Yesuske ihliak tunke ti iry makaryaare ti bo tasy maiskye
12
*Lemade Yesuske tyanuk tun inahliakke it ti iry mabaa klen ti irkye yor Hulasokwe wait usu khatunare,
ror tuanggurw kubkubakare,
rtabal iry manety lulw ti Yahudi-nare ma byu de byohe,
“Irkye it a kyuy a boke,
ode ika losan ti ma kyaklelela.
Maktei o tyan tasy maiskye ti,
ode kyaly a kuranke ma yala wen ana raisy tasy maiskye tike.
Maktei o ika sekye ti boke ma irire ramin ti,
ma rajaga bo desy.
Kyoat iry desike iala nam desikre mumu maktei bonyo,
yaso irire ma rseak ti bo desy,
ode ana syelw a sir.
Maktei o ihlolwain bai wen sosoke it.
Bo tasy maiskye (12:1)
Markus 12:1-17
2 Ode kyait ma ral bo desy kisinare bonyo,
boke kebu desy yaso wasi makaryake it ma bya ti yal boke kebu desy watanke toha iry manoha bo desikre.
3 Keskyede manoha bo desikre rkumak makarya desy ma roban a i,
ode raso i ma yulak a i,
desikeo imranran ti babake bo.
4 Lemade boke kebu desy yaso wasi makaryake it huruk ma bya,
keskye manoha bo desikre roban a i nini usuke khatuke kimnu,
ode rahmwai ia ksyalik.
5 Lemade boke kebu desy yaso wasi makaryake it huruk ma bya,
keskye manoha bo desikre rtabahunw makarya desy.
Dendye boke kebu desike yaso wasi makaryaare ma ribun sir a rba,
keskye iry manoha bo desikre roban dum,
ode rtabahunw dum.
6 Dendye lema kika iry ma boke kebu desy yaso sir de,
de lenla anan sasasam ilobak ne bo.
Lemade byohe,
‘Lemamo kaso anakkwe ma bya,
kali ana raalan ike bo.’
7 Keskyede iry manoha bo desikre raatos naman desike ma ima bonyo,
it de tyanuk ti it ma rbohe,
‘I neke ana syaa i ti bo ne.
Lemamo ttabahunw a i,
ma ity neke tsaa ity ti bo ne.’
8 Dendye iry desikre rkumak naman desy,
ode rtabahunw a i,
maktei o rotuk i bai bo tasy maisy desike ketake.”
9 Kyoat Yesuske ihes tun inahliak desike maktei bonyo,
yena usu khatu Yahudi desikre ma byohe,
“Koldyesikemo boke kebu desike ana yala kolkyabei iry manoha bo desikre de?
Boke kebu desike ana mya ma tyabahunw iry manoha bo desikre mumu.
Maktei o nenmo ana yal iry salik ma rnoha wasi bo desy.”
10 *Ode Yesuske tyanuk huruk ma byohe,
“De mbyaca tunke khatu rakesy ti Kitab Lanke ne ta lema de?
Ti kibohe,
‘Hatw neke iry masadiri seire lema ral ma rsadiri sey,
de rbisak ba bo.
Keskyede hatw neke Hulasokwe yal ma yal ti hatw mamunmuna ti sekye.†
11 Nam Hulasokwe iala neke,
kyala ity ma theran kolnye tatos!’ ”
12 Lemade usu khatu Yahudi desikre ralkyaw sir ma rkumak Yesuske,
kali rhe ohe tun inahliak itanuk desike,
tyanuk sara sir.
Keskyede ramtaut iry ribun mamin ti desy,
dendye lema rkumak Yesuske,
de rba bo.
Usu khatu Yahudi-nare ralkyaw sir ma rhury a Yesuske ma tyanuk sal tunke it keskye Yesuske lema tyanuk tun salke it elik
13 Lemade usu khatu Yahudi-nare raso iry manosy lui Farisi-nare dum,
rtabal raja Herodes wasi irire dum,
ma rba ti ratun a ror Yesuske ma rhury a Yesuske ma itun sal,
ma robak a ksala ti tun itanukare,
ma rkumak I.
14 Dendye iry desikre rba ti rait Yesuske ode rtanuk ti I ma rbohe,
“Tuanggurw,
aramy mhye ohe,
nam mutanuk o muajar nekre mlay,
kali lema mukakmet.
Ode Oi neke lema mukea ode museak mat,
de Oi neke majar a irire bain,
ma rmorif kola Hulasokwe ibuke.
Lemade senweke mlwosu ma aramy ohe,
bisa ma aramy msyelw a uskwe ti Kaisarke ta lema de?
De musti mo aramy msyelw e?”
15 Keskye Yesuske hye iry desikre wait ulak o talik nekre,
lemade tyanuk ti sir de byohe,
“Kyanmwane mihury a Yaw kolnye ne de?
Msyusu kuban dinarke† it ma katos!”
