Sɩ́ŋsʋ́ɔ́la kɛnɔ
Laadíná
Sɩ́ŋsʋ́ɔ́la rɩ́ wɩ́bíé ná há ká cáánɛ nɛ mɩŋ kɛnɔ́ né sɩɛrʋ, ɛ́ nɛ́ tɛ́ ʋ yɩr dí sɩ́ŋsʋ́ɔ́la kɛnɔ. Sɩ́ŋsʋ́ɔ́la ná ɓɩkana lɛ́ kuoro Salomɔŋ nɛ́ (sapíítir 1-29), ká náŋa má lɛ Aguuri (sapíítir 30), náŋa má a kuóro Lemuyɛl sɩ́ŋsʋ́ɔ́la (sapíítir 31) .
Nɩbííno há mɔhɛ̃ rʋ́ʋ́ kánʋ́ tɩɩ ɛ́ tápʋ́l wuu ʋ hiẽ́só mí, ʋ nɛ́ ká karmɛ́ a mɩŋ kɛnɔ né sɩɛrʋ. Sɩ́ŋsʋ́ɔ́la ná náŋa tɩ́ɩ́nɛ́ jaa hiẽsó wɩ́ɛ́ mɛ́ nɛ́, ká náŋa má tɩ́ɩ́nɛ́ yɛlɩ́ mɛ́. Sɩ́ŋsʋ́ɔ́la ná cáánɛwa tɩ́ɩ́nɛ́ nɩɛ náŋá mɛ́ kéne wɩ́ɛ́ nɛ́, arɩ́ zɩ́mɩ́ tɩɩ kanɛ́ má wɩ́ɛ́. Ɓa bʋ́l málwere wɩ́ɛ́ kɩŋkáŋ: múúrí tɩɩ wɩ́ɛ́, yaarɩtɩɩna búí wɩ́ɛ́, arɩ́ taŋá há mɔhɛ̃́ rʋ́ʋ́ mɩŋ naŋnɔ́ŋsɛ pɛ́kɛ wɩ́ɛ́. Ɛ́ sɩ́ŋsʋ́ɔ́la ɓɩkana arɩ́ íriŋwa ná náŋa há ká Ɩzɩrayɛl kénnináŋa ɓɩɛ nɩhɩ̃́ náŋá. Sɩ́ŋsʋ́ɔ́la cáánɛ nɛ́ ká rɩ́ nɩɛ bú náŋá, a ka múúríŋ tɩɩ, aá ja táŋa rɩ́ yɛ́rɛ́ arɩ́ zɩmɛ́ tɛ́ŋ wuu mí. Sɩ́ŋsʋ́ɔ́la kɛnɔ́ né púle sɩɛ́ mákɛ jɛɛ ŋmɛ́nɔ nɛ́, aá párá: “Wɩɩsɛ héwífɔ́ɔ́ nɛ́ ká zɩmɛ́ dɩpúli ... ” sapíítir 1. verset 7
Sɩ́ŋsʋ́ɔ́la ná ɓɩkana kéŋ wɩ́nyunni kólli bɛllɛwa nɛ́, ɓa mɔ náŋá, ɓa sʋ́llɛ to mɔlɛ. Tɛ́ŋ nɔ́ŋɔ mɛ́, sɩ́ŋsʋ́ɔ́la ɓɩkana wɩ́nyúú ká balá nɛ́, anɛ: zɩmɛ́ arɩ́ cʋ́llɛ wɩ́ɛ́ (sapíítir 9), hátaŋá mála wɩ́ɛ́ (sapíítir 31), ... Kɛnɔ́ né sɩɛrʋ wɩ́ɛ́ : Zɩmɛ́ jɛɛ wɩ́ɛ́ sapíítir 1-9. Kuóro Salomɔŋ sɩ́ŋsʋ́ɔ́la wɩ́ɛ́ sapíítir 10-29. Aguuri sɩ́ŋsʋ́ɔ́la wɩ́ɛ́ sapíítir 30. Kuóro Lemuyɛl maá cáánɛ wɩ́ɛ́ sapíítir 31.1-31
Sɩ́ŋsʋ́ɔ́la nyʋɔrɛ́
1
1 David há ká Ɩzɩrayɛl kuóro, bio Salomoŋ sɩ́ŋsʋ́ɔ́la.2 Sɩ́ŋsʋ́ɔ́la nyáŋ pá zɩmɛ́ rɩ́ cáánɛ,
a makɛ rɩ́ nɩɛ nɩ́nɛ wɩ́zɩmɛ wɩ́bʋlɛ mʋ́ʋ́la,
3 rɩ́ nɩɛ wólli saŋ cáánɛ ná há wéró,
aá tɩŋ taŋá, aá tʋŋ ɛ́ há cɛ́rɛ́, aá tʋŋ yɛ́rɛ́.
