ECC 1

Wɩ́zɩnnɔ nʋɔ wɩ́bʋlɛ wɩ́ɛ́

1 Ná wɩ́zɩnnɔ Davidi bio há ká Zerizalɛmɛ kuóro nʋɔ wɩ́bʋlɛ. (Ɛrá má, David bio Kehelɛtɛ há ká Zerizalɛmɛ kuóro nʋɔ wɩ́bʋlɛ.) 2 Wɩ́zɩnnɔ (Kehelɛtɛ) sɛ́:

Wɩ́yɔ́ɔ́wa dʋŋɔ́,

wɩ́ɛ́ ná wuu ká wɩ́yɔ́ɔ́wa! v 3 Tié né nyúú,

tʋtʋmɛ́ ná wuu nɩbiine háá tʋmɛ́,

ɓa nyʋɔrɛ́ nɛ́ ka beewa? 4 Wóó sɩ́ ko a daarɛ,

nɔ́ŋɔ má baá ko a daarɛ,

ka, ɛ wuu dúníé há wɩ tenne. 5 Wɩpomɩ́ sɩ́ póŋ,

a mʋ́ zʋ́,

ka tɔ́ɔ́ mɩŋ pʋ́lɛ mɛ́, ʋ baá pomʋ́ dɩ́pomɩ́. 6 Poo sɩ́ lɛ́ wɩɩsɛ dɩpomɩ́ neduu,

a mʋ́ wɩɩsɛ dɩpomɩ́ nɛgʋɔ,

a lú gʋɔrɛ dɩhɛ̃ wuu, ka há bɩrɛ ko róŋ ná ʋ há lɩɛ́. 7 Fonaasɛ wuu nyii palɔ aá mʋ́ mʋʋ sɩɛrʋ nɛ́,

ka a rɩ́ ɛ wuu, mʋʋ há wɩ nyii vɔkɛ ná abádá.

Bee wɩ́ɛ́, róŋ ná ɓa há lɩɛ́ ko, ɓa bɩrɛ aá mʋ́ róŋ nɩ́. 8 Wɩ́ɛ́ nyáŋ, nɩbiino zɩmɛ́ múró rʋ́ kɩɛlɛ zɩ́ŋwɔ́.

Sɩ́ɛ́ há wɩ belé vɔk ná

ka wɩ́ɛ́ zese a wɩ dɩllɛ má sué ná. 9 Wɩ́fɛ́l toó dunnié né mɩ́,

wɩ́ɩ́ ná fa há lá sɩɛ́ tʋ́ŋ,

ʋ tɩɩ nɛ́ zaa há tʋmɛ́. 10 Dúníé né mɩ́,

beewa ka wɩ́ɛ́ á há sɩ́ bʋlɛ:-

«Wɩ́ɩ́ né ka wɩ́fɛ́l rɛ́!»

fól wuu mɩ́, ɛ wɩ́ɩ́ fa mɩ́nɔ́ rɛ́. 11Nɩbiine wɩ daanɛ kaá sʋ́llɛ dié (tésíé) wɩ́ɛ́,

ɛ nɛ́ tɛ́, wóówa ná há sɩ́ tʋkɛ́,

wa wólli zɩ́ŋ tésíé wɩ́ɛ́,

rɩ́ makɛ pɔ́wɔ́ má tʋkɛ nɩɛ baá.

Wɩ́zɩnnɔ wɩ́ɛ́ zɩmɛ́ nʋɔ mʋɔsɔ

12 Ŋ é, Kehelɛtɛ ŋ dí Ɩzɩrayɛl nɩɛ kuóri Zerizalɛmɛ mɩ́. 13 Ŋ tɩŋɩ́ wɩ́zɩmɛ́ mɛ́ a kɩɛlɛ zɩŋ dúníé wɩ́ɛ́ ná wuu mʋ́ʋ́la,

amá ŋ kɩɛlɛ sɩɛrʋ, ŋ noú rɩ́ Wɩɩsɛ wɩ́állɛ ná wuu ka wɩɩla rɛ́ a pá nɩbiine. 14 Wɩ́ɛ́ ná wuu há tʋ́ŋ tié né nyúú,

ŋ kɩɛ́lɔ ɓa wuu ka wɩ́yɔɔwa,

poo dʋŋɔ́ nɛ́. 15 Oŋhɩl há gʋrɛ, (dahɩl)

nɛ́ŋ baá wʋʋ́ wó tɩɛnnɛ,

ka omo há yʋ́ksɛ́,

ɓa baá wʋ dɩɩsɛ aá hé ɓɩɛ sɩɛrʋ. 16 Ŋ bɩɩnɛ tɩɩ mɛ́ a bʋlɛ́:

Ŋ kɩɛlɛ sɩɛrʋ, kuóre ná wuu há láŋ sɩ́ɛ́ Zerizalɛmɛ mɛ́,

ŋ é wɩ́zɩmɛ́ tʋtʋmɛ́ kɩ́wɔ́ wuu nɩ́,

Ŋ wɩ́zɩmɛ́ rɩ́rɩ́ wɩ́ɛ́ zɩmɛ́ ka caksɛ kɩ́wɔ́ wuu nɩ́. 17 Wɩzɩnnɔ wɩ́állɛ,

rɩ́ nɛrɔ ná há tó wɩzɩnnɔ wɩ́állɛ,

zɩmɛ́ tɩná wɩ́állɛ,

rɩ́ zɩmɛ́ toó nɛrɔ wɩ́állɛ.

Ŋ kɩɛlɛ sɩɛrʋ, ɓa wuu ka wɩ́yɔ́ɔ́wa dʋŋɔ́,

poo nɛ́ tɩwɔ́. 18 Wɩ́zɩmɛ́ kɩ́ŋkaŋ keŋ wɩɩla,

ka nɛrɔ ná há ja rʋ́ zɩ́ŋ wɩ́ɛ́ wuu keri,

ɔsɔ ja wɩhala aá pɔʋ́ tɩɩ.