Ong Napsu sog Dunya
4
Na olo buwan ok sabapan nok poksuwal bug poksasow diyon diniyu?
Kanaꞌ taꞌ pasal sok kolegan nong mga konapsuhan niyu mogbayaꞌ bu mokpoduhul diniyu?
2 Monapsu amu sog daꞌdun diniyu,
sugaid diꞌ niyu moalap,
dadi lamig amu momunuꞌ.
Moima amu bug olo diyon sog duma niyu,
sugaid ondaꞌ niyu koangkon,
dadi monuwal bu monasow amu.
Tibuwa daꞌdun da ong malap niyu,
poꞌ daꞌ amu pongoni sok Tuhan.
3 Mongoni amu sooy,
diꞌ amu da bogoyan,
poꞌ daꞌ poksugat-sugat ok kopongoni niyu.
Ong maksud niyu bagun hadja koduhulan ong napsu niyu.
4 Mokpalid-palid amu sok pogunut niyu sok Tuhan,
diꞌ amu kopongandolan.
Daꞌ niyu taꞌ kosunoy nog bilaꞌ polabihon niyu ok pongdunya,
maana nin sinumaggaꞌ amu sok Tuhan?
Dadi bilaꞌ mokpolabi amu dun,
moimung amu nog banta nok Tuhan.
5 Pondom niyu nok taga kopolosuddahan dodaꞌ ok tinaluꞌ sok Kitab nog binogoy nok Tuhan og Ruh nin dinita,
dadi mosolag og legin nog yanin ok polabihon ta sok kotubuꞌ ta.a
6 Sugaid labi-labi ok kolasa-kololat nog bogoyonin dinita,
saan na mitaluꞌ sog diyalom Kitab,
“Saggaan nok Tuhan ong mga mokoabbu,
sugaid kolasahan bu kololatanin ok sosuku nong mga mokpobabaꞌ diyanin.”b
7 Saan na poglillaꞌ amu nok pongatoyan niyu sok Tuhan,
sugaid pongatu amu sog Iblis,
bu modaliꞌ yanin mawaꞌ diniyu.
8 Pokpolani amu sok Tuhan,
dadi mokpolani sop yanin diniyu.
Amu mga baldusa,
pongoni niyu og gampun sok Tuhan,
bu pokpokitabang amu diyanin bagun moglokotubuꞌ amu nong mosutsi.
Bu amu mga migduwaꞌ-duwaꞌ sok kotombaꞌ,
pologdong niyu ok pongatoyan niyu posunguꞌ sok Tuhan.
9 Kosusa amu bangka pogdukkaꞌ,
bu pogaduy amu song miinang niyu nog dusa.
Gantian niyu ok kotawa niyu nok pogdukkaꞌ,
bu og loliyag niyu nok kosusa pasal sok poksusun niyu.
10 Pobabaꞌ niyu og ginawa-baran niyu sok Tuhan bangka nin amu potasoy.
Diꞌ ita Monallaꞌ sok Pokkahi ta Manusiyaꞌ
11 Mga pigilugan ku sok kotombaꞌ,
diꞌ amu mokkulibot sog duma niyu.
Sima-sima ong miktaluꞌ nong molaat sok pigiluganin atawa monallaꞌ diyanin,
moitung da nong miktaluꞌ yanin nong molaat sok saraꞌ,
bu mamaꞌ nong monallaꞌ yanin nok saraꞌ.
Tibuwa bilaꞌ amu na ong monallaꞌ nok saraꞌ,
na ondaꞌ niyu na unutoy,
poꞌ amu na ong miimung nong monghuhukum.
12 Solobuk da ong migbogoy nok saraꞌ bu ong Monghuhukum,
yonin na ok Tuhan.
Yanin ong mokoawon,
bu yanin da sop ong mokopogmulkaꞌ.
Saan na daꞌdun ok kopatut niyu monallaꞌ sog duma niyu.
Ok Pogabbu pasal sog Lomaꞌ-dinglag
13 Poginongog amu sosuku nong moktaluꞌ,
“Gondow kini atawa lomaꞌ mangoy ami sok siyudad mogusaha sotahun,
bangka ami pokuntung.”
14 Sokaliꞌ diꞌ niyu kosunan og lomaꞌ-dinglag atawa olo ong mokobiyan diniyu.
Poꞌ ok kotubuꞌ niyu sog dunya mamaꞌ nog bol nong miyan podaliꞌ bangka kobolong.
15 Dadi sumboy maꞌ nini ok taluon niyu,
“Bilaꞌ dumuhul da ok Tuhan,
mamaꞌ nini atawa mamaꞌ ninya og inangon nami.”
16 Sugaid landuꞌ amu na koabbu,
bu og lam nok pogabbu,
ginang nong molaat.
17 Sima-sima ong mikokosun sok pongatoyanin bug olo ong mobais inangon,
sokaliꞌ diꞌ in inangon,
na migdusa yanin.