Romawi wait kuban dinarke (12:15)
16 Dendye reta kuban dinarke it ti Yesuske yatos.
Lemade yal kuban desy,
ode yena sir ma byohe,
“Esei ne ragambar i ti ne de?
Ode rakesy anike ti ne de?”
Desikeo iry desikre rhalas ma rbohe,
“Kaisarke!”
17 Lemade Yesuske tyanuk ti sir ma byohe,
“Koldyesikemo nam Kaisarke wasike mo,
myal ti Kaisarke.
Ode nam Hulasokwe wasike mo,
myal ti Hulasokwe.”
Kyoat iry desikre ratomolu Yesuske ma itanuk koldyesy bonyo,
rheran a ksyalik.
Iry manosy lui Sadukike rena Yesuske ti irkye myaty maktei o myorif huruk
18 *Lemade iry manosy lui Sadukike dum a rma ma rait Yesuske.
Iry nekre rtohak ohe irkye myaty desikeo lema bisa ma myorif huruk.
Lemadendye rena Yesuske ma rbohe,
Markus 12:18-44
19 *“Tuanggurw,
Musa kyesy tnyetakke it ma ity,
neke kolnye:
Wamwankye it ma isa,
ma lenla ratot naman,
desikeo wamwany desike myaty.
Koldyesikemo wamwany desike wai amurkye it a musti mo isaa yor wamfwet masom desy,
ma ratot naman ti wai ausw mamaty desy.
20 Dendye kolnye irkye itw a sir,
neke ausw o amury.
Ma auskwe isaa yor wamfwetke it,
ma lenla raka anat bonyo wamwany ausw desike myaty.
21 Desike bonyo,
wai amury matoha kausuke isaa yor wamfwet desy,
ma lenla raka anat bonyo,
wamwany matoha kausu desike myaty dakun.
Dendye ktela desike kdi ti huruk ti wai amury matoha kausu nenmo mamaty desy.
22 Ma ktela desike kdi ti koldyesy nini ti kyal wamwany deitw desy mumu.
Ma wamwany desikre raktemtem mumu ne lema raka anat ti kyoat rasaa ror wamfwet desy.
Ode kalyauke bonyo wamfwet desike myaty dakun.
23 Dendye kolnye ana kyait sekwe ma iry mamatire rmorif huruk,
desikemo ana ese sawa wamfwet desy de?
Kali deitkwe mumu ne rasaa ror wamfwet desy.”
24 Lemade Yesuske hyalas sir ma byohe,
“Ei neke ana lema mhye miba sara,
kali lema mhye Kitab Lanke kralake kbuanare,
ode Hulasokwe wasi haretke.
25 Kali ana kyait ma iry mamatire rmorif,
desikeo lema kika insa o inlana de.
De iry desikre rmorif huruk ma rola Hulasokwe wasi nyaso manosy laitke,
ma ramin ti wen sra eras Hulasokwe imin tike.
26 *Ode lema mtyohak ohe,
mamatire ana rmorif huruk e?
Anakyai lema mbyaca ti kitab Musa ikeskye!
Kali ti kitabke krala desike,
Musa ihes a kyoat Hulasokwe syusu I ti i,
ti ay malehur ti kairwamaske kralake,
ma Hulasokwe tyanuk ti i de byohe,
‘Yaw neke,
Hulasow a Abraham,
Ishak,
ode Yakub a rasambayan ti Yaw nggora ne.’
27 Hulasokwe tyanuk koldyesy,
biar ma iry detelw ne rmaty de,
keskye Hulasokwe lema ika Hulasow ti iry mamatire,
de ika Hulasow ti iry mamorifare.
Kali ktyoha ktela irkye,
desikeo iry desikre rmaty,
ode lema ramin ti lasmyerke khaha ne de.
Keskye ktyoha Hulasokwe,
desikeo iry detelw neke rmorif a nggora.
Hei iry malakut sal e,
ei neke ana lema mhye miba sara,
kali lema mhye Kitab Lanke kralake kbuanare.”
Lema kika tnyetak ma kbyilak Hulasokwe wasi tnyetakke
28 Lemade iry mahe snurat o tnyetak Musake it a mya ma tyomolu ma iry manosy lui Sadukike rahalas tel a ror Yesuske,
ma Yesuske hyalas mlay a iry desikre.
Dendye iry mahe snurat o tnyetak Musa desike yena Yesuske ma byohe,
“Tuanggurw,
tnyetak kabei kbyilak tnyetak nekre mumu de?”
29 *Lemade Yesuske hyalas ma byohe,
“Tnyetak mamunmunake,
neke mtyomolu:
‘Hei iry a Israel e,
ity Ebut Hulasow neke,
sasasam I bo.
30 Lemade musti mo mdwakin Ebumw Hulasokwe
kyor wasimw mormyorifke mumu,
kyor amalkyaumkwe mumu,
kyor nam murekan nekre mumu,
ode ktyabal ralamkwe kralake mumu.’
