Wɩɩsɛ nɛ́ ká taŋá
(v.1-15 wɩ́ɛ́ ná tɩɩ nɛ́ mɩ́ŋ Kuóre wɩ́állɛ 16.8-22)
105
1 Ɩ́ dɛnnɛ Nyuutɩna Wɩɩsɛ, ɩ́ kánʋ́ yɩr ɓɔ́,ɩ́ a rɩ duówa nɩɛ zɩ́mʋ́ tʋtʋŋzeŋse ná.
2 Ɩ́ yɩ yɩɩla pɔ́ʋ́, ɩ́ dú a pɔ́ʋ́;
ɩ́ bɩrcésú (bɩrbʋ́lʋ́) wɩ́nyáŋsɛ ná wuu.
3 Ɩ́ ló rʋ́ʋ́ yɩr ná há kɔ́ʋ́ dʋŋɔ tɔrɩ́wa sɩɛnnɛ,
rɩ́ɩ́wa jɩ́jʋ́ɔ́sɛ, ɩ́ nɩɛ ná háá ja Nyuutɩna Wɩɩsɛ.
4 Ɩ́ ja Nyuutɩna Wɩɩsɛ, arɩ́rʋ́ dóé,
tɛ́ŋ wuu mí, ɩ́ a makɛ rʋ́ʋ́ wúrú sɩ́ɛ́ cáásɩ́wa.
5 Ɩ́ líísi wɩ́nyaŋsɛ ná ʋ há ɛ́ɛ́ wɩ́ɛ́,
ɩ́ bɩ́ɩ́nʋ́ wɩ́gɩrɛ́ ná wɩ́ɛ́,
arɩ́rʋ́ nʋɔ wɩ́bʋlɛ sarɩ́yawa díí mí,
6 ɩ́ é, ʋ tʋtʋnnɔ Abɩrahaŋ dunɩɛ,
ɩ́ é, Zakɔbɛ bɛlɛ, há kɔ́ʋ́ nɩlɩsɛ́.
7 Ʋ nɛ́ ká Nyuutɩna Wɩɩsɛ á Wɩɩsɛ,
háá bel/háá dí kuorí tíé wuu nyúú.
8 Tɛ́ŋ wuu mí, ʋʋ́ líísú nʋtʋmɛ wɩ́ɛ́,
liŋó ná ʋ há pie pá woowa bʋ́ɩ́ wɩ́ɛ́,
9 ʋ ná ʋ bílú rɩ́ Abɩrahaŋ pɛ́kɛ,
a tɩŋ Izak mɛ́ a bíl ŋmɔ́ɔ́ ʋ a nyáámɩ́,
10 ʋ ná há ká wɩ́bili a pá Zakɔbɛ,
ʋ ná há ká nʋtʋmɛ há sɩ́ pɩ a kaá mʋ́ wuu a pá Ɩzɩrayɛl,
11 tɛ́ŋ ná mɛ́ ʋ há sɛ́: «Ŋ pi Kanaŋ tíé pɛ́ɩ́;
liwe ná há kɛ́ɩ́wa tɩ́llɛ́ nɛ́ ɛ́.»
12 Ɓa fá wɩ káŋ,
ɓa fá ká nɩbaarɛ́ mʋɔ́ dʋŋɔ rɛ́.
13 Ɓa fá gʋ́ɔ́rɔ aá mʋ́ duó duówa rɩ́,
aá mʋ́ dɩ́tɩllɛwa rɩ́.
14 Amá Wɩɩsɛ wɩ lóé rɩ́ nɛ́ŋ wuu bɛ́ŋsɩ́wɔ́,
ʋ gáásɛ kuóre mɛ́ ɓa wɩ́ɛ́:
15 «Ɩ́ sɩ́ŋ nɩlɩsɛ́ mɛ́,
ɩ́ sɩ́ŋ wɩ́laabʋlla bɔ́ŋbɔ́ŋ a.
16 Ʋ yiki losu a hé tɔ́ɔ́ mɛ́,
a pɔ́ rɩ́ ɓɩdííli mʋɔ́ wuu sɩ́ mɩnʋ́.
17 Ʋ tʋ́ŋ nɛrɔ ʋ lɔ́wɔ́ sɩ́ɛ́,
ʋ nɛ́ ká Zɔzɛfɛ, ɓa yɛllʋ́ anɛ yomó.
18 Ɓa hé ɓɛ́ŋsɛ ʋ naasɛ mɛ́,
ká hé hɔɔ bɛ́ŋzɛ́l ʋ baŋ mɛ́;
19 a káá jɔ́ʋ́ wɩ́ɛ́ ná ʋ há la sɩ́ɛ́ bʋl nʋɔ súí,
Nyuutɩna Wɩɩsɛ mɩ́lʋ́ a tɩ́ŋʋ́ wɩ́bʋlɛ mɛ́.
20 Kuóro pá ŋmɛ́nɔ rɩ́wɔ́ púrú tá,
dúníé nyúútɩ́na ɔ́ɔ́ ɓa púú tá.
21 Ʋ lɩ́sʋ́ nɛ́ a bil, ʋ ɔ́ɔ́ jaa nyúútɩ́na
a nɛ́ bíbélú onni wuu mí,
22 a nɛ́ ká tʋtʋnna hóú tɩɩ mɛ́,
ká nɛ́ a rʋ́ʋ́ nɩhɩ́ɩ̃́sɛ ká zɩ́mɛ́.
