Hulasokwe Seike ana kiskyui-kiskyay
24
Kyoat a Yesuske yor wasi matoha Iare rala ma rbetik toha Hulasokwe Seike bonyo, wasi matoha Ike it a tyanuk ti I ma byohe, “Tuanggurw, matos Hulasokwe Sei ne, ktyabal sey ribun mamin ti Sei ne wasi kintal ne eras a ksyalik!”2 Lemade Yesuske tyanuk ti wasi matoha Iare ma byohe, “Myatos a sey lan a eras-eras nekre deny ode? Dendye mtyomolu mamak nam kutanuk ne! Ana kyait sekwe, desikeo irire rma ma raskyui-raskyay hatw ranal ma raala sey desikre mumu ma kiskyui-kiskyay, ma sasam lema kimin ti kwenake dakun.”
Hulasokwe Seike ti heitlulswo kimin ti nus lan Yerusalemke (24:1)
Masunw lan ne ana kdi ti ti sew a lenla nuske ktem ne kilodur ne
3 Lemade Yesuske lyakut ma syai bai Kususwan Zaitunke ti tyaklulw ti desy. Desike bonyo wasi matoha Iare rma ma rena I ma rbohe, “Mtwanuk ma aramy ohe, hekyabei o nam mutanuk nekre mumu ne kdi ti de? Ode nyatos sakar ne kilosu o ana muma huruk ne de? Ode nyatos sakar ne kilosu huruk o nuske ktem ne kyala ma kilodur ne de?”
4 Dendye Yesuske hyalas sir ma byohe, “Mijaga mamak a e, ma irire kete rakakmet a e! 5 Kali irire ribun ana rma ma ral Anikkwe ma rtanuk de rbohe, sir neke Mesias sir.† Ma khyury ma rakakmet a irire ribun ma rtoha sir. 6 Ode kolnye mtyomolu britke o irire ramdiriat,† ktyabal inamdiriatke ksorbubuke, desikeo kete mimtaut. Kali nam desikre mumu neke musti mo kdi ti a kmuna, keskye lenla kyait sekwe ma nuske ktem ne klyodur. 7 Ode bangsa mamin ti nuske ktem ne ana it de syorw a it ma ramdiriat, ktyabal raja-nare ramdiriat a ror raja salik. Ode ana lu o laar lan a ksyalik ti kabei ta kabei bo. Ode ana lurwakye† ksunw ksyalik ti kabei ta kabei dakun. 8 Masunw desike ksunsunuke kola ne enen maala ma madur hahke, ti idur hah o ikoman a ksunsunuke ne. Ktela desikre mumu ne, nenmo masunkwe khyehyeike ti taras harharw ne ma desy, keskyede masunw desikre ana ksunsununare ktyabal a ktyabal toha.
9 *Kyoat desy dakun o ana irire rkumak a e, ma rluk a dum ti sey metmetke kralake, ode ror dum ba ti roban de rtaba sir, ode rtabahunw a dum dakun. Ode ana bangsa mamin nuske ktem ne mumu ne ramnisik a e, kali mtyohak ma Yaw. 10 Ode irire ribun ana rulak sir ma lema rtohak ma Yaw, dendye it de kyeta it, ode it de imnisik it. 11 Ode irire ribun ana rma ma rakakmet ma rbohe, sir neke iry manety Hulasokwe wasi nyano sir. Ktela desike ne kyala irire ribun ma lema rhe raba sara. 12 Ode tot atyatke ti nuske ktem ne ktyabal a ktyabal toha, dendye khyury ma it de lema lyobak it de. 13 Keskyede kolnye mkyumak malkyakaw wasimy tohtohakke ma Yaw nini kyait teike, desikemo ana mmyorif nini nam ti wen sra eraske. 14 Ode ana rabrita Brit Eras a Hulasokwe ihareta kola Rajake ne ti nuske ktem ne mumu, ma irire mumu ne rtomolu Brit Eras desy ma ktei, desikeo nenmo nuske ktem ne klyodur.”
