29
1 Nɛ́ŋ ná ɓa há cáánɛ kɔ́ʋ́ waá zesi,ʋ zɔkɛ́ ká naasɩ́ balá nɛ́; lúrí toó aá kɛ́rɛ.
2 Rɩ́ nɩtaŋáwa nɛ́ kéŋ tíŋ, nɩɛ jʋ́ɔ́sɛ́ nɛ́;
amá rɩ sahɔɔtɩɩnɔ nɛ́ dí sɩ́ɛ́ , nɩɛ híĩ́ní ní.
3 Nɛ́ŋ ná há có zɩmɛ́, ʋ áná satɔrɔ́ nɛ́,
amá nɛrɔ ná háá zʋ labʋ́ɩ́díwa jɩɩsɛ, ʋʋ́ zɔ́kʋ́ ɓɩɛ nɛ́.
4 Kuóro ná há có yɛ́rɛ́, ʋ nɩ́ɩ́ ɔsɛ tɔ́ɔ́;
amá ʋ ná há có loŋpówa kɩŋkáŋ lɛɛ, ʋ ká tɔ́zɔkrɔ nɛ́.
5 Nɛ́ŋ ná háá nyɩ́sʋ́ nɔ́ŋɔ,
ʋ hé bárá nɛ́, ʋ tɩɩ naasɛ mʋ́l.
6 Nɩbɔmɔ wɩ́bɔmɔ sɩɛrʋ, bárá nɛ́ ráŋ;
amá nɩtaŋá éé jʋɔsɛ satɔrɔ́ sɩɛrʋ nɛ́.
7 Nɩtaŋá ɛ̃ nɩyaara wɩ́jaalɩ́;
amá sahɔɔtɩɩnɔ wɩ ɛ́ wɩ́zɩmɛ kené.
8 Nɩmɔnná vúkmi tɔ́ɔ́;
amá zɩmɛ́ tɩ́náwa éé pɔrɛ cɔ́ɛ́ nɛ́.
9 Zɩmɛ́ tɩ́na rɩ́ nɩcʋʋlɛ́ há kéŋ sarɩ́ya;
rɩ zɩmɛ́ tɩ́ná dí cɔ́ɛ́, rʋ́ʋ́ mɔ́mʋ́, ʋ wɩ tɛŋfɩ́ɛ́l ná.
10 Nɩɓʋ́ʋ́ra bɛ́rɛ nɩtékétéké;
amá nɩyɛ́rɛ́wa éé cóú.
11 Nɩcʋʋlɛ́ é bʋ́lʋ́ sɩɛrʋ wɩ́ɛ́ wuu ní;
amá zɩmɛ́ tɩ́na ʋ́ʋ̃́ tɩɩ kanɛ́, ʋ sɩɛrʋ wɩ́ɛ́ waá nyɩɩsɛ.
12 Rɩ sɩ́dííro níí zesi nyɛwɩ́ɛ́;
ʋ hatɩŋna wuú bɩrmɛ sahɔɔtɩɩna nɛ́.
13 Nɩyaarɔ arɩ́ wɩ́zɔkrɔ wɩ́ɩ́ nɛ́ ká balá;
Nyuutɩna Wɩɩsɛ nɛ́ púrwó wuu bɛllɛ sɩ́ɛ́, ɓa nɩ́ná ráŋ.
14 Kuóro ná háá dí nɩyaara sarɩ́ya a pi taŋá aá pɔ́wɔ́; ʋ kuorí sɩ́ ka dóé dɩŋɛ́.
15 Daa arɩ́ tʋrɛ́ nɩ́ɩ́ pá zɩmɛ́;
amá bio ná ɓa há píé tá ʋ tɩ́llʋ́ tɩɩ, ʋ kɔ́ʋ́ maá hɩɩ̃sɛ nɛ́.
16 Rɩ sahɔɔtɩɩna nɛ́ púlé, wɩ́bɔma maá púl ní;
amá nɩtaŋáwa sɩ́ ná zɔ́krʋ ná há sɩ́ peri sahɔɔtɩɩna ná.
17 Cáánɩ́ bio, ɩ sɩ́ ná tɛŋfɩ́ɛ́l;
ʋ sɩ́ a rɩ́ɩ́ ná wér kɩŋkáŋ.
18 Rɩ wɩ́náálɛ nɛ́ toó, nɩɛ yéŋŋó;
amá nɛ́ŋ ná háá tɩŋ wɩ́bilé, ʋ ná wér.
19 Ɓa wɩ yómó cáánɛ arɩ́ wɩ́bʋlɛ́;
rʋʋ nɩ́wɔ́ mʋ́ʋ́la má, ʋ waá tɩŋ.
20 Rɩɩ ná nɛrɔ rʋʋ wɩ bɩ́ɩ́nɛ́ kaá bʋl wɩ́ɛ́;
ɩ ka nɩcʋʋlɛ́ yɩɛla a kɩ́llʋ́.
21 Rɩɩ nɛ́ sʋ́ɔ́rɩ́ tʋtʋnnɔ, rʋʋ ká heŋbíé;
ʋʋ́ kó bɩrmɛ kéké nɛrɔ nɛ́.
22 Cɔ́ɛ́ tɩ́ná lɔkɛ nɛsɛ nɛ́;
nɛnaarɔ wɩ́zɔkɛ́ káŋ.
23 Nɩbííno nyʋkɔ nɩ́ɩ́ múúrú;
amá tɩɩ múúre sabɩɩna, ʋ nɩ́ɩ́ pá nɛrɔ píŋ.
24 Nɛ́ŋ ná há tɔ́ gaarɔ mʋ́l mɛ́, ʋ bɛ́ŋsʋ́ tɩɩ,
ʋ há nɛ́ bʋra wɩ́ɛ́ ká táŋŋʋ́ nʋɔ.
25 Nɛ́ŋ ná háá fá nɩbííno héwíŋ, ʋ ɛ́ ká bárá nɛ́;
amá nɛ́ŋ ná há yéllí Nyuutɩna Wɩɩsɛ mɛ́, ʋ kéŋ tɛŋfɩ́ɛ́l.
26 Nɩɛ ɓɩkaná já rɩ́ sɩ́dííro bʋlɛ rɩ́wɔ́ ká nɩtaŋáwa nɛ́;
amá nɛrɔ wuu nɩtáŋnɛ lɛ Nyuutɩna Wɩɩsɛ nɛ́.
27 Nɩtaŋáwa bɛ́rɛ nɩbɔmɔ;
ká sahɔɔtɩɩna má bɛ́rɛ nɩyɛ́rɛ́wa.