Rɩ́ Mɩ́máárɔ́ lá píŋ
104
1 Ŋ dʋma, bɛ́ Nyuutɩna Wɩɩsɛ mɛ́.Nyuutɩna Wɩɩsɛ, ŋ Wɩɩsɛ, ɩ zeno kɩ́ŋkáŋ.
Tʋ́lɛ́ arɩ́ wér tɔ́ɩ́ mɛ́,
2 pʋmmɔ tɔ́ɩ́ mɛ́ kooti gɛsuo,
ɩ jɛ́rɛ bána anɛ taŋtɛ.
3 Ɩ dɩmɩnɛ́ mɩ́ŋ nyii daha nɛ́;
duobasɛ nɛ́ kɛ́ɩ́ torko;
poo kíŋdérú ní kéní aá va.
4 Poo (poowa>>) nɛ́ kɛ́ɩ́ nɩtʋmɛ́,
ká níŋpoo (níŋpoowa>>) ɛ́ɩ́ tʋtʋnna.
5 Ɩ nɛ́ ɛ́ɛ́ tíé cɩ́nʋ́ naasɛ daha,
ʋ waá lekli, a káá mʋ́ wuu.
6 Ɩ ɔ́ɔ́ nyiluŋe tɔ́ʋ́ mɛ́ anɛ gɛsuo;
nyii fá mɩ́ŋ pallɛ daha nɛ́.
7 Ɩ wɩ́ɛ́ gáásɛ nɛ́ ɓa kʋ́ʋ́rɛ,
ɩ doɓɛllɛ liŋó héwíŋ há kéŋwó wɩ́ɛ́,
8 ɓa daarɛ pallɛ mɛ́ a pal tuwi polli sɩɛnnɛ
a mʋ́ ráŋ ná ɩ há vɔwɛ rɩ́wɔ́ mɩ́ŋ.
9 Ɩ hé súsúbʋɔ pá nyii ʋ wɩ mɔhɛ̃́ rʋ́ʋ́ daarʋ mɛ́;
ʋ báá wáá bɩrko tɔ́ tíé mí.
10 Ʋ nɛ́ lɩsɛ nyibulsɩ́ɛ́ nyii aá hé nyipalnaasɛ mɛ́,
ʋ tɩ́ŋ pallɛ pɛ́ksɛ aá va;
11 balla wuu nyɔ́wɔ́ nɛ́,
baka kokusi nyinyʋ́ɔ́sɛ dɩtenní ní.
12 Fíŋfille cɛ́wɔ́ dallɛ ɓa laka nɛ́,
aá gɔkɛ tupaarʋ sɩɛnnɛ.
13 Wɩɩsɛ míŋ bána nyúú ʋ jaa sɩɛrʋ ɛ́ nɛ́
ká a pallɛ nyinyɔ nyii,
ɩ tʋtʋmɛ́ yɩr mɛ́ nɛ́ tíé dí ɓɩɛ aá vɔkɛ:
14 ɩ ɔ́ɔ́ nyɔɔ nyʋ́ a pá pʋsɛ,
tuuni mɩ́ŋ nɩbííno dɩdɩ́ɩ́sɛ,
a tɩ́ŋ ɛ́ mɛ́ aá nóú nʋɔ ɓɩdííli tíé nyúú.
15 Dɩvɛ́ŋ hé satɔrɔ́ aá pá nɩbííno,
a a nɩbííne sɩ́ɛ́ tʋ́l aá kɩllɛ nʋʋ.
Ɓɩdííli pá nibííno dóé.
16 Nyuutɩna Wɩɩsɛ tuuni ná,
arɩ́ Lɩɩbaŋ sɛɛdɩrɛwa ná ʋ há cɔ́ŋsɛ, ɓáá vɔksʋ́.
17 Ráŋ nɛ́ diíwiisi cɩcɛ́wɔ́ dallɛ,
diíwie ná ɓa háá yɩrɛ sɩɩgɔnyɛ cɔ sɩɩprɛsɛwa sɩɛnnɛ nɛ́.
18 Baka bʋnnɛ dɩfeŋse ní ká pallɛ ná ise sɩɛrnnɛ,
damaawa má jɩɩsɛ nɛ́ ká bʋ́ɩ́ bɔnnɛ.
