Zaŋ Batiisi tʋ́ŋ nɩɛ Zeezi rí
11
1 Zeezi há pí líŋsi nyáŋ pɔ́ʋ́ karmɩbɛlɛ ná fí rí bɛllɛ ko tenni, ʋ lɛ́ ráŋ, a mʋ́ ráŋ kílo tɔ́nɛ ná rʋ́ʋ́ karmɛ nɩɛ, ká bʋl Wɩɩsɛ wɩ́ɛ́ má pɔ́wɔ́.
2 Zaŋ Batiisi mɩŋ bɩnajaa mɛ́, ká nɛ Kirisi* wɩ́'állɛ wuu wɩ́ɛ́.
Ʋ sɩɛ́ tʋ́mʋ́ karmɩbɛlɛ náŋa ʋ rɩ́,
3 rɩ́wɔ́ mʋ́ bɔ́sʋ́ bʋlɛ́:
«Ɩ nɛ́ ká nɛrɔ ná há mɔhɛ̃́ rʋ́ʋ́ ko yáá, á ha mɔhɔ̃́ ráá dɛllɛ oro rí?»
4 Ɛ́ nɛ́ ɓa mʋ́ bɔsɛ; Zeezi bʋl pɔ́wɔ́ bʋlɛ́:
«Ɩ́ dɩlla háá nɛ wɩ́ɛ́ ná, arɩ́rɩ́wa sɩ́ɛ́ háá nówó ná, ɩ́ bɩrmʋ́ cesi pá Zaŋ.
5 Ɩ́ bʋl pɔ́ʋ́ bʋlɛ́:
Nyʋmma sɩ́ɛ́ ná ráŋ, gbɛrka vɩ́va, dayalma dúóri, dɩŋtenne nɩ́nɛ wɩ́ɛ́, sʋsɛ í'isi, ká nɩyaara má nɩ́nɛ Labaarɩwero ná wɩ́ɛ́.
6 Nɛrɔ ná há áŋ yardá a wɩ píé tá, ʋ tɩ́na ná wér.»
Zeezi bɩ́ Zaŋ Batiisi mí
7 Zaŋ nɩtʋmɛ́ ná col, ká Zeezi máŋsɛ Zaŋ wɩ́ɛ́ a pá nɩkana ná a bʋlɛ́:
«Beé rí ɩ́ mʋ́ bɛ́llɛ gɩrbétéke sɩɛrʋ?
Poo ní kéŋ paa aá zíksi?
8 Ká beé rí sɩɛ́ ɩ́ mʋ́ ná?
Ɩ́ mʋ́ɔ́ rɩ́ɩ́wa ná nɛrɔ ná há sú gɛpiŋe ní?
Aɩ́!
Ɩ́ ná, nɩɛ ná háá su gɛpiŋe, a mɩŋ wér mí, ɓa mɩŋ kuózeŋsi jɩɩsɛ mɛ́ nɛ́.
9 Beé rí sɩɛ́ ɩ́ mʋ́ ná?
Wɩɩsɛ wɩ́laabʋllɔ nɛ́?
Óó!
Ɛ́ nɛ́, ɩ́ sɩɛ́ lo rɩ́ŋ bʋl pɛ́ɩ́wa, ʋ kɛ Wɩɩsɛ wɩ́laabʋllɔ.
10 Zaŋ nɛ́ ká nɛrɔ ná ɓa há pʋ́ŋsʋ́ wɩ́ɛ́ Wɩɩsɛ Kɛnɔ cɔɔ nɔ́ŋɔ a bʋlɛ́ Wɩɩsɛ sɛ́:
‹Ná, ŋ sɩ́ tʋŋ nɛ́ŋ rʋ́ʋ́ lɛ́ɩ́ sɩ́ɛ́ ko,
a kɛllɛ ŋmɛ́nɔ bílí mí, rɩ́ɩ́ ko tɩŋ.›
11 Taŋá nɛ́ ŋ bʋl aá pɛ́ɩ́wa, nɩɛ ná wuu ɓa há lʋ́lɛ́, oro wuu wɩ Zaŋ Batiisi kɛ.
Ká Wɩɩsɛ kuótɔ́ɔ́ sɩɛrʋ nɩwie má tɩɩ kɛ Zaŋ.
12 A de kaa pɔ́ Zaŋ Batiisi tɛ́ŋ ná mɛ́, a kaa ko aá lɛ zaá né, Wɩɩsɛ kuótɔ́ɔ́ ná ká dóé wɩ́ɩ́ rɛ́; dóé tɩ́náwa nɛ́ tʋ́ʋ́.
13 Ká rɩ́ Zaŋ zɩŋ ko, Wɩɩsɛ wɩ́laabʋlla* arɩ́ Wɩɩsɛ kíŋse* ná Moyizi* há mákɛ́ má bʋ́l ɛ́ nɛ́.
14 Rɩɩ́wa nɩ́ɩ́ já rɩ́ɩ́wa láŋ dí é, ɩ́ saŋ rɩ Zaŋ nɛ́ ká Eli* ná wɩ́ɛ́ ɓa há bʋ́lɛ́ bʋlʋ́ sɩ́ ko.
15 Nɛrɔ ná há kéŋ dɩlla, tɩ́na zesi.
16 «Ŋ sɩɛ́ á rɩ́ŋ pi zaa bɛlɛ makɛ beé rí?
