Ok Pokposun
pasal sog Ikosolobuk Sulat tidu ni Petros
Mga pigilugan,
Salam diniyu kotanan.
Yonin kini ong mopolok nok pokposun pasal sog ikosolobuk sulat ni Petros nok posunguꞌ niyu bastahon. Misulat kini sog daꞌ pa kosaut 30 tahun tidu sok kotubuꞌ puliꞌ ni Isa Al-Masih bangka uliꞌ sok surgaꞌ. Si Petros kini iningalanan nong mokogulangin nok Simon. Solobuk yanin sok sopuluꞌ bu duwaꞌ mokpoposampoy nok piniliꞌ ni Isa Al-Masih. Dadi mikosaksiꞌ si Petros sog lam nok kibiyan-biyanan ni Isa Al-Masih tidu sog waktu nong miktagnaꞌ yanin mokposampoy. Mitongow ni Petros ong mga mokosobuꞌ-sobuꞌ nog ininang ni Isa, bu midongogin ong mga pononduꞌ ni Isa sampoy na ok taluꞌ in nong matoy yanin gantaꞌ poglokatin para sog dusa nong mga manusiyaꞌ (Kitab Injil, Markus 10:45). Diyon si Petros dangan hinukuman patoyon si Panghuꞌ Isa, bu mikotongow si Petros ni Isa dangan mitubuꞌ yanin puliꞌ tidu sok kopatoy. Diyon da sop yanin dangan inoyit si Isa sok surgaꞌ.
Poguliꞌ ni Isa Al-Masih sok surgaꞌ, miimung si Petros nok solobuk kounutan nong mga moktotombaꞌ sok siyudad nog Jerusalem sog bon nong mga sopuluꞌ bu lima tahun. Mikposampoy yanin nok si Isa ong Mogogawon bu mipirisu tanan yanin pasal sok pokposampoyin kituꞌ (Kitab Injil, Mga Ginang 4:1-22; 12:1-19).
Ok sulat kini pinoyit ni Petros song mga kodumahanin moktotombaꞌ sog lima probinsiya nong mibotang sok Turki ningkomun.
Og gawoyin moksulat bagun mokpobais nok pongatoyan nong mga moktotombaꞌ ni Isa poꞌ aluꞌ-aluꞌ ilon binsanaon pasal sok kotombaꞌ nilon. Sugaid sumboy na dodaꞌ suloyan ok kotombaꞌ nilon bagun moksipagon (1:7). Pipondoman ilon ni Petros nog bininsanaꞌ bu pinatoy si Panghuꞌ Isa para dinilon, dadi kanaꞌ da sop mokosobuꞌ bilaꞌ binsanaon ilon. Pilasigan ilon ni Petros nong mobais ok tumbas nilon bilaꞌ mokpuliꞌ si Panghuꞌ Isa. Miktonduꞌ da sop si Petros dinilon bug olo ong mobais nok pogoyit nong mga moktotombaꞌ.
Bung mayan tonduan ita niyu nok Tuhan sok pogbasta ta kini, bu potontulonin ita niyu sog dalan nok posunguꞌ sok surgaꞌ.
Wassalam