Mga Mobantug nong Moktotombaꞌ
11
Ong maana nok kopongandol,
yonin na bilaꞌ tumombaꞌ ita nong mounut dodaꞌ ok pigdodamahan ta kituꞌ,
bu bisan ondaꞌ ta pa kituꞌ kotongow,
mitantu ta nong motabuk ta na dodaꞌ.
2 Na pasal sok kopongandol nong mga tow masa tagnaꞌ kituꞌ,
kisuatan ok Tuhan dinilon.
3 Sok kopongandol misabut ta nok piongon ok kotanan sog dunya kini bug kolangitan biyan sok Parman nok Tuhan.
Dadi ong motongow ta,
inimung tidu sok Parman nok Tuhan nog diꞌ ta motongow.
4 Sok kopongandol,
mikkurban si Habil dituꞌ sok Tuhan nong mobais pa tidu sog binogoy nog gilugin nok si Kabil.
Biyan sok kopongandolin miitung yanin mologdong,
bu kisuatan ok Tuhan diyanin bu sok kurbanin.
Dadi bisan minatoy si Habil,
ongon pa ong mobais nok suntuan malap ta tidu diyanin pasal sok kopongandolin sok Tuhan.
5 Pasal sop sok kopongandol,
inoyit nok Tuhan si Idris sok surgaꞌ,
sugaid daꞌ yanin pokobiyan sok kopatoy,
saan na daꞌ na yanin kobalak.a
Bu miunut sok Kitab,
sog daꞌ pa yanin oyitoy,
kisuatan ok Tuhan diyanin.
6 Ondiꞌ kosuatan dinita ok Tuhan bilaꞌ daꞌdun ok kopongandol ta diyanin.
Poꞌ sima-sima ong mokpolani sok Tuhan,
sumboy tumombaꞌ nog ongon ok Tuhan bu tumbasanin ok sosuku nog ikhlas og leg nilon mongongosun diyanin.
7 Na sok kopongandol ni Nabi Nuh,
migimung yanin nog gadjung bagun moawon ok salu baloyin.
Tinumombaꞌ yanin sok pidinsamaꞌ tumaluꞌ nok Tuhan nog ongon matong nog balaꞌ nog daꞌ sibon nilon kosuloyoy.
Ok kopongandol ni Nabi Nuh mipomotud nog dait hukumon ong mga duma nin manusiyaꞌ poꞌ ondaꞌ ilon tombaꞌ,
tibuwa si Nabi Nuh,
initung yanin nok Tuhan mologdong pasal sok kopongandolin.b
8 Sok kopongandol ni Nabi Ibrahim,
inunutin ok sinuguꞌ nok Tuhan diyanin nong mangoy yanin dituꞌ sog bonuwa nog jinanjiꞌ nok Tuhan nok pusakaon diyanin.
Binagakin og bonuwa nin,
bisan ondaꞌ in pa kosunoy bug ayin yanin posunguꞌ.c
9 Sok kopongandol midopot na si Nabi Ibrahim sog bonuwa nog jinanjiꞌ diyanin nok Tuhan,
bu migonong ilon sog lokow-lokow mamaꞌ sopantun nong mga langyow.
Migonong da sop sog lokow-lokow og bataꞌ in nok si Isahak bu gapuꞌ in nok si Yaꞌkub nok kipusakaan da sop nog janjiꞌ nok Tuhan kituꞌ.
10 Poꞌ mingandol bu migdodama si Nabi Ibrahim song mopagon nok siyudad nog ginantaꞌ bu inimung nok Tuhan dituꞌ sok surgaꞌ.
11 Bu si Sarah,
og libun ni Nabi Ibrahim nog baug,
mingandol da sop sog janjiꞌ nok Tuhan nong mogbodos da yanin.
Saan na pasal sok kopongandolin,
mikobataꞌ yanin bisan mogulang na.
12 Dadi tidu ni Nabi Ibrahim,
nong mogulang na tokodoy bu diꞌ na bosiya mokobataꞌ,
miktidu og bangsa nong modakol ok ponupuꞌ in,
mamaꞌ nog bitun sog langit bug pontad sog doksaan.d
13 Na minatoy ilon kotanan sog diyalom kopongandol nilon sog janjiꞌ nok Tuhan.
Daꞌ ilon sooy pokotabuk nog jinanjiꞌ dinilon sog bon nilon totubuꞌ,
sugaid mitongow na nilon sok kolayuan,
bu migloliyag ilon sog jinanjiꞌ nok Tuhan.