Ɓa dé nɛ heŋbiisi há lɩ́ɛ́ ké tɔ́ɔ́ dɩjɛlɔ, a sɩɛ́ yɩ́rɛ náŋá aá bʋl bʋlɛ́:
17 ‹Á dú ɓɩɛ pɛ́ɩ́wa, ɩ́ wɩ gɔ́ɛ́!
Á ɓá zeŋbíé pɛ́ɩ́wa,ɩ́ wɩ híĩ́né.›
18 Zaŋ há kúé, ʋ vɛ́ ɓɩdííle rɩ́ nyɔɔlɔ́; ɛ́ nɛ́ ɓa sɛ́ kaŋtɔŋ nɛ́ zɩ́nʋ́.
19 Ŋ má Nɩbiino Bio* ko, a dídí, aá nyɔ, ɛ́ nɛ́ ɓa sɛ́:
‹Báálɔ né ká dídítɩ́ŋ rɛ́, sɩnyɔ́r, a a loŋpolaara rɩ́ málbɔmɔ tɩ́náwa naŋnɔ́ŋɔ.›
Ká nɩɛ ná é há kɩ́ɛ́lɛ́ zɩŋ Wɩɩsɛ wɩ́zɩmɛ ná a laa dí, ɓa nóú rʋʋ ká tékétéké.»
Tɔ́nɛ ná nɩɛ há wɩ Zeezi lɛ́ɛ́ dí
20 Tɔ́nɛ ná mɛ́ Zeezi há tʋ́mʋ́ wɩ́nyáŋsɛ dɩkáŋ, ká ɓa nɩɛ wɩ bɩ́rsɛ́ a tá wɩ́bɔma ɛɛ, Zeezi bʋ́lwɔ́ kɩ́ŋkáŋ a bʋlɛ́:
21 «Kɔrazɛ̃* tɩ́náwa, ɩ́ sɩ́ ná wɩɩla!
Bɛtɩsayɩda* tɩ́náwa, ɩ́ má sɩ́ ná wɩɩla!
Bee wɩ́ɛ́ nyáŋsɛ ná há tʋ́mɩ́wa dɩhɩ̃́, rɩ ɛ́ nyáŋsɛ fa tʋ́ŋ Tiiri* rí Sɩdɔŋ* nɩɛ sɩ́sɩ́ɛ́nnʋ́wa nɛ́, nyɛ mɛ́ fól wuu, ɓa súwó sazɔkɔ́ gɛnnɛ a pa tapʋmmɔ* bʋ́kwɔ́ tɩɩ, rɩ́ nɩɛ zɩŋ rɩ́ ɓa bɩ́rsɔ́.
22 Ŋ sɩɛ́ bʋ́lɔ́ aá pɛ́ɩ́wa, kal ná Wɩɩsɛ háá á rʋ́ʋ́ dí sarɩ́ya, ʋ sɩ́ bɛ́ŋsɩ́wa kɩ́llɛ Tiiri rɩ́ Sɩdɔŋ nɩɛ.
23 Ɩ́ má Kapɛrnayimi* tɩ́náwa, ɩ́ bɩ́ɩ́nɔ́ ɩ́ sɩ́ zɩ́ peri Wɩɩsɛ?
Ɛ́ toó, ɩ́ sɩ́ tuwi tíé mʋ́l wuu, lɛlɛ tɔ́ɔ́ sɩɛrʋ.
Bee wɩ́ɛ́ nyáŋsɛ ná há tʋ́mɩ́wa dɩhɩ̃́, rɩ ɛ́ nyáŋsɛ fa tʋ́ŋ Sodomi* mí ní, nyɛ mɛ́ ʋ zaa fa ha mɩ́nɔ́.
24 Ŋ sɩɛ́ bʋ́lɔ́ aá pɛ́ɩ́wa, kal ná Wɩɩsɛ háá a rʋ́ʋ́ dí sarɩ́ya, ʋ sɩ́ bɛŋsɛ Kapɛrnayimi tɩ́náwa kɩ́llɛ Sodomi nɩɛ.»
Zeezi sɛ́ nɩɛ kóú rí a ná fɩɛla
(Liki 10.21, 22)
25 Ɛ́ har rɩ́ mɛ́, Zeezi sɛ́:
«Ŋ Ana, ɩ nɛ́ ká bána nyúú rí tíé nyúú onni wuu Nyuutɩna; ŋŋ́ bɔ́llɩ́ rɛ́, bee wɩ́ɛ́ ɩ há féŋsi wɩ́ɛ́ ná wɩ́zɩnna rɩ́ zɩmɛ́ tɩ́náwa mɛ́, ɩ mákwɔ́ pá heŋbiisi.
26 Óó!
Ŋ Ana, ɩ cólle sɩɛrʋ nɛ́ ɩ tʋŋ ɛ́.
27 «Ŋ Ana pí wɩ́ɛ́ ná wuu dóé héŋ nɛ́sɛ mɛ́.
Rɩŋ Ana dʋŋɔ rá, nɛ́ŋ wuu wɩ́ŋ há ká nɛ́ŋ ná ɛ̃.
Nɛ́ŋ má wuu wɩ́ŋ Ana há ká nɛ́ŋ ná ɛ̃, rɩŋ dʋŋɔ rá, arɩ́ nɩɛ ná ŋ há có rɩŋ mákʋ́ pɔ́wɔ́.