Masunkwe ana kdyan irire o ksunw ksyalik
15 *Lemadendye Yesuske tyanuk huruk ma byohe, “Ana kyait sekwe ma nam Daniel iry a manety Hulasokwe wasi nyano neke ikeskye ana kdi ti. Neke kyesy kolnye: ‘Ei ne ana myatos iry mahatw ksyalikke it, ma imdiry ti wen nelnyelnyely a lema bisa ma irkye isukar ma imdiry ti ne. Keskyede iry mahatw desike ne isukar ma iala wen nelnyelnyely desy ma kiray ne.’ ”† –iry mabacaare musti mo mhye nam Yesuske itanuk ne kbuanke– 16 “Kyoat desike iry mamin ti propinsi Yudeake musti mo riar toha desy, ma ra-la rbai kususwanare. 17 *Ti sew desy dakun o, kolnye iry mamin a mlosire, desikemo kete rsukar ei sey kralanare ma ral lan o hnutat. 18 Ode kolnye ramin ti boare, desikemo kete rulak sir ei hnuke ma ral wait simbol o rabit. 19 Sew desy dakun o enen a manor tenatare ne, ror enen a masusw anatare ne, ana rkoman masunkwe lan-lan. 20 Lemadendye musti mo msyambayan ma sew a mila toha masunw desy kete kdi ti ti sew a Inamreske, ta kete kdi ti ti sew a us o esw. 21 *Kali kyoat desike ana masunkwe kdyan irkye o ksunw ksyalik. Ode irkye lenla kyoman masunw maoly desy elik, neke kyala kyosy khyehyei a Hulasokwe iala nuske ktem ne, ma ti kyait sew desy. Ode kyala kyosy sew desy ma kibai lulkwe ne, masunw maoly desike ana lema kdyan irkye de. 22 Kyoat desike Hulasokwe yatuuk† seure ti taras masunw desy, kali kolnye lema yatuuk seure ti sew masunw desikre, desikemo lema irkye it a myorif dakun. Keskyede kali Hulasokwe lyobak wasi iry a iilikare, lemade yatuuk seure ti taras masunw desy.
23 Kyoat desike irire rtanuk ti e ma rbohe, ‘Myatos, Mesiaske imin ti ne.’ Ta dum a rbohe, ‘Imin ti so.’ Desikemo kete mtyohak tun ratanuk desikre. 24 Kali kyoat desike irire ribun ana rma ma rakakmet ma rbohe, sir neke Mesias sir. Ode irire ribun ana rma dakun ma rakakmet ma rbohe, sir ne iry a manety Hulasokwe wasi nyano sir. Ode ana rala nyatos o ktela masalsyalik iare dakun. Mamode ktela o nyatos raala desikre khyury ma kikakmet a iry mamin ti nuske ktem ne, ma ti kyal a robak ma rakakmet a iry a Hulasokwe iilikare dakun. 25 Lemadendye mijaga mamak a e! Kali ktwanuk tun nekre mumu ti e a kmuna de.
26 *Dendye kolnye irire rtanuk ti e ma rbohe, ‘Myatos, Mesiaske I so wen malosy-loskye!’ Desikemo kete mbyai wen so. Ta rbohe, ‘Myatos, I ne ibuny ti sekye kralake ne!’ Desikemo kete mtyohak. 27 Kali kyoat Irkye Ananke† ana yulak I ma mya, desikeo iry mamin nuske ktem ne mumu ne rmatakit a I. Kali ana mya, desikeo kola dene hitikke kihitik a kyosy a laitke ksuu timurke, ma kbyai ksuu haratke. 28 Kola dene tatos de manu lusire rawahuk sir ti desy, desikeo mamatire tbunatare kimin ti desy dakun. Koldyesy dakun ti, kolnye myatos nyatos desikre, desikeo mhye ohe, ana kuma huruk ne kyarasy ma desy.”*
Manu lusire rawahuk sir ma raknam (24:28)
Yesuske yajar irire ti Irkye Ananke ana ima huruk ne
29 Lemade Yesuske tyanuk ti wasi matoha Iare huruk ma byohe, “Kyoat masunw lan desike kisakut bonyo,
‘Sekwe lema ryan, de kelerkok,
ode hulke lema nyely dakun,
ode ana ftunare rdi toha laitke ei lasmyerke khaha ne,
ode nam mahareta salik mamin ti laitke ne, ana rdi ma raskyui-raskyay.’*
30 *Kyoat desy dakun o Irkye Ananke ana syusu wasi nyatos ana ima ne ti laitke. Neke khyury ma iry a mamin ti nuske ktem ne mumu ma lema ratohak ti I ne, neke ralatare ksyal, ti raatos nyatos desy. Ode Irkye Ananke ana yorw yosy laitke ma mya, desikeo imin ti oanke kralake. Ode ana ima neke yety wasi haretke mumu, ktyabal wasi madelaf a masalsyalik i ne. 31 Ode kyoat desy dakun o ana yaso wasi nyasoare ma rohw a wait a strompetare o laitke ma kdudunare lan. Maktei o yaso wasi nyasoare ma rorw rosy laitke, ma rma ma rawahuk iry a Hulasokwe iilikare ti lasmyerke khaha ne mumu, neke kyala kyosy a kseri timur o harat, seryab o tran.”
