Ŋ sɩ́ dɛnnɛ Nyuutɩna Wɩɩsɛ rɩ́ taŋá
103
1 Davidi yɩl.Ŋ dʋma, bɛ́ Nyuutɩna Wɩɩsɛ mɛ́,
rɩ́ŋ sɩɛrʋ wuu bʋ́ʋ́ yɩr ná há kɔ́ʋ́ mɛ́.
2 Ŋ dʋma, bɛ́ Nyuutɩna Wɩɩsɛ mɛ́,
ká sʋ́ʋ́ wɩ́wéré ná oro wuu mí sʋ́llʋ́.
3 Ʋ nɛ́ héí wɩ́bɔma wuu suúri,
ká vaarɩ́ dɩwɩɩla wuu.
4 Ʋ nɛ́ yɔ́wɛ́ lɛ́ɩ́ mɩɩsɛ bʋɔ mɛ́,
ʋ nɛ́ pi nɩcɩtɩkɔ́ arɩ́ sussufɔ́ɔ́ a cú pɛ́ɩ́.
5 Ʋ nɩ́ɩ́ pɛ́ɩ́ dofɛlɛ,
ɩ bɩr aá hírsi anɛ basɩ́ɛ́.
6 Nyuutɩna Wɩɩsɛ tʋ́ŋ taŋá,
ʋ tʋ́ŋ yɛ́rɛ́ a pá nɩɛ ná ɓa háá vɩrɛ́.
7 Ʋ makʋ́ ŋmɛ́ŋsɛ a pá Moyizi
ká a Ɩzɩrayɛl nɩɛ nóú wɩ́zeŋse.
8 Nyuutɩna Wɩɩsɛ kéŋ susúfɔ́ɔ́ arɩ́ sawér,
ʋ kéŋ nɩcɩtɩkɔ́, ʋ cɔ́ɛ́ fɩɩlɔ́.
9 Ʋ wɩ bɔmɩ́ píé a pá nɛ́ŋ dɩŋɛ,
ʋ sagʋ́ʋ́ma to déŋdéŋ.
10 Ʋ wɩ́rá bɛ́ŋsɛ aá cɛ́rɩ́rá wɩ́bɔma,
ʋ wɩ́rá wɩ́zɔkɛ́ kɩ́ŋ píé aá tuŋrá mɛ́.
11 Anɛ ɛ́ bána ísé há kɛ́ tíé,
ʋ nɩcɩtɩkɔ́ ísé ká ɛ́ nɛ́ a pá nɩɛ ná háá fɔ́ʋ́.
12 Anɛ ɛ́ wɩɩsɛ dɩpomí arɩ́rʋ́ dɩzʋʋlɩ́ pɛ́kɛ há bole,
ʋ kéŋrá wɩ́bɔma kɛ́kɩ́rá mɛ́ a mɔ́ ɛ́ nɛ́.
13 Áná há cóú bɛlɛ ɛ́,
Nyuutɩna Wɩɩsɛ có nɩɛ ná háá fɔ́ʋ́ ɛ́ nɛ́;
14 ʋ ɩ̃́ cʋʋ ná há má ráá weri,
ʋ wɩ sʋllɛ rɩ́ ráá ká kúŋkul.
15 Nɩbííno yaa! ʋ tápʋlɛ nɩhɩ̃́ nyɔ́ɔ́ nɛ́;
ʋʋ́ yieri anɛ baka nyɔfɩl nɛ́:
16 poo lúí ní ká daanɛ, rʋ́ʋ́ nyɩɩkɔ́,
kɔ́ʋ́ fá há mɩ́ŋ dɩhɩ̃́ ná sʋllʋ́ wɩ́ɛ́.
17 Amá Nyuutɩna Wɩɩsɛ nɩcɩtɩkɔ́ ná
há mɩnɛ́ fól wuu, \qhá mɩnɔ́ a pá nɩɛ ná háá fɔ́ʋ́,
kɔ́ʋ́ taŋá mɩ́ŋwɔ́ bɛlɛ má bɛlɛ yɩr mɛ́,
18 a mɩ́ŋ nɩɛ ná há cɩ́nɛ́ tɩ́kʋ́ nʋtʋmɛ ná,
aá jɔ́ʋ́ wɩ́mkɛ́ ná tɩŋɛ́ yɩr mɛ́.
19 Nyuutɩna Wɩɩsɛ cíksú kuóɓasa bána nyúú,
ʋ kuorí kɛ́ oŋ wuu.
20 Ɩ́ é, ʋ malkawa ná,
há ká bɩbará aá tɩŋʋ́ wɩ́bʋlɛ,
há wɩ lóé rʋ́ʋ́ nʋɔ ɓɩbal tíé rɩ́ɩ́wa wʋ́ʋ́ zile,
ɩ́ bɛ́ Nyuutɩna Wɩɩsɛ mɛ́.
21 Ɩ́ é wuu há kɔ́ʋ́ lalyoore,
a ɔ́ʋ́ tʋtʋnna aá tʋ́mʋ́ colle,
ɩ́ bɛ́ Nyuutɩna Wɩɩsɛ mɛ́.
22 Ɩ́ é wuu há kɔ́ʋ́ oŋmáálɛ,
a mɩnʋ́ dɩtɩ́llɛ wuu mí, ɩ́ bɛ́ Nyuutɩna Wɩɩsɛ mɛ́.
Ŋ dʋma, bɛ́ Nyuutɩna Wɩɩsɛ mɛ́.