Matiyu 13

Ok Pononggiꞌ pasal song Miksibwag nog Boniꞌ

Na sog gondow da sop nituꞌ, linumuwas si sog baloy bangka yanin ingkud sok kilid linow. 2 Minangoy ong modakol nok tow moktopuk diyanin. Dadi simakoy yanin sog bolangoy bangka ingkud, bu ok tumpukan nong mga tow, dituꞌ ilon sok kilid linow minginongog diyanin.

3 Modakol ok tinaluꞌ in dinilon biyan sok pononggiꞌ, longin, “Ponginongog amu! Ongon solokotow nong minibwag nog boniꞌ sog guma nin. 4 Na soliyanin monibwag, mitonaꞌ og duma nog boniꞌ sok kilid dalan, bu minangoy diyon ong mga manuk-manuk tinipot nilon toktukoy. 5 Og duma nog boniꞌ, mitonaꞌ sog batuhan nog daꞌdun tantu og lupaꞌ in. Na podaliꞌ da tinumubuꞌ ong mga boniꞌ koyon poꞌ sukul-sukul na og lupaꞌ in. 6 Tibuwa dangan kiinitan hadja nok podos, milawos poꞌ mobabow da og gamutin. 7 Og duma sop nog boniꞌ, mitonaꞌ sog lupaꞌ nok taga sigbot dugihon, na linumabung ong mga sigbot koyon bu milomosin ok pomulan kituꞌ nong mitubuꞌ. 8 Og duma sop nog boniꞌ, mitonaꞌ sog lupaꞌ nong mobais. Na mitubuꞌ bangka pogjatu og bunga nin. Ok solobuk boniꞌ mimunga sogatus longow, og len nom puluꞌ, bu og duma sop tolu puluꞌ longow. 9 Na sima-sima ong mikodongog, sabut niyu pahatul.”

Ok Posabut sok Pononggiꞌ

10 Doksuꞌ minangoy diyanin ong mga mulidin bangka poksak, “Manu moktaluꞌ a ma song mga tow biyan sok pononggiꞌ?” 11 Ok tabal ni Isa, “Amu koyon pisabut diniyu ong mibuni pasal sok . Tibuwa song mga duma nog ondiꞌ meleg mogunut sok pognasihatu, daꞌ duhuloy dinilon. 12 Poꞌ sima-sima ong monginongog mahatul nong mga tintuluan ku, na dungagan nok Tuhan ok kokosun nilon, bu miglabi-labi pa. Tibuwa sima-sima og diꞌ monginongog, bisan ong niyat nilon dun ongon ok kokosun nilon, alapon da dinilon. 13 Pasal niyon moktaluꞌ u dinilon nok pononggiꞌ poꞌ bisan tumontong ilon, diꞌ da ilon mokotongow, bu bisan monginongog ilon, diꞌ da ilon mokosabut.

14 Na miunut dinilon og asal tinaluꞌ nok Tuhan biyan ni Nabi , longin,

‘Monginongog amu,

sugaid diꞌ amu da mokosabut.

Lolayun amu tumontong,

sugaid diꞌ amu da mokotongow.

15 Poꞌ ok pongatoyan nong mga tow kini, tinumogas.

Mitimpong ok tolinga nilon,

bu mipodong ong mata nilon

bagun diꞌ ilon mokotongow,

diꞌ mokodongog,

diꞌ mokosabut ok pongatoyan nilon

bu diꞌ mokopuliꞌ dinakon

bagun ampunon ku ilon.’

16 Sugaid amu, mobarakat amu poꞌ misabut niyu ong mitongow bu midongog niyu. 17 Taluan ku amu, ong motudin, modakol ok konabihan bug mga mologdong nok tow ong meleg tokodoy tumontong bu monginongog nong mga mitongow bu midongog niyu, sugaid daꞌ nilon na kosaut.

