Ok Pokposun
pasal sok Sulat posunguꞌ song mga Ibrani nong Moktotombaꞌ
Mga pigilugan,
Salam diniyu kotanan.
Ok sulat kini nok posunguꞌ niyu bastahon, ondiꞌ kosunan bug sima ok sinumulat dun, sugaid ongon og duma mokokosun nong mikpikil nok si Pol miksulat nini sog bahasa Ibrani bangka pa bogbadoy nog duma sog bahasa Grik. Og duma sop nong mokokosun, mikpikil ilon nok solobuk sok kodumahan ni Pol, mamaꞌ ni Lukas, Apollosa atawa Barnabas ong miksulat nini.
Na bisan daꞌdun ok tantu nin sima ong miksulat nini, ok sinulatanin ong mga tow Ibrani nong moktotombaꞌ ni Isa Al-Masih. Ong mga tow Ibrani kini, tawagon da sop mga Yahudi atawa mga tow Israel. Ok sulat kini misulat mga 30 mangoy sog 40 tahun tidu sok kotubuꞌ puliꞌ ni Isa Al-Masih bangka pokpuliꞌ sok surgaꞌ.
Sog waktu nok sinulat kini, sigi-sigi binsanaon ong mga tow nong moktotombaꞌ ni Isa nong mga salu bangsa nilon Ibrani. Ong mga salu bangsa nilon kini tumombaꞌ sok Tuhan, sugaid ondiꞌ tumombaꞌ nok si Panghuꞌ Isa, yanin og Al-Masih nok piniliꞌ nok Tuhan. Dadi sinulatan ong mga moktotombaꞌ ni Panghuꞌ Isa kini bagun moksipagas ok kopongandol nilon bu pipondom dinilon nog daꞌdun og len nog dalan posunguꞌ sok Tuhan luwal biyan ni Isa Al-Masih, poꞌ yanin ong Mogogawon.
Sok sulat kini mikpotampal ong miksulat dun nong mipinda na ong mga olo-olo nituꞌ nok kilayaman nilon song masa ni Nabi Musa pasal sog Langgal, koimaman bug mga kurban nilon tagnaꞌ. Ongon og len-len nok pilabi nong miksulat nini: 1) Pipondom dinita nok si Panghuꞌ Isa, daꞌdun ok tolipunanin bu daꞌdun ok kodoksuanin. Pagga Bataꞌ yanin nok Tuhan, labi yanin song mga konabihan bug komalaikatan. Pilogdong da sop dini nong mokopotongow si Panghuꞌ Isa nok kowasa bug kotas nok Tuhan dinita, bu diyon diyanin ok pongaddatan nok Tuhan. 2) Tinaluan ita nok si Isa Al-Masih ok Kinotasan nog Gimam ta dituꞌ sok surgaꞌ. Ong mga Kinotasan nog Gimam nong mga Yahudi masa tagnaꞌ, mikkurban ilon nok potubuon para sog dusa nilon bug dusa nong mga tow tahun-tahun bagun mosutsi ilon. Sugaid si Panghuꞌ Isa, piglillaꞌ in og ginawa nin insan moimung kurban mogbayad nog mga dusa ta. Pagga daꞌdun og dusa nin, jukup ok kurbanin para dinita bagun ita moampun solama-lama. Saan na yanin ok kosurgaan ta. 3) Og duguꞌ ni Panghuꞌ Isa nong mibuyus sok kopatoyin kituꞌ, og gindanan nog ongon na og Bogu Pigjanjian nok Tuhan bug manusiyaꞌ nong mobais pa sog Dan Pigjanjian sog waktu ni Nabi Musa poꞌ daꞌdun ok koampunan luwal bilaꞌ mobuyus og duguꞌ sok kopatoy. 4) Sok sulat kini sinuksugan ita da sop pasal sok kopongandol nog duma nong mga tow moktotombaꞌ tagnaꞌ (sura 11). Biyan dun pipondoman da sop nong miksulat kini ong mga moktotombaꞌ nong mokpodayun ilon mongandol ni Panghuꞌ Isa bu moksandal toktob sok kodoksuan, poꞌ kanaꞌ ita mogbatu sog dunya. Ong motud nog bonuwa ta sok surgaꞌ.
Motabang sok ponabut nong mga polomasta nini bilaꞌ mokobasta ilon poguna nog Kitab Tawrat, Pogawaꞌ.
Bung mayan tonduan ita niyu nok Tuhan sok pogbasta ta kini, bu potontulonin ita niyu sog dalan nok posunguꞌ sok surgaꞌ.
Wassalam