Yaꞌkub 2

Sumboy daꞌdun ok Pogbiddaon

Mga pigilugan ku, pagga tinumombaꞌ amu sok Panghuꞌ ta niyu nong mokowasa nok si , na sumboy daꞌdun ok polabihon niyu nok tow. 2 Sowpama nin, ongon ok tow nong miminolok nog bulawan bu molingkat ok ponapotin nok sinumolod sog baloy poksumbahan niyu, bu ongon sop ok sinumolod nong miskinan nog dan na ok ponapotin. 3 Tubus soginahon niyu ong molingkat kituꞌ ok ponapotin, ok taluꞌ niyu, “Ingkuda dini, busung-busung!” Tibuwa taluan niyu ong miskin kituꞌ, “Pogindoga na diyon,” atawa “Ingkuda sok pogbotangan nog botisu!” 4 Kanaꞌ taꞌ nok pogbiddaon niyu og dayahan bug miskinan? Kanaꞌ taꞌ og ginang niyu koyon tidu song molaat nok pikilan niyu?

5 Ponginongog amu, mga pigilugan ku kolasahan. Piniliꞌ nok Tuhan ong mga miskinan sog dunya nok koongonan ilon nong mopagas nok pongandol bu kopusakaan nok og jinanjiꞌ in song mga tow nong molasa diyanin. Yonin koyon og daya nilon. 6 Sokaliꞌ pibabaꞌ niyu ong mga miskinan. Na kanaꞌ taꞌ buwan ong mga dayahan og linumogon diniyu bu mingguyud diniyu sok poghukuman? 7 Kanaꞌ taꞌ ilon ong mogunda-unda song ngalan ni Isa Al-Masih nong misukuꞌ diniyu?

8 Na mobais dodaꞌ bilaꞌ unuton niyu ok kinotasan nok saraꞌ sok Kitab, yonin na og “Kolasahoy niyu ok kodumahan niyu mamaꞌ nok poglasa niyu sog ginawa-baran niyu.” 9 Sugaid bilaꞌ mogbiddaꞌ amu song mga tow, na mogdusa amu dun, bu motampal nog dinumugtul amu sok saraꞌ. 10 Poꞌ sima-sima ong mogunut nong mga saraꞌ nok Tuhan, sokaliꞌ solobuk hadja og daꞌ in unutoy, na mamaꞌ in da nong midugtul og lam nok saraꞌ. 11 Poꞌ miktaluꞌ ok Tuhan, “Diꞌ amu mogjina,” bu taluꞌ in da sop, “Diꞌ amu momatoy.” Dadi bilaꞌ diꞌ amu mogjina sokaliꞌ mimatoy amu, ong maana nin, daꞌ niyu da kounut ok suguan nok Tuhan.

12 Dadi poktaluꞌ bu poginang amu nog dumait sok tow nok posunguꞌ hukumon mounut sok sara nong mokopuwas diniyu sok kosiksaan pasal sog dusa, yonin na ok saraꞌ ni . 13 Poꞌ bilaꞌ daꞌdun og lolat niyu sog duma, diꞌ amu kololatan sok poghukuman. Tibuwa bilaꞌ molilolatoy amu, kololatan amu nok Tuhan sok poghukuman.

Pasal sog Ihlas nok Kotombaꞌ

14 Mga pigilugan ku, olo buwan ok kopolosuddahan nok tow bilaꞌ moktaluꞌ yanin nong mingandol yanin sok Tuhan, sokaliꞌ daꞌ da kotongow song mga ginangin? Moawon taꞌ yanin sok kopongandol in koyon? 15 Na soupama ongon ong mga gilug ta nog daꞌdun ok ponapot nilon bu kulang ok kan nilon, 16 Sokaliꞌ taluan niyu hadja ilon, “Mura-murahan bogoyan amu da nok kosannangan, ponapot bug kan.” Tibuwa daꞌ niyu da ilon bogoyoy nog olo-olo para sog ginawa-baran nilon. Olo ma og guna nin? 17 Na domikkiyan sop ok pongandol, bilaꞌ daꞌ kotongow sog ginang ta, daꞌdun da og halgaꞌ in.

18 Tibuwa soupama ongon ong miktaluꞌ, “Ika ongon ok pongandol nu, bu akon ongon ong mga ginangu nong mologdong. Daꞌ ilon poksolobuk.” Dadi taluan ku ika maꞌ nini, “Diꞌ ta poksuwoyon ok pongandol ta song mologdong nog ginang ta. Ponoy mokpomotuda nong mongandola bilaꞌ daꞌ kounut ok pongandol nu sok kologdongan? Sugaid mokpotongowu dinika nog ikhlas ok pongandolu poꞌ motongow biyan song mga mologdong nog ginangu.” 19 Tinumud amu nok solobuk da ok Tuhan, na mobais koyon. Tibuwa, bisan tanan ong mga soytan, tinumud da sop ilon dun, bu mingongkog ilon nog gondok.

20 Na amu, kulang ok ponabut niyu. Ondaꞌ niyu pa taꞌ kosunoy nog daꞌdun og jatu nok pongandol nog daꞌ kounut sog ginang mologdong? 21 Pikil niyu ok koapuꞌ-apuan ta nok si Nabi . Initung yanin nok Tuhan nong mologdong pasal sok pongandolin nong motampal dangan inuwakilin og bataꞌ in nok si sok . 22 Mitongow niyu nong migdunut ok pongandolin bug mga ginangin, bu mijukup ok pongandolin sabap sog ginangin. 23 Dadi miunut ok tinaluꞌ kituꞌ sok Kitab, “Mingandol si Ibrahim sok Tuhan, dadi pasal niyon miitung yanin nong mologdong”, bu tinawag yanin nok supali nok Tuhan. 24 Na mitongow niyu na nong miitung ok tow mologdong sok ponontong nok Tuhan kanaꞌ hadja sabap sog angkononin nong mingandol yanin, sugaid sumboy motongow sok kokohinangin nog ikhlas ok pongandolin.

25 Domikkiyan da sop si Rahab, nok tagnaꞌ libun pogbayadan. Miitung yanin mologdong sabap sok pongandolin nong mitongow biyan sok kotabangin song mga tow Ibrani. Binuni nin ong mga sinuguꞌ migogumati kituꞌ sog bonuwa nin bangka nin ilon tabangoy mokopolaguy. Pibiyanin ilon sog len dalan bagun diꞌ ilon mosaggow.

26 Na saan na, ok pongandol sok Tuhan nok kanaꞌ moampuꞌ sog ginang mologdong, daꞌdun da og jatu nin. Ibadat sog lawas bilaꞌ daꞌdun na ong nyawa nin, minatoy na.