31 * Ode tnyetak matoha tnyetak mamunmunake neke kolnye:
‘Mlwobak irire,
kola dene mulobak tenamkwe ne dakun.’
Lema kika tnyetak salik ma kbyilak tnyetak deru ne.”
32 *Lemade iry mahe snurat o tnyetak Musa desike hyalas Yesuske ma byohe,
“Tuanggurw,
tun mutanuk desike mlay,
kali Hulasow ne sasasam I bo,
de lema kika hulasow salik.
33 *Dendye kolnye tdakin Hulasokwe,
musti mo tdakin I a tor ity amalkyautare mumu,
ode nam tarekanare mumu,
ode ktyabal ity ralat a kralanare mumu.
Ode tlobak irire,
kola dene talobak ity tenatare kmyesan ne.
Kolnye tala koldyesy,
desike ne eras ma kbyilak ti tanety natzar o,
taeh healare mumu ma taabar ti Hulasokwe ne.”
34 Dendye kyoat Yesuske yatos iry mahe snurat o tnyetak Musa desy,
ti nam ihalas desikre ma khyei lulw o lyaw,
lemade Yesuske tyanuk ti i ma byohe,
“Oi neke marasy ma mal wasimw mormyorifke ti Hulasokwe de,
ma wasi iry a o!Ӡ
Dendye lema irkye it a ires ma yena namit-namit toha Yesuske de.
Raja Daud yabuk tesnwo natuke it ti Amam Lanke
35 Ode malmata Yesuske yajar iry ribunke ti kintal Hulasokwe Seike,
desikeo tyanuk ma byohe,
“Kolkyabei mane iry mahe snurat o tnyetak Musake rtanuk ohe,
Iry a Hulasokwe isusu ma ika Raja ode iaorif a irkye ne,†
raja Daud tesnwo natu I ne de?
36 *Kali the ohe raja Daud neke Hulasokwe Memeanke kkyarya ti i,
ma tyanuk de byohe,
‘Hulasokwe tyanuk ti wasikw Amam Lanke ma byohe,
“Mtwaklulw ti serikw wanke,
ma kala iry mamnisik Oare ma ana mswaa lwaumw ti uno matat.” ’
37 Ode bisa ma raja Daud yabuk Mesiaske ti Amam Lan,
dendye kolkyabei mane Mesias neke raja Daud bisa ma tesnwo natu I bony ne de?”
Ode iry ribun mamin ti Hulasokwe Sei desike,
rdakin ma rtomolu Yesuske ma yajar.
Yesuske syurat iry matoha Iare ma rajaga mamak a sir ti a iry mahe snurat o tnyetak Musake
38 *Lemadendye Yesuske tyanuk ti iry desikre mumu ma byohe,
“Mijaga mamak a e ti iry mahe snurat o tnyetak Musa desikre.
Kali rdakin ma rhonak rabit narnarw nekre,
ma rba ti de rba ma ti wen raketa nam tiare.
Ode rdakin kolnye irire rou ti sir dakun.
39 Ode kyoat a rsukar sey rasambayan tiare,
desikeo rdakin ma rtaklulw ti lulululw ne.
Ode kyoat a rbai kalkal lanare,
rdakin ma rtaklulw ti wen a rasosan ti iry a raalan-are.
40 Ode iry desikre sir ne kyalamo rakakmet a enen som nekre,
ma rasoruk wait sey o sar ktyabal malolitare.
Ode rsambayan neke narnarnarw ksyalik,
ma kyeteta totat atyatare.
Lemadendye Hulasokwe ana yukun sir o mdedan a ksyalik ma kbyilak iry salik.”
Enen somke yety natzar
41 Kyoat Yesuske imin ti kintal Hulasokwe Seike,
ma tyaklulw ma syara wen raluk natzar tike,
ode yatos iry ribunke ma rluk wait natzarare ti wen raluk natzar tike.
Desikeo yatos iry maka wait malolire,
ma rluk wait natzarare o rluk ribun ti wen raluk natzar tike.
42 Ode yatos enen somke it dakun ma lema yait ei sra o hah,
ma mya ma lyuk wasi natzarke ti wen raluk natzar tike.
Enen som desike lyuk senke enaru bo.
Yesuske yatos irire ma rluk wait natzarare ti wen raluk natzar tike (12:41)
43 Lemadendye Yesuske yabuk wasi matoha Iare,
ma tyanuk ti sir ma byohe,
“Mtyomolu mamak nam kutanuk ti e ne.
Mlay bain!
Enen som lema manait ei sra o hah desike yal natzarke o lan ma kbyilak iry desikre mumu ne,
wait natzarare.
44 Kali iry desikre mumu ne rety natzar toha wait maloly mabilakare,
klala enen som neke biar ma lema yait ei sra o hah,
keskyede yal o lan ma kbyilak sir ne mumu,
kali yal wasi nam imorif ti nekre mumu ma yety ba ti Hulasokwe.”