Minangkon ilon nong mga dayu hadja ilon,
bu ondiꞌ mogbatu dini sog dunya.
14 Na ong mga mokopoktaluꞌ nong mamaꞌ nituꞌ,
motampal tokodoy nong monontong pa ilon nok tantu bonuwa nilon.
15 Ondaꞌ na pikiloy niloꞌ Ibrahim og bonuwa kituꞌ nok piktiduhan nilon,
poꞌ bilaꞌ bosiya pinikil pa nilon,
ongon pa waktu nong mokpuliꞌ ilon dituꞌ.e
16 Sugaid migdodama ilon dunut loliyag sog bonuwa nog landuꞌ kobais dituꞌ sok surgaꞌ.
Saan na ondiꞌ mosipog ok Tuhan ingalanan nok Tuhan nilon,
motampal koyon poꞌ tinogamahanin ilon nok pogonongan.
17 Pasal sok kopongandol ni Nabi Ibrahim,
lamigin kurbanon ok solobuk-lobuk bataꞌ nilon ni Sarah,
yonin na si Isahak.
Dadi dangan sinulayan yanin,
inunutin ok kolegan nok Tuhan bisan jinanjiꞌ nok Tuhan diyanin si Isahak.f
18 Poꞌ tagnaꞌ tinaluan yanin nok Tuhan nog biyan ni Isahak koongonan yanin nong mga ponupuꞌ nong mogoyit nong ngalanin.g
19 Na mingandol si Nabi Ibrahim nog bisan matoy sooy si Isahak sok pokkurbanan,
potubuon da yanin mokpuliꞌ nok Tuhan.
Dadi mikpuliꞌ si Isahak sog gommaꞌ in mamaꞌ nok tidu sok kopatoy,
poꞌ daꞌ podayunoy nok Tuhan nok kurbanon yanin.
20 Sok kopongandol ni Isahak sog olo ong matong posunguꞌ,
pingoni-ngonihanin si Yaꞌkub bu si Esaw sok Tuhan nog bogoyan ilon nog barakat.
21 Pasal sok kopongandol ni Yaꞌkub sog daꞌ pa yanin patoy,
pingoni-ngonihanin pa nog barakat og duwaꞌ buk gumbataꞌ ni Yusuph bangka yanin sudjud sok tungkodin mokpudji sok Tuhan.
22 Na sok kopongandol ni Yusup nok posunguꞌ na yanin matoy,
pipondomanin ong mga duma nin ponupuꞌ ni Israeli nog ongon og waktu nog gonatan nilon og bonuwa Misir.j
Bu pimilinin nog oyiton nilon ok tulanin bilaꞌ mopanow ilon na.k
23 Sok kopongandol nong mga mokogulang ni Nabi Musa dangan binataꞌ yanin,
binuni nilon sok solod nok tolu bulan.
Poꞌ mitongow nilon nong mopiyalaki yanin nog bataꞌ,
bu ondaꞌ ilon kondok dumugtul sok suguan nok Pirꞌawn.l
24 Pasal sok kopongandol ni Nabi Musa dangan sinumolag na yanin,
diꞌ yanin meleg tawagon nog bataꞌ yanin nog bataꞌ nok Pirꞌawn,
bisan pa og bataꞌ nok Pirꞌawn nog libun ong mikposolag diyanin.
25 Pilabi nin pa ok kobinsanaan dunut nong mga piktowan nok Tuhan,
gabaꞌ sok kosannangan podaliꞌ dunut nong mga pokpoduhul nok konapsuhan nong mokoyit sok kodusahan.
26 Hinalgaanin pa moksandal nog binsanaꞌ dunut sog Al-Masih gabaꞌ sog daya nong Misir,
poꞌ pilabi nin ok tumbas kituꞌ nok pigdodamahan sog binayaꞌ gondow.
27 Pasal sok kopongandol ni Nabi Musa sok Tuhan,
ginonatanin og bonuwa Misir,
bu ondaꞌ yanin kondok sog lingit nok Pirꞌawn.
Ginaga nin ok kotanan nog logon nok kibiyananin,
bu ondaꞌ na yanin koleg mokpuliꞌ dituꞌ poꞌ mamaꞌ in da mitongow ok Tuhan nog ondiꞌ motongow.
28 Pasal da sop sok kopongandol ni Nabi Musa sok Parman nok Tuhan,
tinaluanin ong mga tow nong moghalilaya ilon nok Pogliyusm.
