Podinsamaꞌ song mga Dayahan
5
Na amu mga dayahan,
poginongog amu nok taluꞌ u.
Pogaduy amu pahatul pasal sok kobinsanaan nong matong diniyu.
2 Ok pongartaꞌ niyu miludak na,
bu ong mga ponapot niyu kinan na nong mga mamak-mamak.
3 Ong mga bulawan bug sin niyu ginahaꞌ na,
bu yonin koyon ong mokposobonnal nog hukumon amu sog gapuy.
Poꞌ miktaguꞌ amu na hadja nog gartaꞌ bagun mokpoduhul nog ginawa-baran niyu bisan posunguꞌ na og Hari Kiyamat.
4 Na poginongog amu,
mitongow nok Tuhan Mokowasa nog linimbungan niyu ong mga tow nong miginang sog guma niyu,
bu daꞌ niyu ilon tindanoy,
bu midongogin og gaduy nong mga tow nog ginumani diyon diniyu.
5 Mikpoduhul amu hadja nog leg nog ginawa-baran niyu sog bon dini amu sog dunya,
bu mikpodaya amu.
Piduhul niyu ong napsu niyu mamaꞌ sopantun nog binatang pisubuk para sog gondow nok poksumbaliꞌ nog daꞌdun sene-sabut nilon pasal sok kopatoy nilon.
6 Hinukuman bu pinatoy niyu ok tow mologdong nog daꞌ tanan saggaꞌ diniyu.
Poksabar sok Kosigpitan
7 Dadi pigilugan ku,
poksabar-sabar amu toktob sok pokpuliꞌ dini ni Panghuꞌ Isa.
Tulikoy niyu ok tow nong miguma bug ponoy ok pogbagadin nok songkuꞌ in nong mohalgaꞌ diyanin.
Migbagad yanin nok timpu dupiꞌ,
bangka pa yanin pomula,
bu miksabar yanin toktob matong na ok ponggani.
8 Poksabar-sabar amu da sop mogbagad,
bu pogot niyu ok kotombaꞌ niyu,
poꞌ ok Panghuꞌ posunguꞌ na matong.
9 Mga pigilugan,
diꞌ amu moksinusunoy song mga kodumahan niyu bagun diꞌ amu hukumon,
poꞌ ong Monghuhukum dinita niyu posunguꞌ na matong.
10 Mga pigilugan,
imung niyu nok suntuan ok kotiggol bug pogbinsanaꞌ nong mga konabihan nok kiwakilan nok Tuhan mokposampoy nok Parmanin.
11 Motaluꞌ ta nong mosukud ok tow nong miksandal.
Midongog niyu ok pasal ni Nabi Ayyub nok sinandalanin ok kobinsanaan nong minatong diyanin.
Bu kiosunan niyu bug ponoy ok poktabang nok Tuhan diyanin sok kodoksuan,
poꞌ ok Tuhan molasa bu molilolatoy.
12 Labi-labi na mga pigilugan ku,
diꞌ amu sumapa sog langit atawa sog lupaꞌ bu bisan olo na.
Tibuwa bilaꞌ taluon niyu nog,
“Oo,”
atawa “Ondiꞌ,”
sumboy unuton niyu ok taluꞌ niyu koyon,
bagun diꞌ amu hukumon.
Ok Pongoni-ngoni dunut Pongandol
13 Bilaꞌ kobiyanan amu nok kobinsanaan,
na sumboy mongoni-ngoni amu.
Bilaꞌ mogloliyag amu,
sumboy mokkolangan amu nok pomudji sok Tuhan.
14 Bilaꞌ ongon diniyu ong mosakit,
na sumboy potawagonin ong mga migmokogulang sog jomaa.
Pongoni-ngonihan nilon yanin,
bu loklasan yanin nog lana biyan song ngalan nok Panghuꞌ.
15 Ok pongoni-ngoni nok tow nong motud ok pongandolin,
mokokuliꞌ sok tow milongkoꞌ,
pokodagon yanin nok Tuhan.
Bu bilaꞌ mikodusa yanin,
ampunon da yanin.
16 Saan na bilaꞌ mikodusa amu,
pokpinosunoy amu nog dusa niyu,
bu pongoni-ngonihoy niyu ok ponolokotow sok Tuhan bagun amu kulian.
Ok pongoni-ngoni nok tow mologdong,
tumugu bu mobarakat.
17 Si Nabi Elyas,
ok tow da sop mamaꞌ dinita.
Mingoni-ngoni yanin nog ikhlas bagun diꞌ mogdupiꞌ.
Dadi daꞌ pogdupiꞌ sog bon nok tolu tahun bu tongaꞌ.
18 Pokpuwas nituꞌ,
mingoni-ngoni yanin nong mogdupiꞌ puliꞌ,
na migdupiꞌ bangka tubuꞌ ong mga pomulan bu migbunga.a
19 Mga pigilugan,
bilaꞌ ongon diniyu ong misimoy sok kosobonnalan,
bu ongon ok tow mokopopuliꞌ diyanin,
na mobais tokodoy.
20 Sumboy kosunan niyu,
ok tow nong mikopopuliꞌ nog baldusa sog dalan nong mologdong,
moawon og baldusa koyon bu mobolong og lam nog dusa nin sabap sok tow koyon nong mikopopuliꞌ diyanin.
Wassalam