwe amlaike ode rala eraske kimin ti Ananke ma kbyenw a I.
15 Lemade Yohanes yabrita I ti irire ma byohe,
“Iry neke,
I ne kutanuk I ti e ne,
ma kbwohe,
‘Ana irkye it a myaa yosy lyakwe,
keskyede lan a I ma byilak yaw,
kali lenla kumin,
desikeo I neke imin a kmuna de.’ ”
16 Ode kali Hulasokwe rala eraske kbyenw a I,
dendye kyaki-kyaki ne I neke yal wasi eras mauskwe ma ity.
17 Hulasokwe wasi tnyetak inal ma ity ne,
neke kyosy Musa.
Keskyede Hulasokwe amlaike,
ode rala eras inal ma ity ne,
neke kyosy Yesus Kristuske.
18 Ode lema irkye it a myatakit Hulasokwe elik,
de lenla Anan sasasam mamin ti Ama-na riha neke,
I ne ilosu Hulasokwe ma ity ne.
Yohanes lyosu tenanke ode ihes Iry a ana mama ne
19 Sekwe it bonyo,
iry a manety lulw ti Yahudi mamin ti nus Yerusalemke raso iry mabaa klen ti irkye yor Hulasokwe,
ror iry a Lewi-nare† ma rba ti rseak Yohanes,
ma rena i ma rbohe,
“Yohanes o,
esei o bain de?”
20 Dendye Yohanes tyanuk soru ti sir ma byohe,
“Yaw neke lema Mesias yaw.”†
21 Desikeo rena i huruk ma rbohe,
“Koldyesikemo esei o de?
Oi neke Elia o e?Ӡ
Bonyo Yohanes hyalas sir de byohe,
“Lema.”
Dendye rena i huruk de rbohe,
“Ta oi neke Iry a manety Hulasokwe wasi nyano a takita ma ana ima ne,
oi ne e?”*
Desikeo hyalas sir ma byohe,
“Lema dakun.”
22 “Koldyesikemo mlwosu ma aramy ohe,
esei o bain de?
Kali musti mo aramy neke mhye o esei o,
mamode aramy mbya o mlyosu ti iry a maaso aramy ne.”
23 Lemadendye Yohanes hyalas sir ma byohe,
“Yaw ne kuatelakw ti wen malosy-loskye ma kubohe,
‘Msyoli salke ode myaklol ma mlol,
ma kikita ity Ebutke.’*
Ma kola Yesaya iry manety Hulasokwe wasi nyanoke ikesy ti wasi kitabke ne.”
24 Ode ti iry a raaso desikre neke irkye enai ne iry manosy lui Farisi sir,
25 ma rena Yohanes de rbohe,
“Kolnye oi neke lema Mesias o,
ode lema Elia o,
ode lema Hulasokwe wasi manety nyano o,
ode kyanmwane mubabtis a irire ne de?”
26 Lemade Yohanes hyalas sir ma byohe,
“Yaw neke kbwabtis irire kyor werke bo,
keskye irkye it ne imdiry ti wasimy a kditlalan ne,
keskye lema mhye I.
27 Iry neke kmwaa kmuna I,
keskye yaw neke lema kbwer o ktwahal ma kaka wasi dori-na ktasinare dakun.”
28 Ktela raena Yohanes desike kdi ti o hnu Betaniake,
ma kimin ti sah Yordanke kseri timurke,
ma sah desike ne Yohanes ibabtis irire ti ne.
Yohanes lyosu ohe Yesus neke Hulasokwe wasi Dombake Ananke
29 Bolbolke bonyo Yohanes yatos Yesuske ma mya ma yait a i,
lemade tyanuk ti iry ribun desikre ma byohe,
“Myatos!
I neke Hulasokwe wasi Dombake Anan I,
ma mya ma syos ribun lan mamin ti nuske ktem neke wait lim o sal ba.†
30 Iry ne kola klwosu I ti e de,
ma kbwohe,
‘Kmwaa kmuna I ode Ia myaa yosy lyakwe,
keskyede lan I ma byilak yaw,
kali lenla kumin,
desikeo I neke imin a kmuna de.’
31 Khyehyei desike lenla khwe I,
keskyede Hulasokwe yaso yaw ma kmwaa kmuna I ma kbwabtis irire kyor werke,
ma Israel-are bisa ma rhe I ohe,
I neke Mesias I,
neke Iry a Hulasokwe isusu ma ika Raja ode iaorif irkye ne.”
32 Yohanes dakun o yabrita nam iatoske ma byohe,
“Katos Hulasokwe Memeanke ma kola ne manu hahkye,
ma kyorw toha wen sra eraske ti I,
ma kimin a I.
33 Kyoat desikeo lenla khwe o esei ne.
Keskyede kyoat Hulasokwe yaso yaw ma kbwabtis irire kyor werke,
desikeo lyosu ma yaw dakun ohe,
‘Kolnye matos Hulasokwe Memeanke ma kyorw ei irkye it,
ma kimin ti iry desy,
desikemo iry desike I ne ana ibabtis irire kyor Hulasokwe Memeanke ne.’
