Ok Pokposun
pasal sog Ikoduwaꞌ Sulat ni Petros
Mga pigilugan,
Salam diniyu kotanan.
Yonin kini ong mopolok nok pokposun pasal sog ikoduwaꞌ sulat ni Petros nok posunguꞌ niyu bastahon. Miksulat yanin song mga moktotombaꞌ sok Tuhan bu ni Isa Al-Masih nok kibogoyan da sop nong mohalgaꞌ nok pongandol mamaꞌ diyanin. Si Petros kini iningalanan nong mokogulangin nok Simon. Solobuk yanin sok sopuluꞌ bu duwaꞌ mokpoposampoy nok piniliꞌ ni Isa Al-Masih. Dadi mikosaksiꞌ si Petros sog lam nok kibiyan-biyanan ni Isa Al-Masih tidu sog waktu nong miktagnaꞌ yanin mokposampoy. Mikosaksiꞌ si Petros song mga ginang bug taluꞌ ni Panghuꞌ Isa, sampoy ok kopatoyin, bu ok kotubuꞌ in puliꞌ. Diyon da sop si Petros, dangan inangkat si Isa Al-Masih sok surgaꞌ.
Dangan minuliꞌ na si Isa Al-Masih sok surgaꞌ, miimung si Petros nok kounutan nong mga moktotombaꞌ sok siyudad nog Jerusalem. Mikposampoy yanin song mga tow nok si Isa ong mogogawon, bu mipirisu tanan yanin pasal sok pokposampoyin kituꞌ.
Na mikohampit ita da sop ningkomun sok ponintuluꞌ ni Petros song mga sinulatanin kini. Pipondom dinilon ni Petros nog binogoyan ilon nog lam nok kogunahan nilon bagun kosuatan ok Tuhan dinilon. Sinuguꞌ in ilon moghalliꞌ bagun diꞌ ilon moyit sok konapsuhan atawa sok kanaꞌ motud nok pononduꞌ nong mokopoglaat sok kotombaꞌ nilon. Piosunan da sop ilon ni Petros nok songibu tahun dini sog dunya, mamaꞌ da nok sondow para sok Tuhan. Dadi sumboy diꞌ ilon motonop mogbagad nok kopokpuliꞌ ni Isa Al-Masih, poꞌ matong da yanin. Sog waktu nok sinulat ni Petros kini, mikposun yanin dinilon nog diꞌ na yanin mobon sog dunya. Mounut song mga mokokosun, pipatoy si Petros ni Sultan Nero biyan sok poglansang sok kayu.
Sok ponabut nong mga mokokosun, sinulat kini mga 35 tahun tidu sok kotubuꞌ puliꞌ ni Panghuꞌ Isa bu poguliꞌ in sok surgaꞌ.
Bung mayan tonduan ita niyu nok Tuhan sok pogbasta ta kini, bu potontulonin ita niyu sog dalan nok posunguꞌ sok surgaꞌ.
Wassalam