Pasal sok Ponaluon ta
3
Mga pigilugan ku,
kanaꞌ bosiya modakol diniyu nong mogniyat moimung nog guru,
sabap kiosunan ta nog ami mga guru,
hukumon nong mobogat pa tidu sog duma.
2 Poꞌ moksallaꞌ dodaꞌ og lam ta niyu sog ginis-ginisan.
Bilaꞌ ongon ok tow nog diꞌ mokosallaꞌ sok ponaluꞌ in,
na mojukup yanin nok tow.
Kosaggaanin dodaꞌ og lawasin.
3 Mamaꞌ hantang nok kakkang,
bilaꞌ botangan taꞌ niyu sog babaꞌ nok kudaꞌ,
mokopogbayaꞌ ita nog lawasin,
poꞌ tombaanin ayin-ayin ok kolegan ta.
4 Domikkiyan da sop ong mga bonsalan nok kappal,
bisan pa mosolag ok kappal bu moyit nog galuꞌ,
kopogbayaan da nong mobeteꞌ nog bonsalan bug ayin posunguoy nong mogoyit dun.
5 Dadi domikkiyan da sop og dilaꞌ,
bisan mobeteꞌ nog langkap nog lawas ta,
mosolag ok pogbayaꞌ in bilaꞌ moktaluꞌ.
Tontong niyu sop og ligatu,
bisan mikaan tokodoy,
mokotutung da nog liwag nog gulangan bilaꞌ diꞌ ipaton.
6 Na og dilaꞌ mamaꞌ hantang nog gapuy.
Diꞌ mobista ok kodakol nok kolaatan nog lumuwas sog babaꞌ ta bangka pokosammal sog lawas ta.
Ok kolaatan koyon ong mogoyit dinita sog dalan nong molikoꞌ bu modaliꞌ kumanat mamaꞌ nog gapuy.
Dadi mokopoglaat nok kotubuꞌ ta,
bu ok kodoksuanin ong narkaꞌ.
7 Kopogbayaan da og lam nog binatang bug manuk-manuk bug mga monanap sog lupaꞌ,
sampoy mga migonong sog dagat.
Bu modakol dinilon mopodongon nong manusiyaꞌ.
8 Tibuwa daꞌdun ok tow nong mokopogbayaꞌ sog dilaꞌ in.
Og dilaꞌ diꞌ lumotaꞌ monglaat,
ok taluꞌ in mamaꞌ hantang nog lassun nong mokopatoy.
9 Biyan sog dilaꞌ ta mopudji ta ok Tuhan,
nog yonin ok Pogbayaꞌ-bayaꞌ bug Gommaꞌ ta,
sugaid biyan sog dilaꞌ ta moksuknaꞌ ita da sop song manusiyaꞌ nog inimungin bu piganggid-anggidin diyanin.
10 Ok pudji bug suknaꞌ tidu da sok solobuk babaꞌ.
Na mga pigilugan ku,
sumboy kanaꞌ maꞌ niyon!
11 Moglayas taꞌ ok tubig tobang bug tubig masin tidu sok solobuk tubudan?
12 Mogbunga taꞌ buwan ok kayu santul nong mangga?
Atawa mogbunga taꞌ buwan ok kayu buwahan nok santul?
Na diꞌ na dodaꞌ.
Diꞌ sop moktubud ok tubig masin sok tubud tobang.
Mga pigilugan ku,
domikkiyan ita sooy,
ok taluꞌ ta sumboy mobais hadja,
kanaꞌ da koampuan nong molaton nok taluꞌ.
Ok Kokosun nong Miktidu sok Tuhan
13 Bilaꞌ modalom ok kokosun niyu bu mosabut niyu bug olo ok kolegan nok Tuhan,
sumboy potongowon niyu song mobais nog laku-tobiat niyu.
Tibuwa sumboy mobabaꞌ og goyitan niyu,
dumait sok tow nok taga kokosun.
14 Sugaid bilaꞌ modalu amu,
bu pinikil niyu hadja og ginawa-baran niyu,
diꞌ amu mogabbu nong modalom ok kokosun niyu,
poꞌ bilaꞌ maꞌ niyon,
sinonsingan niyu ok kosobonnalan.
15 Ong mamaꞌ niyon kanaꞌ miktidu sok Tuhan,
sugaid sok pikilan nong mga tow bu sok kokosun nog dini sog dunya,
bu ok piktiduhanin og Iblis.
16 Poꞌ ayin-ayin modalu bu mokpikil hadja ong mga tow nog ginawa nin,
moongon na dodaꞌ ok sasow bug ginis-ginisan nok kolaatan.
17 Tibuwa ok tow nok taga kokosun nok tidu sok Tuhan,
muna-muna sutsi,
doksuꞌ mosinulutoy,
molunuk ok pongatoyanin,
molomu tintuluon poꞌ kanaꞌ motogas og gulu nin,
molilolatoy,
mololaki monginang nok kobaisan,
diꞌ mogbiddaꞌ sok tow,
bu diꞌ mokpotongow-tongow.
18 Dadi ong mga mokpoposulut,
mopononggiꞌ ilon song mga mogoguma.
Ok pomulahon nilon,
ok pokposulut bug kosannangan,
bu og ganihon nilon ok kologdongan.