Cáánɛwa ná kuóro Lemuwɛl maá há pɔ́ʋ́
31
1 Ná cáánɛwa ná, kuóro Lemuwɛl maá há píé cáánʋ́.2 Ŋ bíí, ŋŋ́ bʋl bee ríí pɛ́ɩ́?
Ŋ bilʋlɩ́, ŋŋ́ bʋl bee ríí pɛ́ɩ́?
Ŋ nʋtálɔ bio, ŋŋ́ bʋl bee ríí pɛ́ɩ́?
3 Sɩ́ɩ́ taŋá wuu píí hé háála mɛ́,
ɓa ná háá yéŋŋi kuóre, sɩ́ ló rɩ́wɔ́ wɩ́ɛ́ nɛ́ lɛ́ɩ́ sɩ́ɛ́.
4 Lemuwɛl, dɩ́vɛ́ŋ to kuóre ɓɩ́ɛ́;
sɩ́dííre má rɩ́ sɩduoru nyɔɛ wɩ weri.
5 Bee wɩ́ɛ́, rɩ́ ɓa nɛ́ nyɔ́ɛ́, ɓa sɩ́ sʋ́llɛ wɩ́bilé mí;
ká sɩ́ taŋá má píí pá nɩyaara.
6 Ɓa pí sɩduoru aá pá nɛ́ŋ ná háá já rʋ́ʋ́ sʋwɛ nɛ́,
ká pi dɩvɛ́ŋ aá pá nɛ́ŋ ná sɩɛrʋ há cáásɛ́ zɔkɛ.
7 A makɛ rʋ́ʋ́ nyɔ, a sʋ́llʋ́ yaara mɛ́,
a báá sʋ́ʋ́ wɩɩla wɩ́ɛ́ bɩ́ɩ́nʋ́.
8 Bʋl la wɩnʋ́ɔ́kenéwa tá,
ká la nɩvɛɛtáálɛ má tá.
9 Dí sarɩ́ya rɩ́ taŋá;
a la nɩyaara arɩ́ wɩlnáára tá.
Hásabɩɩna tɩ́na mála
10 Áŋ rɛ́ sɩ́ ná hásabɩɩna tɩ́na?
Ʋ wér kɛ́ baŋzíŋ.
11 Ʋ bála lɔ́ʋ́ dí arɩ́rʋ́ sɩɛrʋ wuu;
ʋ wʋ́ʋ́ bála ɓɩɛ kené aá zɔkɛ.
12 Ʋ hiẽsó mí, ʋ á wérí aá pɔ́ʋ́ bála tápʋ́l wuu,
ʋ wʋ́ʋ́ bála bɔ́ŋbɔ́ŋ ja.
13 Ʋʋ́ ja gɛpúŋ, arɩ́ pelɔ́ŋ
aá yo pɛ́nɛ́wa arɩ́ satɔrɔ́.
14 Ʋ nɩhɩ̃́ báyɛlɛ́ mʋʋdaborzeŋse ní,
ʋ ɓɩdííle lɛ́ dɩbólí ní aá ko.
15 Ʋʋ́ isi rɩ tɔ́ɔ́ ha wɩ pʋ́lɛ́;
aá ɔ́ʋ́ jaa nɩɛ ɓɩdííle
ká makɛ tʋtʋmɛ́ aá pɔ́ʋ́ toltʋnna.
16 Ʋʋ́ bɩɩnɛ baka wɩ́ɛ́, a yɔwɛ;
a a ɓa cɔ́ŋsɛ víínyiwa arɩ́rʋ́ nɛ́sɛ tʋtʋmɛ́ meéwíé.
17 Ʋʋ́ cakɛ tʋtʋmɛ́ cɛ́ rɩ́ dóé ní,
ká wɩ lóé ʋ vaŋsɛ yɩ́yʋɔrɛ.
18 Ʋʋ́ bel rʋʋ tʋtʋmɛ́ cɛ́rɔ́ wérí,
ʋʋ́ tʋŋ tɩ́táŋ má tɩɩ, ʋ caanɔ́ pʋmmɔ mɛ́.
19 Ʋ nɛ́sɛ yíyo gepúŋ,
kɔ́ʋ́ néníwíísi sɩ́sɔ gɛnnɛ.
20 Ʋ tɛ́rʋ́ nɛ́sɛ aá pá nɩyaara,
ʋ nɛ́sɛ dí zilé aá pá wɩlnáára.
21 Waarʋ tɛ́ŋ mɛ́, ʋ wʋ́ʋ́ jaa nɩɛ wɩ́ɛ́ wi,
bee wɩ́ɛ́, ʋ jaa nɩɛ wuu kéŋ gɛnnɛ bɛllɛwa nɛ́.
22 Ʋ tɩɩ nɩ́ɩ́ nyɛ́rʋ́ gɛbaŋsa,
ʋ gɛsuulé wuu ká gɛpúwɩɛlíwie gɛnnɛ arɩ́ gɛfɩɛŋsɛ nɛ́.
23 Nɩɛ́ zílú bála tɔ́ɔ́ sɩ́dííre sɩɛrʋ,
rʋʋ rɩ́ɩ́ tɔ́ɔ́ nɩhɩ́ɛ̃́sɛ nɛ́ kúó ké rɩ́wɔ́ vʋʋrɛ, ʋ kéŋ sɛ́.
24 Ʋ sɔ́ gɛnnɛ aá yɛ́llɛ,
ká yɛllɛ tɩŋa vɔ́ɔ́sɛ má aá pá báyɛlɛ́.
25 Ʋ cáásɔ ka dóé wérí, ká nɩɛ má zízílú kɩŋkáŋ,
cíé wɩ́ɛ́ wʋ́ʋ́ baŋcɩla mɩ́ɩ́ dʋŋ.
26 Ʋʋ́ bʋl wɩ́ɛ́ arɩ́ zɩmɛ́ nɛ́,
kɔ́ʋ́ neŋdulí má ɛ̃ nɩɛ cáánɛ wérí.
27 Ʋʋ́ bélú jaa tʋtʋmɛ́ wuu mí,
ʋ wɩ tɛŋwɩl ɓɩdíílé dí.
28 Ʋ bɛlɛ isi aá bʋ́ʋ́ mɛ́, a bʋ́lʋ́ ná wér,
kɔ́ʋ́ bála má dɩ́dɛ́nnʋ́ a bʋlɛ́:
29 «Háála ɓɩkana mákwɔ́ nɛrɩ́ rɛ́,
amá, ɩ é ní sɩɛ́ kɩ́wɔ́ wuu.»
30 Sɩ́ɛ́ wér ká nɩnyɩsɔ́ rɛ́, háwerí ká ɓɩdaarɩ́ rɛ́;
háálɔ́ ná háá fá Nyuutɩna Wɩɩsɛ, ʋ dʋŋɔ nɛ́ ká ɓɩdɛnnɩ́.
31 Ʋ mɔhɔ̃́ rɩ́wɔ́ síílú, ʋ tʋmɛ́ ná yɩr mɛ́;
ʋ mɔhɔ̃́ rɩ́wɔ́ cɛ́ tɔ́ɔ́ dɩjɛlɛ, a yɛ́ yɩɩla a dɛ́nnʋ́ ʋ wɩ́'állɛ ná wɩ́ɛ́.