Aguuri wɩ́bʋlɛ́
30
1 Yaake bio, Aguuri sɩ́ŋsʋʋ́ɔ́la.Ɛ́ báálɔ wɩ́bʋlɛ́ nɛ́ nyɛ́, ʋ há bʋ́lɛ́ a pá Ɩtɩɛl, Ɩtɩɛl arɩ́ Ukal.
2 Óó, ŋ cʋʋlɛ́ kɛ nɛ́ŋ wuu ní;
ŋ wɩ nɩbíŋ oro wuu wɩ́zɩmɛ kené.
3 Ŋ wɩ zɩmɛ́ jɛ́ɛ́;
ŋ wɩ Wɩɩsɛ nɩtɩ́llɛ wɩ́ɛ́ zɩmɛ́ má kené.
4 Áŋ rɛ́ zɛ́ bána ká bɩr tuwi?
Áŋ rɛ́ kéŋ poo a hóú nɛ́ŋsa mɛ́?
Áŋ rɛ́ kéŋ nyii a hóú gɛrɔ sɩɛrʋ a vɔwɛ?
Áŋ rɛ́ bíl tíé nʋɔ wuu?
Tɩ́na yɩr nɛ́ bee? Ʋ bio má yɩr nɛ́ bee? Mákʋ́ páŋ rɩɩ nɛ́ ʋ̃́.
5 Wɩɩsɛ wɩ́bʋlɛ́ wuu mɔhɛ̃́ laadí;
Ʋ ká hɔkɛ́rɛ nɛ́ a pá nɛ́ŋ ná wuu há yéllú mí.
6 Sɩ́ wɩ́ɩ́ súúrú, ʋ wɩ́bʋlɛ́ mɛ́;
rʋ́ʋ́ háá sɩ́ ɛ́ sáŋ pɛ́ɩ́, ká bʋlɩ́ ká nyɛtɩ́ŋ.
7 Ŋ Wɩɩsɛ, ŋŋ́ sʋ́lɩ́ rɩ́ɩ́ a wɩ́ɛ́ bɛllɛ páŋ,
ɔ́wɔ́ páŋ rɩ́ŋ ha wɩ sʋ́wɛ́:
8 Ka gɩ́ŋgɩ́rmʋ arɩ́ nyɩɛrʋ kɛ́kɩŋ mɛ́,
sɩ́ŋ yaara mí hé, sɩ́ŋ kuorí má sɩɛrʋ hé;
páŋ ɓɩdííli ná há mɔhɩ́ŋ díí dʋŋɔ nɛ́.
9 Rɩ́ŋ háá ko vɔkɛ a daarɛ, a vɛ́ɩ́ tá ;
ká bʋlɛ́: «áŋ rɛ́ ká Nyuutɩna Wɩɩsɛ,»
Ɛ́ rá má rɩ́ŋ háá yaarɛ a daarɛ, a gúl ká ga,
a zɔ́kɩŋ Wɩɩsɛ yɩr.
10 Sɩ́ tʋtʋnnɔ rɩ́rʋ́ nɔhɔ̃́ káá vɔwɛ náŋá mɛ́;
rɩ́ tʋtʋnnɔ ná háá ko bʋrɛ héí mí, ká rɩ́ɩ́ nɛ́ cɩ́ɩ́nɛ zɔ́krʋ.
11 Nɩɛ náŋá bʋ́rɔ́ aá héwó ánáwa mɛ́,
ká wɩ wérí má bʋ́lɛ́ aá pɔ́wɔ́ maáwa.
12 Nɩɛ náŋa tɩɩ sɛ́ rɩ́ ɓa wɩ busunnu kené,
ká wʋ́ɔ́ busunnu mʋ́ʋ́rɛ́.
13 Nɩɛ náŋa nyʋkɔ kɩ́wɔ́ tɩɩ;
ká ka nɩguonó má.
14 Nɩɛ náŋa nyɩla nɩhɩ̃́ tókowíé ní,
ká ɓa tayááwa nɩhɩ̃́ siisi,
ɓa kaá ɓʋ́ʋ́sɛ wɩlnáára, rɩ́wɔ́ nyɩ́ɩ́kɛ tíé nyúú,
ká rɩ́wɔ́ a rɩ́ nɩyaara yɩr sɩ́ yɩ́rʋ́, nɩbííne sɩɛrʋ.»
Sɩ́ŋsʋ́ɔ́la ná háá bʋl onni dɩɩsɛ wɩ́ɛ́
15 Dɩmáló nʋʋsɛ nɛ́ bɛllɛ: nɔ́ŋɔ́ cɔ́ rɛ́, nɔ́ŋɔ má cɔ́ rɛ́.
Onni botoro rí ráŋ, a wɩ ŋ mɔhɔ̃́ ɛ̃,
baná má tɩɩ, há waá bʋlɛ́: «Á vɔ́ksɔ́».