32 Lemade Yesuske tyanuk tun inahliakke ti wasi matoha Iare ma byohe, “Myatos ti aw ara desy bo, kolnye myatos aw ara desike ma kihun, desikemo mhye ohe, kyarasy ti lemanke ma desy. 33 Koldyesy dakun ti miatos a nyatos masunw ribun lan kutanuk desikre, ma kolnye kdi ti mumu de, desikeo bisa ma mhye ohe, sew a Irkye Ananke ima huruk neke kyarasy de. Ma wasi sew a ima neke, ne kitaktaka i ti holholatke kmatake ne. 34 Mtyomolu mamak nam kutanuk ti e ne! Iry a mamorif ti taras neke dum a ana lenla rmaty, kolnye nam nekre mumu ne lenla kdi ti. 35 Dendye mnyenas! Lait o lasmyer ne ana kitayar, klala tunakure lema kitayar, de kimin ma kyal nini nam ti kiba knaru ne.
36 *Biar ma koldyesy, keskyede lema irkye it a hye ohe, Irkye Ananke ima huruk ne ana hekyab o kdi ti. Ma ti kyal nyaso manosy laitare lema rhe, ode Irkye Ananke o lema hye dakun. De lenla Amaku myesan a hye bo.”
Musti mo tajaga mamak ity kali lema the ohe hekyabei o Yesuske mya huruk
37 *“Ode kolnye kyoat Irkye Ananke ana mya huruk mai nuske ktem ne, ana irire kele rsumuk mait sir, kola dene irire ti taras a heitlulswo Nuh a imorif tike, ti kele rasumuk mait sir ne. 38 Kali kyoat wer maluburke lenla kmya, desikeo irire wait a ktela ramukmuka sir ti wait insa o inlana ne, ode ti rala kalkal ma raknam o raenw ne, nini ti kyait sew a Nuh isukar ei batbatakke kralake ne.† 39 *Ma iry desikre lema rhe ohe sai ana kdi ti, de kele rsumuk mait sir bonyo, wer maluburke kmya ma ktyabahunw a sir mumu, desikeo nenmo rhe toha lbwetat. Koldyesy dakun ti ana kyait sew a Irkye Ananke mya huruk mai nuske ktem ne.
40 Kola dene wamwankye enaru ma rkarya ti boke, desikeo Hulasokwe yilik sasam ma yor i ma rba, klala sasam a tyutuk a i. 41 Kola dene wamfwetke enaru ma rtaklulw ma rtutu hettilkye, desikeo Hulasokwe yilik sasam ma yor i ma rba, klala sasam a tyutuk a i.
42 Lemadendye mijaga mamak a e, kali ana lema mhye ohe, sew kabei o wasimy Amam Lanke mya huruk. 43 *Keskyede mnyenas mamak wasikw inahliak ne! Kolnye sekye kebuke hye ohe, kyoban enai ti kyoat manametke ana ima ne, lemade sekye kebu desike dakun o ana lema yenaf, de ijaga bain-bain ma iry manamet desike lema bisa ma syukar ei sekye kralake elik. 44 Lemadendye ei ne musti mo kyaki-kyaki ne mijaga mamamak a e. Kali Irkye Ananke ana mya, keskye miktemtem neke lema mhye o hekyabei.”
Yesuske ihliak tunke ti makarya lema mlakye ma klyosu ohe musti mo tajaga mamak ity ti ana ima huruk ne
45 Lemade ity Ebut Yesuske tyanuk ma byohe, “Ti makarya ei ne mumu ne, esei desike kyarya mamak ti wasi lalanke, ode hye telke, ode itotomolu tel ti wasi lalanke, desikemo i desike wasi lalanke ana byitil i, ma ika usu khatu ti makarya ida nekre, ma i neke sew kyaki nekre ihe kotw ti makarya ida desikre ma ra. 46 Desikemo ana eraske kimin ti makarya maoly desy, kolnye wasi lalanke yulak i ma syeak makarya desy, desikeo malmata kyarya wasi karya desy. 47 Dendye mtyomolu mamak nam kutanuk ne! Makarya desike wasi lalanke ana byitil i huruk, ma syosan lalan desy wasi malolkye, ode syeak ti wasi lan o hnutan desikre mumu. 48 Klala kolnye makarya desike ryekan atyatke ma tyanuk ti ralake kralake ma byohe, 49 ‘Wasikw lalanke soso i a nggora ma lenla mya.’ Lemade makarya desike yoban makarya ida nekre, ode iknam o yenw yor maenw tuanare. 50 Dendye makarya desike lema hye mait o wasi lalanke yulak i ma mya de. 51 Dendye wasi lalan desike yatos makarya desy wasi ktela iala desike bonyo, tyabahunw makarya desy, ode yotuk i bai wen iry a rakakmet ma rala tenatare ma mlay keskye ti ralat a kralanare lema mlay ne, neke ti wenat raotuk sir tike. Ti wen desike masunkwe ode serserke lan ti a ksyalik.”