18 Na inongogoy bu sabut niyu ok pononggiꞌ pasal song minibwag kituꞌ nog boniꞌ. 19 Ok kilid dalan kituꞌ nok kitonaan nog boniꞌ, yonin na ong mga tow nong mikodongog nok suksugan pasal sok Pomarinta nok Tuhan, sugaid daꞌ nilon sabutoy. Na tinumuwaꞌ ok kounutan nong mga soytan bangka nin dagitoy ok Parman sok pongatoyan nilon. 20 Og batuhan nok kitonaan nog boniꞌ, yonin na ong mga tow nong mikodongog nok Parman nok Tuhan bu tinabuk nilon mogdayun dunut loliyag nilon. 21 Tibuwa diꞌ monginggamut ok Parman sok pongatoyan nilon, dadi podaliꞌ da ok kotombaꞌ nilon. Bilaꞌ datongan ilon nok sigpit atawa kobinsanaan pasal sok Parman nok Tuhan, lukatan nilon mogdayun ok pongandol nilon sok Tuhan. 22 Na og lupaꞌ nok taga sigbot dugihon kituꞌ nok kitonaan nog boniꞌ, yonin na ong mga tow nong minginongog nok Parman nok Tuhan. Sugaid ok kosusahan sog dunya bug napsu sog daya, yonin na ong mikolomos nok Parman sok pongatoyan nilon, dadi ondaꞌ da pogjatu. 23 Tibuwa og lupaꞌ nong mobais nok kitonaan nog boniꞌ, yonin na ok sosuku nong minginongog nok Parman nok Tuhan bangka nilon sabutoy. Dadi migjatu mahatul ok Parman sok kotubuꞌ nilon, mamaꞌ sopantun nok pomulan nong migbunga. Og duma tolupuluꞌ kalihon, og duma sop nompuluꞌ bu sog len sogatus kalihon.”

Ok Pononggiꞌ pasal sok Pomulan bug Sigbot

24 Miktaluꞌ si dinilon nog len pononggiꞌ, longin, “Ok , mamaꞌ hantang nok tow miksibwag nong mobais nog boniꞌ sog guma nin. 25 Sugaid soliyan motulug nong mga tow, minangoy diyon og banta nin bangka poksibwag nog boniꞌ nok sigbot sok pimula nin koyon bangka awaꞌ. 26 Dangan timubuꞌ ong mga boniꞌ bangka pomunga, timubuꞌ sop ong mga sigbot.

27 Minangoy ong mga sosuguon nog gapuꞌ lupaꞌ diyanin bangka poktaluꞌ, ‘Tuwan, kanaꞌ taꞌ ok sinibwag nu kituꞌ sog guma nu lunsan mokobais nog boniꞌ? Manu buwan kituꞌ sinigbot ma?’ 28 Ok tabalin dinilon, ‘Og banta u ong minginang nini.’ Taluꞌ nong mga sosuguon diyanin, ‘Melega taꞌ nog angoyon nami pomogdutoy ong mga sigbot kituꞌ?’ 29 Tibuwa taluꞌ in, ‘Ondiꞌ, poꞌ sunoy soliyan niyu pomogduton ong mga sigbot, mobogdut niyu da sop ong mga pomulan. 30 Potiyangoy niyu na toktob sog gumani. Na sog waktu nok ponggani, taluan ku da ong mga gumani nok topukon nilon poguna ong mga sigbot, bangka nilon bogbodoy bagun kodoksulan. Tubus topukon nilon ong mga bunga sok komaligu.’ ”

Ok Pononggiꞌ pasal sog Boyaan bug Posulig

31 Na tinaluanin na sop ilon nog len pononggiꞌ, “Ok mamaꞌ hantang nog boyaan nok pimula nok tow sog guma nin. 32 Bisan og boyaan koyon landuꞌ kobeteꞌ, tinumubuꞌ na bu mosolag pa tidu song mga len pomulan bangka koimung nok pun kayu. Saan na mogapun bu moksalag ong mga manuk-manuk song mga panga nin.”

33 Sinuksuganin na sop ilon nog len pononggiꞌ, taluꞌ in, “Ok Pomarinta nok Tuhan mamaꞌ hantang nok posulig nog inampuꞌ nog libun sok sokadut nok tirigu dituꞌ sok polonggananin toktob sok kinumombang na og inabdunin kotanan.”

34 Sinuksug ni Isa og lam niyon biyan sok pononggiꞌ sok kodakolan nok tow. Daꞌdun ok tinaluꞌ in dinilon nok kanaꞌ pononggiꞌ. 35 Dadi miunut ok tinaluꞌ nok Tuhan biyan song tagnaꞌ,

“Moktaluꞌ u biyan sok pononggiꞌ,

suksugon ku ong mga mibuni tidu pa sok pogimung nog dunya.”

Pitampal ni Panghuꞌ Isa ok Pononggiꞌ in pasal sok Sigbot

36 Pokpuwas nituꞌ, ginonatanin na ok tumpukan nong mga tow koyon, bangka yanin solod sog baloy. Minangoy diyanin ong mga mulidin bangka poktaluꞌ, “Posabut nu pa dinami ok pononggiꞌ nu pasal sok sigbot sog guma.”

