Brit Eras
Markus
ikeskye
Brit a Yohanes Mababtiske
1
Waikw o hatnimakw e,
Brit Eras mamunake ne,
neke kihes a Yesus Kristus Hulasokwe Anan ne.
Markus 1:1-13
2 *Brit Eras neke heitlulswo Hulasokwe wasi manety nyano Yesaya neke kyesy ti wasi kitabke ohe,
Hulasokwe byohe:
“Myatos,
kaso wasikw nyasoke ma myuna O,
ma bya ti syoli salke ma kikita O;
3 *ode yatela ti wen malosy-loskye de byohe,
‘Msyoli salke ode myaklol ma mlol,
ma kikita ity Ebutke.’ ”
4 Lemadendye kmya ma nenmo taras neke,
iry a Hulasokwe iaso desy,
neke ani Yohanes.
Dendye Yohanes byai wen malosy-loskye,
ode yatela ma byohe,
“Mtyunik totamy atyat manety lim o sal desikre ba,
ode mmya ma rbabtis e,
ma Hulasokwe syos salamire ba.”
Yohanes byai wen malosy-loskye (1:4)
5 Dendye iry mamin ti propinsi Yudeake ktem desy mumu,
ode iry mamin ti nus Yerusalemke ktem desy mumu dakun ne,†
rba ti rlosu wait lim o sal,
ma Yohanes byabtis sir ti sah Yordanke.
6 *Yohanes neke hyonak rabit narnarw ratenkwe,
neke ral toha untake husike,
ode wasi kosarke kyosy a heal a iblutare,
ode kotw inanare neke larihke ktyabal maduke.
7 Maktei o Yohanes tyanuk huruk ma byohe,
“Iry a ana mama neke lan lahuk I ma byilak yaw,
ma yaw ne lema kbwer o ktwahal ma kaka wasi dori-na ktasinare dakun.
8 Ode yaw neke kbwabtis e a kyor werke ma kyabetar iblumire bo,
klala Iry ana mama neke ana byabtis e a kyor Hulasokwe Memeanke!”
Yohanes byabtis Yesuske
9 Kyoat Yohanes byabtis irire,
desikeo Yesuske yosy a hnu Nazaretke o propinsi Galileake,
ma mya ma Yohanes byabtis I ma hyuhuk I ti sah Yordanke.
10 Ode kyoat Yesuske byitil I,
desikeo yatos elik ma laitke kimlakat,
ode Hulasokwe Memeanke kyorw ti I,
neke kola ne manu hahkye inem ma ituny a I ne.
11 *Ode Hulasokwe telake kbyetik kyosy laitke ma kbyohe,
“Oi neke Anakw a O,
ma klwobak a O,
ode kou O ti ralakkwe.”
Ngkeskwaure wait uskwe khatuke hyury a Yesuske
12 Kyoat Yesuske rbabtis I maktei bonyo,
Hulasokwe Memeanke kyeuk I elik bai wen malosy-loskye.
13 Ode kyoat ti wen malosy-losy desy,
Yesuske yor heal mahatw nekre ti desy,
ode ngkeskwaure wait uskwe khatuke hyury a I nini sekwe hean-at.
Keskye Hulasokwe wasi nyasoare rosy laitke ma rma ma rsaluk I.
Yesuske hyatuk wasi karyake ti propinsi Galileake
14 Kyoat Yohanes rkumak i,
ma rluk i ei sey metmetke kralake,
desikeo Yesuske byai propinsi Galileake,
ti yabrita Brit Eras manosy Hulasokwe ti so,
Markus 1:14-45
15 *ma byohe,
“Sew a Hulasokwe mya ma hyareta kola Rajake ne kyarasy de.
Lemade mtyunik totamy atyat manety lim o sal desikre ba,
ode mtyohak Brit Eras manosy Hulasokwe.”
Iry matunik darkye yulak i ma idary a irkye
16 Ode Yesuske lyakut ti Tasi Kakan Galileake kserike,
desikeo yatos Simon yor wai Andreas,
ma malmata rtunik wait darkye ti tasi kakan desy,
kali sir neke iry maka tasi sir.
17 Lemade Yesuske tyanuk ti sir ma byohe,
“Mmya ma mtyoha Yaw.
Kali ana kajar e ma mlyuy dary ti irkye.”
18 Lemadendye rtutuk elik wait darire,
ode rtoha Yesuske.
Rtutuk elik wait darire ma rtoha Yesuske (1:18)
19 Maktei o Yesuske syaur wasi laklakutke tebikan ei lulkwe huruk,
desikeo yatos Yakobus yor wai Yohanes,
neke Zebedeus ananare,
ma malmata rtoy wait dary mamahire ti aroke kralake.
20 Lemade Yesuske yabuk elik sir,
desikeo deruke rorw toha aroke ma rtoha Yesuske,
ode rtutuk amatke yor wasi makaryaare ti desy.
Yesuske yesak ngkeskwakwe
21 Lemade Yesuske yor wasi matoha Iare rbai hnu Kapernaumke.
Ode kyoat ti sew Inamreske bonyo,
byai Yahudi-nare sey rasambayan tike,
ma yajar ti.
22 *Kyoat iry desikre ratomolu nam iajarare bonyo rheran,
kali tun itanukare kyety mdedan,
ode lema kola iry mahe snurat o tnyetak Musake nam raajarare.
