Ok Sulat ni Pol Posunguꞌ ni
PILEMON
1
Salam dinika,
Pilemon,
nok kolasahan nami,
og duma nami mogoginang.
Tidu kini dinakon,
si Pol sampoy sog gilug ta sok kotombaꞌ nok si Timuti.
Soliyan ku mipirisu pasal sok pogunutu ni Isa Al-Masih.
2 Salam-duwaa da sop ni Appiya,
og gilug ta nog libun bu ni Arkippus,
og duma ta mokpoposampoy nong motowakkal mamaꞌ nok kotowakkal nok sundalu,
sampoy og jomaa nong moglimud-limud sog baloy nu,
Pilemon.
3 Bung mayan modiyon diniyu ok kolasa-kololat bug kosannangan tidu sok Tuhan,
og Gommaꞌ taꞌ niyu bu ni Panghuꞌ Isa Al-Masih.
Ok Poksarang-sukul bug Pongoni-ngoni ni Pol
4 Lolayun ku moksarang-sukul sok Tuhan bilaꞌ molabitu ika song mga pongoni-ngoni u,
5 poꞌ midongogu ok pasal sok pongandol nu bu pasal sog lasa nu diyon ni Panghuꞌ Isa Al-Masih bug mga sukuꞌ in.
6 Dadi mingoni-ngoni u nong mogbunga ok pokposampoy nu nok kotombaꞌ nua,
bagun mogdodungag pa ok kokosun pasal sog lam nok kobaisan nong matong song mga moktotombaꞌ biyan ni Isa Al-Masih.
7 U gilugu,
og lasa nu mikobogoy dinakon nong mosolag nog loliyag bug kolasig,
poꞌ pasal dinika miksilasig ok pongatoyan nong mga koilugan ta sukuꞌ ni Isa Al-Masih.
Ong mga Pongoni ni Pol diyon ni Pilemon
8 Dadi pasal sok kopatut nog binogoy dinakon nog Al-Masih,
motowakkalu bosiya sumuguꞌ dinika nong mobais nu inangon.
9 Sugaid pagga miglinasahoy ita niyu,
mokpotabangu pa dinika.
Akon si Pol,
ong mogulang na nok tow,
bu ningkomun mipirisu u sabap sok pokposampoyu ni Isa Al-Masih.
10 Dadi mokpokilolatu dinika para sok tow nong miimung na nog bataꞌ u sok kotombaꞌ soliyan ku mipirisu,
yonin na si Onesimus.
11 Tagnaꞌ daꞌdun ok kopologunahan nu diyanin,
sugaid ningkomun duwaꞌ ita na ong mokpologunahanb dun.
12 Ningkomun pipuliꞌ u na si Onesimus dinika.
Landuꞌ u yanin kolasahan,
mamaꞌ hantang nok pongatoyan ku nok pinoyitu dinika.
13 Kolegan ku bosiya nog dini pa yanin dunut dinakon,
bagun mokogantiꞌ yanin dinika tumabang dinakon soliyan ku mipirisu kobalan sok pokposampoyu nong Mobais nok Suksugan pasal ni Isa Al-Masih.
14 Tibuwa mikpikilu nok kanaꞌ mopatut nok pobagaku si Onesimus dini dinakon bilaꞌ diꞌ a meleg.
Kolegan ku ok kotabang nu kanaꞌ pasal sok kotogol,
sugaid pasal sog ikhlas nok pongatoyan nu.
15 Kalu-kalu yonin kini ok sabapan saan na pipolayuꞌ si Onesimus dinika podaliꞌ,
bagun mokopuliꞌ yanin dinika solama-lama.
16 Ningkomun kanaꞌ na yanin kini tahan gulipon nu,
sugaid og gilug nu na sok kotombaꞌ nok kolasahan.
Kolasahan ku tokod si Onesimus.
Na labi-labi pa og lasa nu diyanin poꞌ gulipon nu yanin,
bu gilug nu na sop yanin sok kotombaꞌ pagga mogunut amu na duwaꞌ sok Panghuꞌ.
17 Dadi bilaꞌ initung nu da akon nog duma nu mokposampoy pasal sog Al-Masih,
tolimaꞌ nu si Onesimus mamaꞌ nok poktolimaꞌ nu dinakon.
18 Bilaꞌ ongon og dusa nin atawa gutangin dinika,
abat nu dinakon!
19 Akon si Pol,
sinulat tokodoy kini nok komotu.
Akon ong mogbayad dinika.
Kanaꞌ u bosiya labiton nong mibogu ok kotubuꞌ nu biyan dinakon.c
20 Dadi gilugu,
bung mayan unuton nu ok kobaisan kini para sok Panghuꞌ ta.
Polasig nu ok pongatoyan ku pasal sok kopoksolobuk ta diyanin.
21 Sok kopoksulatu nini,
mitantu u nok tombaan nu bisan nog labi pa tidu sok pingoni u.
22 Na ongon pa ok pongonihon ku dinika.
Togamahan niyu sop akon nok pogulalihan ku,
poꞌ migdodama u nog duhulon da diniyu nok Tuhan ok pongoni-ngoni niyu nong mokopuliꞌ u diyon diniyu.
23 Si Epapras,
og duma u mipirisu sabap sok kopogunut nami ni Isa Al-Masih,
miksalam-duwaa dinika.
24 Mikposampoy da sop nok salam-duwaa siloꞌ Markus,
Aristarkus,
Demas bug Lukas.
Ilon koyon og duma u moginang dini.
25 Bung mayan modiyon sok pongatoyan niyu ok kolasa-kololat ni Panghuꞌ Isa Al-Masih.
Wassalam