16 Ɓa nɛ́ ká: Lɛlɛtɔ́ɔ́, hápɩrɛ,
Tíé há wɩ nyií vɔkɛ
Níŋ, há wɩ ŋ mɔhɔ̃́ ɛ̃.
17 Bio ná sɩ́ɩ́ há wʋ́ʋ́ áná sú,
a wʋ́ʋ́ maá zíl,
polcʋ́ɔ́rɛ bʋ́ŋgááwa nɩ́ɩ́ tóksú sɩ́ɛ́,
ká rɩ́ kiesí bɛlɛ dúú.
18 Wɩ́ɛ́ botoro rɩ́ mɩnɛ́ a kɩ́llɩ́ŋ zɩmɛ́,
Baná má tɩɩ, ŋ wʋ́ɔ́ mʋ́ʋ́la nɛ́:
19 Kiesí tuuló bána nyúú,
Dʋŋ tuuló bʋ́ɩ́ daha,
Nyiidabore tuuló mʋʋ nyii daha,
Arɩ́ báálɔ há pɛ́ toopero tuuló ʋ mɛ́.
20 Hácɔrmɔ málá nɛ́ nyɛ:
Ʋʋ́ pɛ́ báálɔ, ká mʋ́ʋ́rʋ́ tɩɩ
ká bʋlɛ́: «Ŋ wɩ wɩ́bɔ́ŋ ɛ́ɛ́.»
21 Wɩ́ɛ́ botoro ríí vúkmi tɔ́ɔ́,
Ɓa nɛ́ baná má tɩɩ, ʋ há wʋ́ɔ́ wuó nyammɛ:
22 Ɓa nɛ́ ká yómo há dí tɔ́ɔ́ kuorí,
Nɩcʋʋlɛ́ há díé vɔkɛ a kɩ́llʋ́ tɩɩ,
23 hábɛ́rɛ má há ná bála a ja,
arɩ́ toltʋtʋnnɔ há lɔ́ʋ́ jaamaá jaa dí.
24 Balwíísi baná rɩ́ mɩŋ tíé nyúú, ɓa múúró wérí,
amá ɓa cáásɔ ka zɩmɛ́ wérí, ɓá nɛ́ ká:
25 Cuŋcume, ɓa wɩ dóé kené,
amá, ɓaá tʋ́ɔ́lɩ́wɔ́ ɓɩdííle ɓɩɛ kʋsɛ́ tɛ́ŋ mɛ́ nɛ́.
26 Balla ná ɓa háá yɩ́rɛ aára wɩ dóé kené,
Káá lɛ́sɩ́wɔ́ bʋɔnnɛ bʋ́ɔ́ pɛ́ksɛ.
27 Hʋ́ɔ̃́yórówa, há wɩ kuóro kené
Ká hé lɛ́ɛ́wa vɩ́va,
28 Cɩ́ŋcɩwɩ́, ɩ wóú aá ká arɩ́ nɛ́sɛ,
Ká ʋʋ́ zʋ kuóre jɩɩsɛ.
29 Pʋsɛ botoro rɩ́ mɩŋ ráŋ, ɓa valɛ́ a wérí,
Baná má tɩɩ, ɓa haŋpɔnaa bilé ɔ́ʋ́ dʋŋɔ.
30 Ɓa nɛ́ ká: Kɩ́ŋkáná, baka áŋwóŋ,
Ʋ wɩ hár nʋkɛ nɛ́ŋ sɩ́ɛ́ mɛ́,
31 Zíɓelo háá hóŋŋú tɩɩ, ɛ́ rá má bʋŋgboko,
Arɩ́ kuóro háá nʋ́ɔ́lʋ́ lalyóóre sɩɛrʋ.
32 Rɩ́ cʋ́llɛ nɛ́ ɛ́ɛ́ rɩɩ mákɩ́ tɩɩ a daarɛ,
ká rɩ́ɩ́ ko kɩ́ɛ́lɛ a zɩŋ, ɩ zɩ́mɩ́ nʋɔ kanɛ́.
33 Bee wɩ́ɛ́, rɩɩ nɛ́ pírmí nɛ'ɩ́l, ɩɩ́ lɩ́sɛ nʋʋ nɛ́,
rɩɩ nɛ́ ŋmɔ́wɛ́ mɩɩsɛ mɛ́, cɛ́l nɩ́ɩ́ lɩɛ́,
ká rɩ nɛrɔ cɔ́ɛ́ wɩ́ɔ́, ʋʋ́ hé nɛsɛ nɛ́.