19 Ʋ nɛ́ a cana, ɓa tɩ́ŋʋ́ mɛ́ aá dɩɩsɛ caŋdiile tápʋ́lɛ,
arɩ́ wɩpomí há ʋ̃́ tɛ́ŋzʋʋlɩ́.
20 Ɩ nɩ́ɩ́ ká bino, tɔ́ɔ́ biri,
baka balla wuu isi aá gʋ́ɔ́rɛ.
21 Kɩ́ŋkánáwa wiwi namɩ́ɛ́ wɩ́ɛ́,
a sʋ́l Wɩɩsɛ aá jáwɔ́ ɓɩdííle.
22 Wɩɩsɛ mɩ́ŋ pɔsɛ mɛ́ nɛ́ ká
ɓa há zʋ́wɔ́ dɩpɩ́ŋsɛ a pɛ́,
23 ká nɩbííno lɩɩ mɩ́nʋ́ tʋtʋmɛ́,
a tʋ́ŋ a kaá já gbaanɛ.
24 Nyuutɩna Wɩɩsɛ, ɩ wɩ́állɛ sɩɛ́ kánɔ́.
Zɩ́mɛ́ nɛ́ ɩ kaa ɔ́wɔ́ wuu,
ɩ oŋ'máálɛ nɛ́ sú tíé wuu.
25 Ná mʋʋ zeŋ arɩ́rʋ́ jɛ́l há mɔ́ ɛ́,
ballɩwɩ́ɛ́la arɩ́ ɓɩzeŋsi,
há wɩ nʋɔ kéné, mɩ́nʋ́ sɩɛrʋ.
26 Mʋdaborizeŋse tɩ́ŋ ráŋ a mʋ́ kaá ko,
mʋʋ sɩɛrʋ oŋbérmi ná ɩ há mɛ́ɛ́ má gber dɩgbé ní.
27 Ɛ́ balla wuu yɩ́ɛ́la mɩnɩ́ rɩ́ nɛ́,
rɩ́ɩ́ pɔ́wɔ́ ɓɩdííli tɛ́ŋ ná há cɛrɛ mɛ́:
28 rɩ́ɩ́ pɔ́wɔ́ rɩ́wɔ́ la,
rɩ́ɩ́ wurí nɛ́sɛ rɩ́wɔ́ dí a vɔksɛ.
29 Rɩ́ɩ́ tɔ́ɩ́ sɩ́ɛ́, héwíŋ káŋwɔ́ nɛ́;
rɩ́ɩ́ nɛ́ láwɔ́ mɩɩsɛ, ɓáá sʋsɛ nɛ́
a bɩrzʋ́ tíé.
30 Rɩ́ɩ́ nɛ́ páwɔ́ mɩɩsɛ, ɓáá mɩnʋ́ nɛ́,
ɩ nɩ́ɩ́ a tíé nyúú onni wuu a oŋfɛlɛ.
31 Rɩ́ Nyuutɩna Wɩɩsɛ píŋ a káá mʋ́ wuu,
rɩ́ Nyuutɩna Wɩɩsɛ jʋ́ɔ́sʋ́ wɩ́állɛ ná yɩr mɛ́.
32 Rʋ́ʋ́ nɛ́ gɩɛnɛ tíé, ʋʋ́ zikli ní;
rʋ́ʋ́ nɛ́ tɩkɛ pallɛ mɛ́, nyʋɔsɛ nɩ́ɩ́ lɩ́ɛ́.
33 Ŋ sɩ́ dɛnnɛ Nyuutɩna Wɩɩsɛ ŋ hiẽso wuu mí,
ŋ sɩ́ bɛ́ŋ Wɩɩsɛ mɛ́ ŋ tápʋ́lɛ ná há kaanɛ sɩɛrʋ.
34 Rɩ́ŋ gɔkɩ́ ná ká satɔrɔ́ a pɔ́ʋ́.
ká rɩ́ Nyuutɩna Wɩɩsɛ má ló rɩ́ŋ sɩɛrʋ tɔrɛ.
35 Rɩ́ wɩ́bɔ́ŋ'aara nyɩɩkɛ tíé nyúú,
rɩ́ taŋá too nɩɛ báá sɩ́ mɩnʋ́.
Ŋ dʋma, píŋsi Nyuutɩna Wɩɩsɛ.
Aleluya (Rɩ́ Wɩɩsɛ lá píŋ).