Ok Pokposun
pasal sok Sulat tidu ni Yaꞌkub
Mga pigilugan,
Salam diniyu kotanan.
Ok sulat kini nok posunguꞌ niyu bastahon, sinulat ni Yaꞌkub, ok pigaddatan nok kounutan nong mga mogogunut ni Panghuꞌ Isa sog Jerusalem. Kanaꞌ yanin si Nabi Yaꞌkub, og gapuꞌ ni Nabi Ibrahim, bu kanaꞌ sop yanin ong mokpoposampoy ni Isa Al-Masih, og gilug ni Yahiya. Sugaid si Yaꞌkub kini, og bataꞌ ni Yusup bu ni Mariam, og ginaꞌ ni Isa Al-Masih (Kitab Injil, Matiyu 13:55).
Sinulat ni Yaꞌkub ok sulat kini mga 13-16 tahun tidu sok kotubuꞌ puliꞌ ni Isa Al-Masih bangka pokpuliꞌ sok surgaꞌ. Ok sinulatanin ong mga tow Yahudi nong mogogunut sok Tuhan biyan ni Isa Al-Masih. Mikanat saan ilon sok kobonuwahan poꞌ bininsanaꞌ ilon pasal sok kotombaꞌ nilon.
Ong maksud ni Yaꞌkub mokposun nong mga gaddat-mongaddat nong motolop song mga moktotombaꞌ sog Al-Masih. Taluꞌ ni Yaꞌkub, ong motud nok pongandol unutan nong mga mobais nog ginang, yonin na ong mokpotongow nog ikhlas ok kotombaꞌ nilon sog Al-Masih.
Bung mayan tonduan ita niyu nok Tuhan sok pogbasta ta kini, bu potontulonin ita niyu sog dalan nok posunguꞌ sok surgaꞌ.
Wassalam