Yesuske tyanuk a Hulasokwe Seike ti ana kiskyui-kiskyay ne
13
Kyoat a Yesuske yor wasi matoha Iare rbetik toha Hulasokwe Seike bonyo,
wasi matoha Ike it a tyanuk ti I ma byohe,
“Tuanggurw,
matos!
Hatw a ranal ma rala sey nekre eras a ksyalik!”
Markus 13:1-27
2 Lemade Yesuske tyanuk ti wasi matoha I desike ma byohe,
“Matos sey lan a eras nekre.
Ana kyait sekwe,
desikeo irire rma ma raskyui-raskyay hatw ranal ma raala sey desikre mumu ma kiskyui-kiskyay,
ma sasam lema kimin ti kwenake dakun.”
Hulasokwe Seike lan ode wasi kintalke o lan ode seire ribun a kyaklelela (13:2)
Masunw lan ne ana kdi ti lenla sew a nuske ktem ne kilodur ne
3 Lemade Yesuske yor wasi matoha Iare rbai Kususwan Zaitunke.
Ti desike Yesuske myesan a tyaklulw ma syara Hulasokwe Seike.
Desikeo Petrus,
Yakobus,
Yohanes,
ode Andreas,
deatke rmesan a rma ma rait Yesuske,
ma rena I ma rbohe,
4 “Tuanggurw,
mlwosu ma aramy ohe,
hekyabei o nam mutanuk ne kdi ti de?
Ode nyatos sakar ne ksyusu ohe,
nam nekre mumu neke kyala ma kdi ti ne de?”
5 Lemade Yesuske hyalas sir ma byohe,
“Mijaga mamak a e,
ma irire kete rakakmet a e!
6 Kali irire ribun ana rma ma it o it neke ral Anikkwe ma rakakmet a e ma rbohe,
sir neke Iry a Hulasokwe isusu sir ma raka Raja ode raaorif irkye ne.†
Iry desikre rtanuk koldyesy ma khyury ma iry ribunke rtoha sir.
7 Ode kolnye mtyomolu britke o irire ramdiriat,
ktyabal inamdiriatke ksorbubuke,
desikeo kete mimtaut.
Kali nam desikre mumu neke musti mo kdi ti a kmuna,
keskye lenla kyait sekwe ma nuske ktem ne klyodur.
8 Ode bangsa mamin ti nuske ktem ne ana it de syorw a it ma ramdiriat,
ktyabal raja-nare ramdiriat a ror raja salik.
Ode ana lurwakye ksunw ksyalik ti kabei ta kabei bo,
ode ana lu o laar ne ksunw ksyalik dakun.
Nam desikre mumu ne,
nenmo masunkwe khyehyeike ti taras harharw ne ma desy.
Masunw desike ksunsunuke kola ne enen maala ma madur hahke ti ikoman a ksunsunuke ne.
9 *Keskyede ei neke mijaga mamak a e,
kali ana rkumak e,
ma ral e ti iry a Yahudi-nare wait iry maukun tunare,
ma rukun a e.
Ode ana roban de rtaba e ti Yahudi-nare sey rasambayan tiare.
Ode ana rhait e bai raja-nare ode gubernur-are,
kali mtyohak ma Yaw.
Keskyede kyoat a iry desikre rala koldyesy ti e,
neke ksalake desy ma myabrita Yaw ti sir ma desy.
10 Kali Brit Eraske musti mo rabrita kmuna ti bangsa nekre mumu,
ti lasmyerke khaha ne.
11 Ode kolnye rhait e ba ti iry maukun tunare,
desikemo kete ralamire kakan ti tun a musti mo ana mitanukare.
De mtyanuk tun a Hulasokwe Memeanke kinal ti ralamy krala desikre.
Kali tun mitanuk desikre lema kbyetik a kyosy a e,
de kyosy a Hulasokwe Memeanke ma desy.
12 Kyoat desy dakun o irire ana ral wait o hatnimat ma ror sir ba ti haretke ma rtabahunw a sir.
Ode amamare ana ror anatare ti rtabahunw a sir dakun.
Ode ana namanare rulak sir ma rsorw a enat o amat.
Ode ana raso irire ma rtabahunw enat o amat dakun.
13 *Ode ti wen kabei ta kabei bo,
iry ribunke ana ramnisik e,
kali mtyohak Yaw.
Keskye kolnye mtyohak manenen ma Yaw nini mmyaty,
desikemo mitot mormyorif manal nini namke.”
Masunkwe kdyan irire o ksunw ksyalik
14 *Lemade Yesuske tyanuk huruk ma byohe,
“Ei ne ana myatos irkye it ma ihatw ksyalik,
ma imdiry ti wen nelnyely a lema bisa ma isukar ma imdiry tike.
Ode i ne isukar ma iala wen nelnyely desy ma kiray ne.Ӡ
–iry mabacaare musti mo mhye nam Yesuske itanuk ne kbuanke– “Kyoat ktela desy kidi ti bonyo,
iry mamin ti propinsi Yudeake musti mo ra-la rbai huarare.
15 *Ode iry mamin ti mloskye,
kete syukar ma yal nam dum toha sekye kralake.
16 Ode iry mamin ti boare,
desikemo kete yolik i bai sekye ti yal wasi simbol o rabit.
