28
1 Sahɔɔtɩɩnɔ tɩɩ nɩ́ɩ́ fɛ́ɛ́, nɛ́ŋ wʋ́ʋ́ kiri,nɩtaŋá beŋtu pɩ́rɔ́ anɛ kɩ́ŋkaŋɓʋɔl nɛ́.
2 Rɩ tɔ́ɔ́ nɩɛ nɛ́ ísé cɛ́ náŋá mɛ́, ʋ sɩ́dííre káŋ;
amá rɩ tɔ́ɔ́ sɩ́dííro nɛ́ kéŋ wɩ́zɩmɛ arɩ́ zɩmɛ́, ʋ kuorí dáánʋ́.
3 Nɩyaarɔ ná háá bɛ́ŋsɛ nɛ́múrtɩɩna;
ʋ nɩhɩ̃́ duózeno háá zɔkɛ oŋkʋsɛ́ nɛ́.
4 Nɩɛ ná há vɛ́ wɩ́bilé, sahɔɔtɩɩnɔ nɛ́ ɓaá píŋsi;
amá nɩɛ ná háá tɩŋ wɩ́bilé, ɓa bɛ́rʋ́ nɛ́.
5 Nɩbɔma wɩ táŋa ɛ̃;
amá nɩɛ ná háá ja Nyuutɩna Wɩɩsɛ, ɓaá nɛ wɩ́ɛ́ wuu mʋ́ʋ́la.
6 Yaarɩtɩɩnɔ háá tɩŋ tékétéké;
ʋ nɛ́ cícó ɓɩɛ tɩ́ná háá tʋŋ gɩragɩra.
7 Bio ná háá saŋ wɩ́bilé nɛ́ ká wɩ́zɩnnɔ;
amá bio ná háá tɩŋ nɩlɩɩlɛ́ mɛ́, ʋʋ́ hɩ́ɩ̃́sʋ́ áná nɛ́.
8 Nɛ́ŋ ná kuóɓɩɛ háá pulé, a tɩŋ nyii ná arɩ́ dɔwɛ ná ʋ háá sákʋ́ kɩma daha wɩ́ɛ́;
ʋ já ɛ́ oŋkana aá bil nɛ́ŋ ná háá fá nɩyaara susu mí ní.
9 Rɩ nɛ́ŋ rɩ́ á dɩlhɔɔ, a wɩ wɩ́bilé zesi;
ʋ wɩsʋlɔ́ má tɩɩ ká wɩ́bɔ́ŋ rɛ́.
10 Nɛ́ŋ ná há yíkí nɩɛ ná háá tʋŋ yɛ́rɛ́ aá hé ŋmɛ́ŋbɔmɔ mɛ́, ɓaá yʋ́ksɛ,
butuo ní ʋ lúlú, ʋ tɩɩ sɩ́ ɓálʋ́ sɩɛrʋ;
amá nɩtékétékéwa nɛ́ tɛ wér.
11 Ɓɩɛ tɩ́na púú tɩɩ makɛ zɩmɛ́ tɩ́na nɛ́;
amá nɩyaarɔ wɩ́zɩmɛ nɩ́ɩ́ lɩ́sʋ́ mʋ́l.
12 Rɩ nɩtáŋáwa nɛ́ dí ballɩ́ ʋ kéŋ yɩr;
rɩ sahɔɔtɩɩna nɛ́ díé; nɛ́ŋ wuu féŋsú tɩɩ nɛ́.
13 Nɛ́ŋ ná há kenú wɩ́zɔkɛ́ aá féŋsi, ʋ wɩ́ɛ́ waá ɔsɛ;
amá nɛ́ŋ ná há sáŋʋ́ wɩ́zɔkɛ́, a pii tá, nɩ́ɩ́ ná suúri hé.