23 Ode ti sey rasambayan tike krala desy,
irkye it ma ngkeskwakwe syukar i soso de,
neke byoran mait ma byohe,
24 “Hei!
Yesus iry a Nazaret O,
mrweky sai ma aramy ne de?
Mmwa ma mkwordalam aramy† mane e?
Yaw ne khwe o esei O.
Oi neke Iry Nelnyely manosy a Hulasokwe.”
25 Dendye Yesuske yaswel i,
ode tyanuk ti i de byohe,
“Mamwaw o!
Ode mbwetik toha iry ne!”
26 Lemade ngkeskwaw desike byoran ma telake lan,
ode byesak a iry desy daku ribun lan desy.
Maktei o byetik toha iry desy.
27 Dendye iry ribun mamin desikre mumu ne rheran,
ode it de tyanuk ti it ma rbohe,
“Wah,
iry ne tunanare kyety mdedan a ksyalik.
Kali bisa ma yesak ngkeskwakwe,
desyo byetik elik.”
28 Lemade Yesuske abritake kimelir mait ti hnu kabei ta kabei ti propinsi Galileake.
Yesuske nyoha iry ribunke wait kbainare ma eras sir
29-30 Kyoat Yesuske yor wasi matoha Iare rbetik toha Yahudi-nare sey rasambayan tike,
desikeo Yakobus,
ode Yohanes ror sir dakun,
ma rbai Simon yor Andreas wait sekye.
Ma nenmo ranait bonyo,
iry mamin ti desike dum a rlosu ti Yesuske yor wasi matoha I desikre ma rbohe,
“Simon ryana wamfwetke kluruk i,
kali kbai mrinke kyala i.”
31 Lemadendye Yesuske bya ti imdiry ti enen desike wena ienah tike kserike,
ode kyumak enen desike simake ma syabyatar i,
desikeo enen desike wasi kbai mrin desy kitayar elik.
Lemade enen desike byitil i,
ma bya ti syalwir ti Yesuske yor iry desikre.
32 Kyoat sekwe iba bonyo,
irire ror wait iry a isy masunure,
ode iry a ngkeskwaure rasukar sirare ti Yesuske.
33 Dendye iry ribun mamin hnu desike,
rma ma rawahuk sir mumu ti Simon yor Andreas wait sekye lulkwe.
34 Ode Yesuske nyoha iry ribunke wait kbai salno salik nekre,
ode yesak ngkeskwaw ribunke dakun toha iry desikre ma rbetik,
ode lema lyura ngkeskwaw desikre ma ratun,
kali rhe ohe Yesus neke Hulasokwe Anan a I.
Yesuske bya ti yajar o hnu salik
35 Ode bolbolbol ne,
ma sekwe lenla ibetik ne bonyo,
Yesuske byatar ode lyakut ma byai wen kele ratelinke it,
ti syambayan.
36 Dendye Simon yor lianare rba ti raobak a I.
37 Ode kyoat ranait I bonyo,
rtanuk ti I ma rbohe,
“Tuanggurw,
iry ribunke robak O.”
38 Keskyede Yesuske hyalas sir ma byohe,
“Mmya ma tbai hnu salik,
neke ti nus o hnu maney nekre,
ma kabrita Brit Eraske ti,
kali khyali Brit Eraske mane kbwaa koli nus o hnu nekre.”
39 *Lemade Yesuske byai propinsi Galileake ktem desy mumu,
ode syukar ei Yahudi-nare sey rasambayan tiare,
ma yabrita Brit Eraske,
ode yesak ngkeskwaure toha irire.
Yesuske nyoha kbai mbaulke toha irkye it ma eras i
40 Ode kyoat Yesuske yait a hnuke it,
desikeo irkye it ma kbai mbaulke kbyenw tenanke.
Ode iatos Yesuske bonyo,
mya ma syakitil ti Yesuske wasi lulululw ne,
ode iten toha I ma byohe,
“Amo!
Kolnye mou mo,
kuten ma maditi kbai ne toha yaw,
ma tenakw ne nelnyely!”
41 Lemade Yesuske lyobak iry desy,
dendye yeta simake ti kyumak iry desy,
ode tyanuk ti i ma byohe,
“Kou ma tenamkwe nelnyely.”
42 Ode kyala mait bonyo,
iry desike wasi kbai mbaul desy kitayar,
ma tenanke nelnyely.
43 Dendye Yesuske tyerik malkyakaw iry desike ma kete ihes ktela madi ti i desike ti irkye it elik.
Maktei o yaso i ma adoko bya.
44 *Ode tyanuk ti i de byohe,
“Musti mo mtwoha haret Musake,
ma adoko mbwa mirin ti mswusu tenamkwe ti iry mabaa klen ti irkye yor Hulasokwe,
ma mety heal ana raabar ti Hulasokwe desy,
ma mal ti sir,
ma rhe bain-bain o eras a o de.”
45 Keskyede iry desike lema hyaduli elik,
de bya ti ihes a ktela madi ti i desike ti kabei ta kabei bo,
ma khyury ma Yesuske lema bisa ma syukar ei nus o hnu nekre de.
De imin ti wen kele ratelin nekre bo,
keskye irire rosy kabei ta kabei ma rma ma robak I bo.