Ok Pituwa song mga Moktotombaꞌ
5
Na ongon ok taluon ku diniyu mga migmokogulang nong mga moktotombaꞌ.
Akon sooy,
solobuku da sop nong migmokogulang,
bu mikosaksiꞌ u sok kobinsanaꞌ bug kopatoy ni Isa Al-Masih.
Mokohampitu da sop sog barakat nok kowasa bug kotasin sog waktu mokpuliꞌ yanin.
Dadi pongonihon ku diniyu mga migmokogulang,
2 bantoyoy niyu pahatul ong mga sukuꞌ nok Tuhan nok pingandol diniyu.
Mamaꞌ ilon sopantun nong mga bilibili nin,
bu amu mamaꞌ nong mga poloipat nog bilibili nin.
Sumboy ipaton niyu ilon nog ikhlas,
kanaꞌ pasal kitogolan amu,
atawa pasal mogapas amu gadjihan,
sugaid pasal sog leg niyu moktolagad.
3 Naꞌ niyu daugdaugon ong mga sukuꞌ nok Tuhan nog inuwakil diniyu,
sugaid sumboy moimung amu nong mobais nok suntuan para dinilon.
4 Dadi sog waktu nong mokpotongow na ok Panghuꞌ,
ok kounutan ta niyu mga mogogipat nong mga sukuꞌ in,
bangka niyu pa kotabuk ok kotas nog ondiꞌ moboluba solama-lama.
5 Amu sooy mga kolakihan nong mobataꞌ pa,
tombaꞌ amu song mga migmokogulang!
Bu kotanan niyu nong mga moktotombaꞌ,
pokpobabaꞌ amu song monolokotow diniyu,
poꞌ tinaluꞌ sog diyalom Kitab,
“Saggaan nok Tuhan ong mga mokoabbu,
sugaid kolasahan bu kololatanin ok sosuku nong mga mokpobabaꞌ diyanin.”
6 Saan na pobabaꞌ niyu ok pongatoyan niyu sok Tuhan nong mokowasa bagun song matong nog gondow,
potasonin amu.
7 Wakil niyu diyanin ok kosusahan niyu poꞌ molasa yanin diniyu.
8 Diꞌ amu moktulug-tulug sok kotombaꞌ,
bu pokpotubud amu.
Poꞌ og Iblis ong mononaggaꞌ diniyu,
miglunsulan mamaꞌ sopantun nog liyun nong monontong nog dapaonin.
9 Dadi atuhoy niyu yanin biyan sok popagon niyu ok kopongandol niyu.
Bu pondom niyu ok pigilugan niyu sok kotombaꞌ sog liwag nog dunya kini,
moktiggol ilon da sop nok kobinsanaan nong mamaꞌ nok kobiyanan niyu kini.
10 Tibuwa pogdoksuꞌ nok pogbinasa diniyu podaliꞌ,
ok Tuhan mismu ong mongimbogu diniyu bu mogbogoy diniyu nok kopagon bug kopagas.
Yanin ok tubud nok kolasa bug kololat,
bu yanin ong migonggat diniyu mampuꞌ sok kowasa bug kotasin nog daꞌdun kodoksuanin pasal sok poksolobuk niyu ni Isa Al-Masih.
11 Mokowasa yanin solama-lama.
Amin.
Pomilin-milin
12 Sinulatu diniyu ong mopolok nok sulat kini biyan sok tabang ni Silas,
ong moliunungoy nog gilug ta sok kotombaꞌ.
Og gawoyu sumulat nini bagun mopolasigu ok kotombaꞌ niyu poꞌ mikpomotudu nog diyon diniyu ok kolasa bug kololat nok Tuhan bisan olo pa ok koposunguan niyu.
Dadi pokpopagon amu biyan dun!
13 Na ong mga gilug niyu sok kotombaꞌ dini sog Babilona nok piniliꞌ dunut diniyu,
mikposampoy nok salam-duwaa diyon diniyu.
Si Markus sooy nog hantang nog bataꞌ u,
miksalam-duwaa da sop diniyu.
14 Pogjara-jara amu mga moktotombaꞌ ni Isa Al-Masih dunut kasi-lasa.
Bung mayan ok kosannangan modiyon diniyu kotanan,
mga miksolobuk ni Isa Al-Masih.
Wassalam