34 Ode iry desike katos I de,
ode I ne kutanuk ma kubohe,
Hulasokwe Ananke I ne.”
Yesuske wasi matoha I mamunake
35 Ode bolbolke bonyo,
Yohanes yor wasi matoha ike enaru,
ma ramdiry ti wen desy huruk.
36 Ode kyoat Yohanes imatakit a Yesuske ma ilakut yosy desy bonyo,
tyanuk ti sir ma byohe,
“Myatos!
Hulasokwe wasi Dombake Anan neke I desy.”
37 Kyoat iry deru matoha Yohanes desike ratomolu ma Yohanes itanuk ti sir koldyesy bonyo,
deruke rba ti rtoha Yesuske.
38 Ode Yesuske yulak matake ei lyakwe bonyo,
yatos o iry deru desike rtoha I.
Lemade yena sir de byohe,
“Miobak sai ne de?”
Bonyo deruke rhalas Yesuske de rbohe,
“Rabi,
mumin o ka?”
(Rabi neke kbuanke o tuanggurw.)
39 Dendye Yesuske hyalas sir ma byohe,
“Mmya ma tba ti mmyesan a myatos bo.”
Dendye iry deru desike ror Yesuske ma rba ti ratos wen imin tike.
Kyoat desike kyoban enaat ti seswery ne.
Ode ror I ti desike nini sewah.
40 Iry deru matomolu nam Yohanes itanuk desy,
ma raba ti ratoha Yesuske ne,
it a ani Andreas,
neke Simon Petrus wai i.
41 Ode kyoat iry deru desy rulak sir toha wen Yesuske imin tike bonyo,
Andreas lyaha mirin ma ti yobak wai Simon,
ma lyosu ti i de byohe,
“Wai!
Aramy minal a myor Mesiaske de.”
(Mesias neke kbuanke o Kristuske.†)
42 Dendye Andreas yor wai Simon ma rba ti rait Yesuske.
Desikeo Yesuske yatos manenen Simon,
ode tyanuk ma byohe,
“Oi ne Simon.
Ode amamw ani Yohanes.
Keskyede ana rhaly animkwe o Kefas.”
(Kefas neke Petrus ani seridake desy,
neke kbuanke o,
hatw lan mambwakarke.†)
Yesuske yabuk Filipus ode Natanael
43 Bolbolke bonyo Yesuske yohut ma byai propinsi Galileake.
Ode ti desike Yesuske inal a yor Filipus bonyo,
tyanuk ti i de byohe,
“Mmwa ma mtwoha Yaw!”
44 Filipus neke yosy a hnu Betsaidake,
neke Andreas ode Petrus wait a hnuke dakun.
45 Ode Yesuske itanuk ti Filipus maktei bonyo,
Filipus a bya ti yobak Natanael,
ma inait i bonyo,
tyanuk ti i de byohe,
“Aramy minal a myor Iry a Musa ode iry a manety Hulasokwe wasi nyanoare rakesy I ti wait kitabare ne.
I neke Yesuske,
ma Yusuf anan a I,
ma yosy a hnu Nazaretke.”
46 Lemade Natanael tyanuk ma byohe,
“Yosy Nazaret e?!
Bisa ma nam eraske kyosy hnu kakan maoly desy e?!”
47 Dendye Filipus tyanuk ti Natanael ma byohe,
“Ana tba,
ode matos bo!”
Lemade deruke rba ti rait Yesuske.
Ode kyoat Yesuske yatos Natanael bonyo,
tyanuk ma byohe,
“Myatos iry ne!
Khwe ohe iry neke iry a Israel i bain-bain.
Ode lema ikakmet elik.”
48 Lemade Natanael tyanuk ti Yesuske ma byohe,
“Kyosy kabei ne muhe yaw ne de?”
Desikeo Yesuske hyalas i ma byohe,
“Kyoat Filipus lenla yabuk a o,
desikeo katos o a kmuna ti aw arake kusu desy de.”
49 Lemade Natanael tyanuk ma byohe,
“Tuanggurw,
Oi neke Hulasokwe Anan O!
Ma Oi neke muka Raja ti Israel-are.”
50 Dendye Yesuske hyalas i ma byohe,
“Wah!
Cuma mo khyali kutanuk ohe,
‘Kuatos o ti aw arake kusuke’ ne,
desikeo mtwohak ma Yaw elik e?
Keskye klwosu ti o ohe,
ana matos ktela lan lahukare ma kbyilak ktela ne dakun.”
51 *Lemade Yesuske tyanuk ti sir ma byohe,
“Mtyomolu mamak nam kutanuk ne!
Ana myatos laitke ma kimlakat,
ode ana myatos Hulasokwe wasi nyaso manosy laitare ma rorw de rsai ti Irkye Ananke.Ӡ