Sinuguꞌ in ilon moksumbaliꞌ nog bataꞌ nog bilibili bu pisikon og duguꞌ in dituꞌ sok tas bug mansing kilid nok pintuan nilon.
Sinuguꞌ dinilon mamaꞌ nini bagun diꞌ mosunuꞌ matoy og bataꞌ nilon nog gulang bataꞌ laki dunut song mga gulang bataꞌ laki nong mga tow Misir.
Dadi dangan minatong ong malaikat nong mongongalap nong nyawa nok tow,
liniyusan ilon da pasal sog duguꞌ kituꞌ.
29 Sok kopongandol mikobiyan ong mga tow Israel sog Dagat Pula nong mamaꞌ ilon mikpanow song mimala nog lupaꞌ.
Tibuwa dangan tinumolipag ong mga sundalu nong Misir nong minglasig kini dinilon,
milomos ilon kotanan.n
30 Pasal da sop sok kopongandol nong mga tow Israel,
mitumpag og galad sok siyudad nog Ariha pogdoksuꞌ nilon poglibut-libutoy pitu ondow.o
31 Pasal sok kopongandol,
miawon sok kopatoy og libun nong migdagang nog dongoganin nok si Rahab.
Kanaꞌ yanin mamaꞌ nong mga duma tow Ariha nong mingatu sok piktowan nok Tuhan.
Poꞌ tinolimaꞌ in nong mobais ong mga migogumatiꞌ kituꞌ nok sinuguꞌ ni Yussa,
yonin na ok kounutan nong mga tow Israel.p
32 Na diꞌ u na pogusoy-usoyan suksugon ok kopongandol sok Tuhan niloꞌ Gideon,
Barak,
Samson,
Yepta,
Daud,
Samwel bu ong mga konabihan,
poꞌ kulang og waktu u.
33 Pasal sok kopongandol nilon,
sinakup nilon ong mga bonuwa,
migbayaꞌ ilon mounut sok kologdongan,
bu tinabuk nilon ong mga jinanjiꞌ nok Tuhan.
Sok kopongandol,
pidokom nok Tuhan ong mga babaꞌ nog liyun para dinilon,q
34 ongon ong mga daꞌ kotutung song miksuliyab nog gapuy,r
bu ong mga duma dinilon mipuwas sok kopatoy biyan sok kalis.
Ongon ong mga molamma,
sugaid biyan sok kopongandol,
pipagas ilon nok Tuhan,
ong mga duma miksiboluꞌ dituꞌ sok pogbunuan,
bu binugow nilon ong mga sundalu nong mga len bonuwa.
35 Sok kopongandol nog duma nok kolibunan,
ongon ok kolasahan nilon nok pipuliꞌ dinilon nok totubuꞌ tidu sok kopatoy.s
Tibuwa og duma sop,
bininsanaꞌ ilon sampoy matoy,
poꞌ ondiꞌ ilon meleg nok koluhayahan dini sog dunya gantiꞌ sok poktolikud nilon nok kotombaꞌ nilon.
Poꞌ mitantu nilon nong matong da og waktu nok potubuon ilon mokpuliꞌ nok Tuhan,
bu mokotolimaꞌ ilon nog labi pa molingkat bu mosannang nok kotubuꞌ solama-lama.t
36 Bu ong mga duma sop nong mingandol,
pigunda-unda bu piglanog ilon,
ong mga duma sop kinodinahan bu pinirisu.u
37 Ongon ong mga piktibagan nog batu toktob matoy,v
ong mga duma sop pinatoy biyan sok kalis,
bu ongon og ginabas toktob mibolaꞌ og lawas nilon.w
Mikpanow-panow ong mga duma nong migdogdoy nok panit nog bilibili bug kambing.
Landuꞌ ok komiskin nilon,
pigbinasa bu pigdagdag ilon.
38 Kanaꞌ patut pogonongan og dunya kini para dinilon.
Migdundahan ilon sog ginlupaan mimala bu sok kobontudan.
Miksolobuni ilon sog langubx bu sog luwang nog lupaꞌ.
39 Binantug tokodoy ok kotanan nong mga towanan kini pasal sok kopagon nok kopongandol nilon sok Tuhan.
Sugaid daꞌ nilon kotabuk og jinanjiꞌ nok Tuhan sog bon nilon totubuꞌ.
40 Poꞌ ongon og labi pa mobais nong maksud nok Tuhan para dinita.
Dadi ginantaꞌ in nong mogdongan-dongan ita bug ilon tumabuk nog janjiꞌ in nong mopojukup ita dunut dinilon sok surgaꞌ.