23 Ɛ́ nɛ́ Ɩzɩrayɛl sɩɛ́ ko Ezipiti,
Zakɔbɛ pɔ́ʋ́ tɩɩ mʋ́ tɔ́ɔ́ ná ɓa háá yɩrɛ Saŋ.
24 Wɩɩsɛ ɔ́ɔ́ ʋ dunɩɛ pul kɩ́ŋkáŋ
ɓa ká dóé a kɩ́llɩ́wɔ́ dɩ́ŋdɔma.
25 Ʋ bɩrsɛ Ezipiti nɩɛ sɩɛnnɛ, a a ɓa bɛ́rʋ́ nɩɛ,
a bɛ́ŋsʋ́ tʋtʋnna arɩ́ sahɔ́.
26 Ʋ tʋ́mʋ́ tʋtʋnnɔ Moyizi
arɩ́rʋ́ nɩlɩsɛ́ Aarɔŋ.
27 Ɓa wɩ́bʋlɛ tʋ́ŋ wɩ́nyɩ́nɛ́wa Ezipiti mí,
Wɩɩsɛ a wɩ́gɩrɛ tɔ́ɔ́ ná ɓa háá yɩrɛ Saŋ mɛ́.
28 Ʋ tʋŋ bino, bino ɓɩ́ɛ́na ko,
Ezipiti nɩɛ báá wʋ́ʋ́ wɩ́bʋlɛ ná báásɛ (tʋ́ɔ́sɛ).
29 Ʋ ɔ́ɔ́ nyii bɩ́rmɛ cɛ́l
a a naŋwʋlɛ sʋsɛ.
30 Sɔrɛ súwó tɔ́ɔ́
a tɩ́ŋ zʋ́wɔ́ kuóre sɩ́ɛ́rɩ́ jɩɩsɛ sɩɛnnɛ.
31 Ʋ wúrú nʋɔ mɛ́, ɛ́ nɛ́ naŋcʋdʋsɛ́
arɩ́ bʋsɛ ko súwó tɔ́ɔ́ wuu.
32 Ʋ wɩ lóé rɩ́ bána ko, ká a dódɔ́wʋ́ɔ́,
(ʋ ɔ́ɔ́ dódɔ́wʋ́ɔ́ nɛ́ lá dóŋ nyúú mí a ko,)
rɩ́ níŋ arɩ́ níŋpoo nɛ́ ko.
33 Ʋ zɔ́kwɔ́ viínyi tuuni arɩ́ piri tuuni,
a zɔ́kwɔ́ tɔ́ɔ́ tuuni.
34 Ʋ wúrú nʋɔ mɛ́, anɛ hʋ́ɔ̃́yorowa,
arɩ́ hʋ́ɔ̃́nyaŋgɩrma há nʋɔ kéné ko.
35 ɓa dí tɔ́ɔ́ ná nyɔɔ wuu,
ɓa dí tɔ́ɔ́ tíé onni wuu.
36 Ʋ ɓʋ́ʋ́sɛ tɔ́ɔ́ ná dʋ́ŋdʋʋ̃́ heŋbolli wuu ní,
ɓa dóé wuu tɛ́ŋ oŋbʋ́ʋ́rɛwa.
37 Ʋ ɔ́ɔ́ ʋ nɩɛ ká warɛ arɩ́ salmɛ a lɛ́,
ʋ jɩmʋ́ʋ́la ná wuu sɩɛnnɛ, nɛ́ŋ wɩ káánɛ́.
38 Ɓa lɩɩ ná tɔrɛ Ezipiti nɩɛ sɩɛnnɛ,
beé wɩ́ɛ́, ɛ́ nɩɛ héwíŋ fá kéŋwó.
39 Ʋ ɔ́ɔ́ dóbasɛ nɛ́ bɩrmɛ gɛbasɛ a tɔ́wɔ́ mɛ́,
ká tɩ́táŋ níŋ mɩ́ŋ aá cáánɩ́wɔ́.
40 Ɓa há sʋ́lɛ́, ʋ pɔ́wɔ́ yuusi;
ʋ ɔ́ɔ́ ɓa vɔksɛ bána nyúú ɓɩdííle.
41 Ʋ ɔ́ɔ́ nyii bʋ́ɩ́ mɛ́, aá lɛ́
aá pál anɛ fuo nyii, tíhɩlɩ́ mɛ́.
42 Beé wɩ́ɛ́, ʋ líísʋ́ wɩ́bʋlɛ ná há kɔ́ʋ́ dʋŋɔ
arɩ́rʋ́ tʋtʋnnɔ Abɩrahaŋ wɩ́ɛ́.
43 Ʋ ɔ́ɔ́ ʋ nɩɛ lɛ́ arɩ́ satɔrɔ́ nɛ́,
ʋ nɩlɩsɛ́ jʋ́ɔ́sɛ nɛ́ a lɛ́.
44 Ʋ lá duówa naŋá tíé ní a pɔ́wɔ́,
ɓa tɩ́llɛ duówa naŋá suolli onni,
45 a makɛ rɩ́wɔ́ tɩ́ŋʋ́ wɩ́makɛ́ ná
káá zílú wɩ́bile ná.
Aleluya /Ɩ́ píŋsi Wɩɩsɛ.