14 Nɛ́ŋ ná háá fá bɔ́ŋbɔ́ŋ ɛɛ héwíŋ tɛ́ŋ wuu mí, ʋ ná wér;
amá nɛ́ŋ ná dɩllɛ há háákɔ́, wɩɩla nɩ́ɩ́ púú.
15 Sahɔɔtɩɩnɔ há dí nɩyaara sɩ́ɛ́ aá bɛ́ŋsɩ́wɔ́;
ʋ nɩhɩ̃́ kɩŋkáná háá uuré ní, ɛ́ rá má úrsi ná losu há kené.
16 Sɩ́dííro ná há wɩ wɩ́zɩmɛ kené, ʋ wɩ́zɔkɛ́ káŋ;
amá nɛ́ŋ ná há wɩ gɩragɩrá ja, ʋ sɩ́ ka mɩgbó.
17 Nɛ́ŋ ná há ɓʋ́ʋ́ nɔ́ŋɔ, ʋ fɔ́ʋ́ aá jɔ́ʋ́ lɛ́lbule ní;
nɛ́ŋ sʋ́ʋ́ mɛ́ kɛ́rʋ́!
18 Nɛ́ŋ ná há pí tékétéké ŋmɛ́nɔ, ʋ sɩ́ ná laatɛ́,
amá nɛrɔ ná há pí ŋmɛ́ŋgólle bɛllɛ, ʋ sɩ́ ɓal nɔ́ŋɔ sɩɛrʋ.
19 Nɛ́ŋ ná háá párʋ́ baka, sɩ́ dí ɓɩdííle vɔkɛ.
amá nɛ́ŋ ná háá kiri wɩ́yɔ́ɔ́wa har, yaara sɩ́ vɔ́kʋ́.
20 Nɩtaŋá nɩ́ɩ́ ná bárkawa kɩŋkáŋ;
amá nɛ́ŋ ná háá ja kuorí kɩ́kɛ́lɛ́, bɛŋsɛ́ wʋ́ʋ́ muri.
21 Nɩtʋɔsɔ́ wɩ weri;
ká nɛrɔ nɔ́ŋɔ tɩŋ ɓɩdííli mʋɔ́ wɩ́ɛ́, a aá zɔkɛ.
22 Sɩ́ɩ́ tɩ́na kíró aá ja ɓɩɛ nɛ́;
ká wɩ ɛ̃ rɩ́ yaara sɩ́ púú.
23 Nɛ́ŋ ná há cáánɛ nɛrɔ, ʋ sɩ́ la yɩr tenné mí;
a kɩ́llɛ nʋŋmɔ́ŋtɩɩnɔ.
24 Nɛrɔ ná háá zɔ́kʋ́ áná rɩ́rʋ́ maá ɓɩɛ,
ká bʋlɛ́: “Ʋ to wɩ́bɔ́ŋ”,
ʋ ká zɔkrɔ naŋnɔ́ŋɔ nɛ́.
25 Safʋ́ʋ́nɩ́tɩɩnɔ, ʋʋ́ lɔkɛ nɛsɛ;
amá nɛ́ŋ ná há púú tɩɩ a yelli Nyuutɩna Wɩɩsɛ mɛ́, ʋ mɩŋ oŋkana sɩɛrʋ.
26 Nɛ́ŋ ná há kenú tɩɩ yɩɛla, ʋ cʋ́ʋ́lɔ́ nɛ́;
amá nɛ́ŋ ná háá valɛ́ arɩ́ zɩmɛ́, ʋ sɩ́ ná laatɛ́.
27 Nɛ́ŋ ná háá dɩ́ɛ́sɛ nɩyaarɔ, ʋ nɛ́sɛ waá kaasɛ;
amá sɩ́nyúmme tɩ́na, bʋrkana níí dúú.
28 Rɩ sahɔɔtɩɩna dí dóé, nɛrɔ wuú féŋsú tɩɩ nɛ́;
ká rɩ ɓa nɛ́ sʋ́sɛ́, nɩtaŋáwá púl ní.