Ok Sulat tidu ni
YAꞋKUB
1
Salam-duwaa diniyu ong mga koilugan ku sok kotombaꞌ sok sopuluꞌ bu duwaꞌ pangkatan nog bangsa Israela nong mikanat sok kobonuwahan.
Akon kini si Yaꞌkubb,
solobuk gulipon nok Tuhan bu ni Panghuꞌ Isa Al-Masih.
Pasal sok Pokpogot nok Kotombaꞌ
2 Mga pigilugan ku!
Pogloliyag amu andun-andun amu kosugat nog olo-olo na nok poksuloy.
3 Poꞌ kiosunan niyu ok poksuloy sok kotombaꞌ niyu,
ong mokopagon nok kosabar niyu.
4 Tibuwa tiggolan niyu pa bisan olo ong mosugat diniyu bagun mojukup bu diꞌ kotuntutan ong mga ginang niyu,
bu daꞌdun ok pokkulang sok kotombaꞌ niyu.
5 Bilaꞌ ongon diniyu kulang ok kokosunin,
sumboy mongoni-ngoni amu sok Tuhan ong mogbobogoy sog lam nok tow,
poꞌ motawal yanin bu kanaꞌ mobista.
6 Sugaid bilaꞌ mongoni-ngoni amu,
sumboy ikhlas ok kotombaꞌ niyu.
Ondiꞌ amu mogduwaꞌ-duwaꞌ poꞌ ok tow nong mogduwaꞌ-duwaꞌ mamaꞌ hantang nong nabok nong mogunut-unut bug ayin og goyup nog galuꞌ.
7 Na ong maꞌ niyon nok tow sumboy ondiꞌ mogdodama nog ongon ong motabukin sok Pogbayaꞌ-bayaꞌ,
8 poꞌ mogduwaꞌ-duwaꞌ yanin bu ondiꞌ mosolobuk ok pikilanin bisan olo og ginangin.
Pasal song mga Miskinan bug Dayahan
9 Bilaꞌ ongon ong mga koilugan ta niyu nong miskinan nok tumombaꞌ ni Isa,
sumboy mogloliyag ilon poꞌ motas ilon sok ponontong nok Tuhan.
10 Bu ong mga dayahan,
sumboy da sop mogloliyag bisan pobabaon ilon,
sabap matoy ilon da sop mamaꞌ hantang nog bulak sok sigbotan.
11 Poꞌ sumilak og gondow nog landuꞌ kinit bu molawos ok sigbot,
og bulakin modogdag bangka kobolong og lingkatin.
Domikkiyan da sop og dayahan,
landuꞌ ilon sooy konamal monukat nog daya nilon,
matoy da sop ilon nog daꞌ koyit og gartaꞌ nilon.
Ok Poksuloy bug Poksassat
12 Mobarakat ok tow nok kosandalanin ok poksuloy nog ondiꞌ mopinda ok pongandolin.
Poꞌ bilaꞌ kotatasanin koyon,
motabukin ok tumbas,
yonin na ok kotubuꞌ solama-lama nog jinanjiꞌ nok Tuhan song mga molasa diyanin.
13 Ok tow nok sinassat,
sumboy diꞌ yanin moktaluꞌ nog,
“Sinassatu nok Tuhan.”
Poꞌ ok Tuhan ondiꞌ mosassat nok kolaatan bu diꞌ monassat sog bisan sima towoy.
14 Ong motudin,
sosuku nok tow mosassat bu koakkalan bilaꞌ moyit yanin nong napsu nin sok kolaatan.
15 Bu bilaꞌ moyit yanin nong napsu nin,
og dusa ok kodoksuanin.
Bu bilaꞌ mogdayun pa yanin mogdusa,
narkaꞌ ok posunguanin.
16 Diꞌ amu meleg akkalan,
mga pigilugan ku kolasahan.
17 Og lam nok kobaisan bug kojukupan,
miktidu sog Gommaꞌ Tuhan,
ong mikpoongon nong mga sahaya sok kolangitan.
Mopinda ong mga sahaya bug nuni dini sog dunya,
sugaid yanin ondiꞌ tokodoy mopinda.
18 Tidu sok koleganin,
inimungin ita nog gumbataꞌ in biyan sok Parmanin nok kosobonnalan,
bagun ita moimung nok sukuꞌ in nok piselen para diyanin tidu sog lam nong mga piongonin.
Moginongog bu Moginang
19 Mga koilugan ku kolasahan,
sumboy kosunan niyu kini:
Ok sosuku nok tow,
sumboy modaliꞌ moginongog,
momikil poguna bangka poktaluꞌ,
bu kanaꞌ modaliꞌ kolingit.
20 Poꞌ ok kolingit nok tow diꞌ mogbunga nok kologdongan nong mounut sok kolegan nok Tuhan.
21 Dadi awaꞌ niyu og lam nok samaꞌ nok kolaat bug liksok diyon sok pongatoyan niyu.
Tolimaꞌ niyu dunut sok kobabaꞌ nok pongatoyan ok Parman nok Tuhan nog inungod sok pongatoyan niyu,
poꞌ mokoawon ok Parman koyon song nyawa niyu.
22 Na unut niyu ok Parman koyon,
kanaꞌ hadja inongogan niyu,
poꞌ bilaꞌ maꞌ niyon,
inakkalan niyu hadja og ginawa-baran niyu.
23 Poꞌ sima-sima ong moginongog nok Parman sokaliꞌ diꞌ in inangon,
mamaꞌ da yanin nong minanding sok solamin.
24 Pogdoksuꞌ in tandingon og ginawa nin bangka awaꞌ,
kolingowanin na og bayuꞌ-bayuꞌ in.
25 Tibuwa ok tow nok pingadjianin lolayun og jukup nok saraꞌ nok Tuhan,
ong mokopuwas nong manusiyaꞌ sok kosiksaan pasal sog dusac,
na ok tow koyon mobarakat sog olo-olo nog ginangin poꞌ inunutin ong midongogin,
bu diꞌ in kolingowan.
26 Sima-sima ong mogniyat nog boloammal yanin sokaliꞌ diꞌ in kosaggaan og dilaꞌ in,
na inakkalanin hadja og ginawa nin,
bu daꞌdun ok kopologunahan nog gammalin.
27 Ok pogammal nok sutsi bu daꞌdun ok sallaꞌ in sok ponontong nok Tuhan,
og Gommaꞌ,
yonin na ok tumibow bug tumabang song mga bataꞌ ilu bug mga balu sok kosigpitan nilon,
bu ok poghalliꞌ sok kolaatan dini sog dunya.