4 Ɓaá pɛ́ nɩɛ ná zɩmɛ́ há múré mí, rɩ́wɔ́ zɩ́ŋwɔ́ tɩɩ kanɛ́,
aá pá heŋbiwafɛlɔ wɩ́ɛ́ zɩmɛ́, rʋ́ʋ́ kɩ́ɛ́lɛ wɩ́ɛ́ káá a.
5 Rɩ́ nɛ́ŋ ná há kéŋ zɩmɛ́ zesi, rʋ́ʋ́ zɩmɛ́ súúri,
ká rɩ́ nɛ́ŋ ná má há kéŋ wɩ́zɩmɛ, zɩ́mʋ́ tɩɩ kanɛ́.
6 Rɩ́wɔ́ wólli sɩ́ŋsʋ́ɔ́la arɩ́ wɩ́bʋlsiké mʋ́ʋ́la aá nɛ,
a wólli zɩmɛ́ tɩ́náwa wɩ́bʋlɛ́ arɩ́ wɩ́gúlle mʋ́ʋ́la aá nɛ́.
7 Nyuutɩna Wɩɩsɛ fɛ́ɛ́ nɛ́ ká zɩmɛ́ púle,
nɩcʋ́llɛ wɩ́bɛ́rɛ nɛ́ ká zɩmɛ́ arɩ́ cáánɛ.
Pɔ́ɩ́ tɩɩ mɛ́ rɩ́ɩ́ heŋbóltɩɛnnɛ
8 Ŋ bio, zésí áná cáánɛ,
ká sɩ́ɩ́ maá má karmɛ́ vɛ́ɛ́ tá;
9 bee wɩ́ɛ́, ɓa sɩ́ nɛ zilé ŋyúbála a bɛ́ɩ́ nyúú mí,
ɛ́rá má bɛŋzɛllɛ ɩ baŋ mɛ́.
10 Ŋ bio, rɩ wɩ́bɔŋ'aará já rɩ́wɔ́ nyɩ́sɩ́,
rɩ́ɩ́ tɩ́ŋwɔ́, a a wɩ́bɔma ɩ sɩ́ sáŋʋ́.
11 Rɩ́ ɓa nɛ́ sɛ́: «Tɩ́ŋrá mɛ́,
ráá mʋ́ féŋsi a ɓʋ́ nɩɛ,
a taalɛ ká nɛrɔ ná má tɩɩ há wɩ wɩ́ɩ́ zɔ́kɛ́;
12 á kɛ́sɩ́wɔ́ ɓɩwómme a haasɛ ɓʋ́, anɛ ɛ́ lɛlɛtɔ́ɔ́ háá ɛ́ɛ́,
a háásɩ́wɔ́ ɓʋ́ pírmé, anɛ nɩɛ ná ɓa háá hé lɛlbule mí.
13 Á sɩ́ ná oŋwere rɩ́wɔ́ duó wuu,
á sɩ́ páwɔ́ ɓɩɛ sú ráá jɩɩsɛ.
14 Á sɩ́ lɩ́sɩ́ ker á wuu pur sɩɛrʋ pɛ́ɩ́,
bee wɩ́ɛ́, á wuu nɛ́ tɩ́wɔ́!»
15 Ŋ bio, sɩ́ ló rɩ́ɩ́ rɩ́wɔ́ tʋŋ ŋmɛ́nɔ mɛ́,
lɩ́sɩ́ naa ɓa naasɛ mɛ́;
16 bee wɩ́ɛ́ ɓa naasɛ dúókó bɔ́ŋbɔ́ŋ har,
ɓa lʋ́ŋ má nɩɛ ɓʋ́ɩ́ mɛ́.
17 Bee wɩ́ɛ́, fíŋfillo háá bélí,
kɛ́ɩ́ híhé bárá rɩ́ɩ́ kánʋ́, wɩ́yɔ́ɔ́ nɛ́.
18 Amá ɓa tɩɩ féŋse ná kɔ́wɔ́ tɩɩ ɓʋ́ɩ́ wɩ́ɛ́ nɛ́,
ɓa tɩɩ mɩɩsɛ lɩ́sɛ wɩ́ɛ́ nɛ́ ɓaá hé ɛ́ báráwa.