37 Tinumabal si Isa, “Ong miksibwag kituꞌ nong mobais nog boniꞌ, yonin na akon, og . 38 Og guma kituꞌ, yonin na og dunya, bu ong mga boniꞌ kituꞌ nong mobais, yonin na ong mga tow nong misukuꞌ sok . Ong mga sigbot kituꞌ, yonin na ong mga tow nong misukuꞌ sog . 39 Yanin og banta nok Tuhan nong miksibwag nong mga sigbot, ok kounutan nok kolaatan. Ok ponggani, yonin na ok kodoksuan nog dunya, bu ong mga gumani yonin na ong mga . 40 Mamaꞌ nok polenon ong mga sigbot bangka doksuloy, mamaꞌ niyon sop ong moinang bilaꞌ matong na ok kodoksuan nog dunya. 41 Akon og Bataꞌ nong Manusiyaꞌ, mokpoyitu nong mga malaikatu, bangka nilon topukoy ayin-ayin sok pomarintahan ku og lam nong mokoyit-oyit nog bug lam nong monginang nong molaat. 42 Tubus tikpuon ilon song miksuliyab nog gapuy. Na dituꞌ mogaduy ilon bu mongolongot ong ngisi nilon. 43 Tibuwa ong mga mologdong nok tow, moksahaya ilon mamaꞌ nog gondow sok pomarintahan nog u. Sima-sima ong mikodongog, sabut niyu pahatul.

Ok Pononggiꞌ pasal song mga Mibuni nok Kumalaꞌ

44 Ok mamaꞌ sopantun nog gartaꞌ mokohalgaꞌ nog binuni sog guma. Tubus mitongow nok solokotow bangka nin bunihoy da sop diyon bolombula. Sabap sog loliyagin, piksaluyin og lam nog olo-olo diyanin bangka nin saluyoy og guma koyon.

45 Domikkiyan da sop, ok Pomarinta nok Tuhan mamaꞌ hantang nong mogdodagang minontong nong mga perlas. 46 Dangan mikotongow yanin nok perlas nong mohalgaꞌ tokodoy, pigdagangin og lam nog gartaꞌ in bangka nin kituꞌ saluyoy.

Ok Pononggiꞌ pasal sok Pokot

47 Ok , mamaꞌ da sop hantang nok pokot nog linabuꞌ sog dagat bangka pokalap nog ginis-ginisan nok sodaꞌ. 48 Dangan milapat na nok sodaꞌ ok pokot nilon, linulut na nong mga tow posunguꞌ sog doksaan, bangka ilon ingkud momiliꞌ nong mobais nok sodaꞌ. Tubus inungod nilon sok taguan, bangka nilon pinilak ong mokolaton. 49 Na mamaꞌ niyon og biyan-biyan nong mga tow bilaꞌ matong na ok kodoksuan nog dunya. Mangoy dini ong mga bangka nilon polenoy ong mga tow nong molaat tidu song mologdong. 50 Ong mga tow molaat tikpuon nilon song miksuliyab nog gapuy. Na dituꞌ mogaduy ilon bu mongolongot ong ngisi nilon.”

51 Doksuꞌ sinakan ni Isa ong mga mulidin, “Misabut niyu na taꞌ og lam nini?” Ok tabal nilon, “Oo.” 52 Na taluꞌ in dinilon, “Dadi ok sosuku guru agama nong minampuꞌ na sok Pomarinta nok Tuhan miimung nong mulidu, mamaꞌ yanin hantang nog gapuꞌ baloy nong modakol ong mokohalgaꞌ nog gartaꞌ in. Mokalap yanin nog bogu bug dan sok poktaguanin.”

Tinolikudan nong mga Tow si Panghuꞌ Isa

53 Pokpuwas ni Isa mongnasihat biyan song mga pononggiꞌ koyon, ginumonat na yanin diyon, 54 bangka yanin uliꞌ sog bonuwa nin, yonin na ong Nasaret. Pogdatongin diyon, mignasihat yanin sog nilon bu kisobuan ong mga tow, taluꞌ nilon, “Ayin bayuꞌ mialap nok tow kini ok kokosunin bu ok kowasa nin monginang nong mokosobuꞌ-sobuꞌ? 55 Kanaꞌ ta yanin koyon og bataꞌ nok polomandoy? Kanaꞌ taꞌ og ginaꞌ in poktawagon nong bu ok pigiluganin siloꞌ Yaꞌkub, Yusup, Simon bug Yahud? 56 Kanaꞌ taꞌ sop dini dinita og lam nog gilugin nog libun? Ayin buwan mialap nok tow kini og lam nini?” 57 Dadi mosakit ok pongatoyan nilon diyanin. Sugaid taluꞌ ni Isa dinilon, “Ong , pogaddatan bisan ayin luwal sog bonuwa nin bu sog baloyin.” 58 Na daꞌ yanin ponginang nong modakol nong mokosobuꞌ-sobuꞌ diyon poꞌ diꞌ ilon tumombaꞌ diyanin.