17 Ode kyoat ra-la rbai huarare desy,
desikeo enen a manor tenatare,
ror enen a masusw anatare ana masunkwe kdyan sir o ksunw ksyalik.
18 Dendye musti mo msyambayan,
ma kete ktela neke kdi ti sew a us o esw.
19 *Ktwanuk koldyesy,
kali kyoat desike irire ana masunkwe kdyan sir o ksunw ksyalik.
Ma ti kiala kyosy a Hulasokwe yala nuske ktem ne,
ma ti kinait sew desy,
irkye lenla kyoman masunw maoly desy elik.
Ode kyala kyosy sew desy dakun ma ti kiba knaru ne,
ana masunw maoly desy lema kdyan irkye de.
20 Kyoat desike kolnye Hulasokwe lema yatuuk seure ti taras masunw desy,
desikemo lema irkye it a myorif dakun.
Keskyede Hulasokwe yatuuk seure ti taras masunw desy,
kali lyobak wasi iry a iilikare.
21 Kyoat desike irire rtanuk ti e ma rbohe,
‘Myatos,
Iry a Hulasokwe isusu ma ika Raja ode iaorif irkye ne imin ti ne.’
Ta dum a rbohe,
‘Imin ti so.’
Desikemo kete mtyohak tun ratanuk desikre.
22 Kali kyoat desike irire ribun ana rma ma rakakmet ma rbohe,
Hulasokwe syusu sir ma raka raja ode raorif irkye.
Ode irire ribun ana rma dakun ma rakakmet ma rbohe,
sir ne iry a manety Hulasokwe wasi nyano sir.
Ode iry nekre mumu ne ana rala nyatos o ktela masalsyalik iare dakun.
Mamode ktela o nyatos raala desikre khyury ma kikakmet a iry mamin nuske ktem ne,
ma ti kyal a robak ma rakakmet a iry a Hulasokwe iilikare dakun.
23 Lemadendye mijaga mamak a e!
Kali ktwanuk tun nekre mumu ti e a kmuna de.”
Yesuske yajar irire, ti Irkye Ananke ana ima huruk ne
24 *“Ode kyoat sew a masunw lan madan irkye desy kisakut,
desikeo ana sekwe lema ryan,
de kelerkok,
ode ana hulke lema nyely dakun,
25 *ode ana ftunare rdi toha laitke,
ode nam mahareta salik mamin ti laitke ne,
ana rdi ma raskyui-raskyay.
26 *Kyoat desike bonyo,
iry mamin nuske ktem ne mumu ne ana ratos Irkye Ananke† ti oanke kralake,
ma yorw yosy laitke.
Neke myaa yor wasi haret lan ne,
ode wasi madelafke.
27 Ode kyoat desy dakun o,
ana Hulasokwe yaso wasi nyasoare toha laitke,
ma rma ma rawahuk iry a iilikare ti nuske ktem ne mumu.”
Yesuske yal aw arake ma yajar wasi matoha Iare
28 “Lemade myatos ti aw arake!
Kolnye myatos aw arake ma kudu murare kbyetik ti ksananare,
desikemo mhye o lemanke kyarasy de.
Markus 13:28-37
29 Koldyesy dakun o,
kolnye myatos a ktela kutanuk ti e nekre mumu ma kdi ti,
desikemo mhye ohe sew a Irkye Ananke ima huruk ne kyala ma kyait mane,
kola ne imdiry holholatke kmatake de.
30 Mtyomolu mamak nam kutanuk ne.
Mlay bain!
Iry mamorif ti taras neke ana lenla rmaty,
kolnye nam nekre mumu ne lenla kdi ti.
31 Dendye mnyenas!
Lait o lasmyer ne ana kitayar,
klala tunakure kimin ma ana kyal nini nam ti kiba knaru ne.
32 *Biar ma koldyesy,
keskyede lema irkye it a hye ohe hekyab o sew a Irkye Ananke ana ima huruk ne kdi ti.
Ma ti kyal nyaso manosy laitare lema rhe,
ode Irkye Ananke o lema hye dakun.
De lenla Amaku myesan a hye bo.”
Musti mo tajaga mamak ity kali lema the o hekyab o Yesuske mya huruk
33 “Lemade mijaga mamak a e,
kali lema mhye ohe hekyab o Irkye Ananke mya huruk.
34 *Wasi mama neke kola ne iry mahlolwainke it.
Ma kyoat iry neke yala ma tyutuk wasi sekye,
ma byai hnu sosoke it,
desikeo yal haretke ti wasi makaryaare,
ma it o it neke rkarya wait karya inal ti sir ma rakarya ne.
Ode yaso iry majaga holholatke ma byohe,
‘Mujaga mamamak holholat ne nini kulak yaw mai ne.’
35 Lemadendye musti mo mijaga mamak a e,
kali lema mhye ohe sekye kebuke yulak i sew kabei.
Kali wasi mama neke lema mhye o ana mya sekwe bya ta,
metdyet ta,
metdyet a kditlan ta,
nyamomo ne.
36 Ma kolnye mya mait mo,
kete yait e ma malmata myenaf.
37 Ode nam kutanuk nekre,
lema ktwanuk ti e a myesan,
de ktwanuk ti irire mumu ti lasmyerke khaha ne,
ma rajaga mamak a sir dakun.”