19 Ʋ ká ɛ́ nɛ́ a pá nɛ́ŋ ná wuu há có rʋ́ʋ́ tʋŋ gɩrgɩra a ka ɓɩɛ.
Nɛ́ŋ ná háá tʋŋ ɛ́, ʋʋ́ ɓʋ́ʋ́ tɩɩ nɛ́.
Zɩmɛ́ liŋó
20 Zɩmɛ́ nɩ́ɩ́ cáási ŋmɛ́ŋsɛ mɛ́,
ʋ liŋó lɩ́lɛ tɔ́ɔ́ dɩjɛlɛ mɛ́.
21 Ʋ liŋó ísó tɔ́ kʋɔllɛ mɛ́,
a cɛ́ tɔ́ɔ́ dánʋʋsɛ mɛ́, aá búóli, a bʋlɛ́:
22 «Nɩcʋ́llɛ, tɛ́ŋ bee mí rí, rɩ́ɩ́wa tɛ́ɩ́wa cʋ́llɛ ná?
Nɩmɔnna, tɛ́ŋ bee mí rí, rɩ́ɩ́wa tɛ́ɩ́wa nɩɛ mɔmɛ́ ná?
Ɩ́ má bidʋŋsɛ, tɛ́ŋ bee mí rí, rɩ́ɩ́wa tá wɩ́zɩŋ bɛ́rɛ?
23 Ɩ́ zésíŋ cáánɛ!
Ná, ŋ sɩ́ a rɩ́ŋ sabɩɩna túwíwa nyúú,
a a rɩ́ɩ́wa zɩ́mɩ́ŋ wɩ́bʋlɛ́.
24 Bee wɩ́ɛ́ ŋ yɩ́rɩ́wa, ɩ́ vɛ́,
Ŋ tɛ́rɩ́ŋ nɛ́sɛ má ɩ́ rɩ́, nɛ́ŋ wuu wɩ́ŋ rɩ́ɩ́ bélé.
25 Bee wɩ́ɛ́, ɩ́ vɛ́ŋ cáánɛwa wuu ní,
ɩ́ wɩ́ŋ há sɩ́ɩ́wa pɔ́ɩ́wa tɩɩ mɛ́ ná zésé.
26 Ɛ́ nɛ́ tɛ rɩ́ŋ má mɔ́mɩ́wa ɩ́ wɩɩla tɛ́ŋ mɛ́,
ŋ sɩ́ híélíwa, tɛ́ŋ ná mɛ́ héwíŋ ɓɩzeno há sɩ́ kánɩ́wa,
27 tɛ́ŋ ná mɛ́ héwíŋ ɓɩzeno há sɩ́ kóíwa mɛ́ anɛ duópoo,
tɛ́ŋ ná mɛ́ wɩɩla há sɩ́ ko tɔ́ɩ́wa mɛ́ anɛ povílmí,
arɩ́ tɛ́ŋ ná mɛ́ wálmɛ rɩ́ sazɔkɔ́ há sɩ́ péríwa.
28 Ɛ́ mɛ́ nɛ́ sɩɛ́ rɩ́ɩ́wa yɩ́rɩ́ŋ, ká rɩ́ŋ sɩ́ sáŋʋ́;
ɩ́ sɩ́ jáŋ ká sɩ́ŋ ná.
29 Bee wɩ́ɛ́, ɩ́ bɛ́rɛ zɩmɛ́,
ɩ́ wɩ lóé rɩ́ Nyuutɩna Wɩɩsɛ héwíŋ má mɩ́nɩ́ɩ́wa mɛ́,
30 ɩ́ wɩ́ŋ cáánɛ jɛ́ɛ́,
ká gúóníŋ wɩ́makɛ́ ná wuu,
31 ɩ́ tɩɩ mála nɛ́ sɩ́ ɛ́ɩ́wa ɓɩdííli,
ɩ́ tɩɩ cáánɛ má nɛ́ sɩ́ vɔ́ksɩ́wa.
32 Bee wɩ́ɛ́, wɩ́zɩmɛtóówa sʋʋ lɩ́wɔ́ há wɩ wɩ́zɩmɛ kené ní,
nɩcʋ́llɛ yʋ́ksɛ lɩ́wɔ́ há wɩ wɩ́bɩɩnɩ́ kené ní;
33 amá nɛ́ŋ ná háá zésíŋ sɩ́ ná tɛŋfɩ́ɛ́l ʋ dɩmɩnɩ́,
ʋ hiẽsó mí, ʋ wɩ wɩɩla héwíŋ fá.»