Ok Sulat posunguꞌ song mga
IBRANI
nong Moktotombaꞌ
Motas pa og Bataꞌ nok Tuhan tidu song mga Malaikat
1
Song masa nok tagnaꞌ kituꞌ,
modakol bu miglologinis ok pobiyan nok Tuhan moktaluꞌ song mga pingapuꞌ ta niyu biyan song mga konabihan.
2 Sugaid song ningkomun kini,
miktaluꞌ dinita ok Tuhan biyan sog Bataꞌ in nok si Isa Al-Masih.
Biyan diyanin piongon nok Tuhan og langit bug lupaꞌ,
bu og Bataꞌ in ok piniliꞌ in kopusakaan sog lam nituꞌ.
3 Motongow diyon sog Bataꞌ in ok sahaya nok kotas nok Tuhan,
bu diyon diyanin ok pongaddatan nok Tuhan poꞌ solobuk ilon da.
Og Bataꞌ ong mogbayaꞌ bu mogipat sog lam nog olo-olo biyan sok kowasa nok taluꞌ in.
Dangan midoksuꞌ in kurbanoy og lawasin para poksutsi sog dusa nong manusiyaꞌ,
miningkud na yanin sog dapit lintu nok Tuhan Mahatinggia dituꞌ sok surgaꞌ.
4 Dadi miimung og Bataꞌ nok Tuhan labi tokodoy motas tidu song mga malaikat,
mamaꞌ nog gollal bug ngalan binogoy diyanin nok Tuhan labi pa motas tidu dinilon.
5 Poꞌ tinaluꞌ asal nok Tuhan sog Bataꞌ in,
“Ika og Bataꞌ u,
posampoyon ku sog gondow kini nog akon og Gommaꞌ nu.”b
Ong mamaꞌ niyon nok taluꞌ,
ondaꞌ in sibon kotaluꞌ song mga malaikatin.
Bu miktaluꞌ puliꞌ ok Tuhan,
“Akon og Gommaꞌ in,
bu yanin og Bataꞌ u.”c
6 Dangan pangoyon na nok Tuhan sog dunya ok solobuk-lobuk nog Bataꞌ in,
miktaluꞌ yanin,
“Ok kotanan nong mga malaikatu sumboy sumudjud diyanin.”d
7 Tibuwa pasal song mga malaikatin,
mamaꞌ nini ok tinaluꞌ nok Tuhan,
“Ong mga malaikatu,
inimungu mamaꞌ nog galuꞌ,
ilon koyon ong mga sosuguon ku nok pitimaluyu mamaꞌ nog ligaꞌ nog gapuy.”e
8 Sugaid pasal sog Bataꞌ in,
mamaꞌ nini ok tinaluꞌ nok Tuhan,
“Ok pogbayaꞌ nu,
U Tuhan,
daꞌdun ok kodoksuanin,
ok pomarinta nu mologdong.”
9 “Kolasahan nu ok kologdongan,
bu kolingitan nu ok kolaatan.
Saan na piniliꞌ u ika,
akon ok Tuhan nu,
piloliyag bu pigaddatan ku ika,
labi pa tidu song mga kodumahan nu.f”
10 Bu miktaluꞌ sop ok Tuhan dituꞌ sog Bataꞌ in,
longin,
“Sok ponognaan tokodoy,
U Panghuꞌ,
ika ong mikpoongon nog lupaꞌ,
bu ika da sop ong migimung nog langit.
11 Mobolong da og lupaꞌ bug langit,
sugaid ika,
ondiꞌ mopinda solama-lama.
Ok kotanan nituꞌ mamaꞌ nok ponapot nong modanul,
12 dadi pukuton nu,
gantian bu pilakon nu.
Sugaid ika,
yonin da solama-lama.”g
13 Ok Tuhan ondaꞌ da sop sibon poktaluꞌ song mga malaikatin mamaꞌ nok tinaluꞌ in kini sog Bataꞌ in,
“Ingkuda dini sog dapit lintu u
toktob dagon ku ong mga banta nu,
bu moimung ilon mamaꞌ nog gontudan nog botis nu.h”
14 Ong maana nin,
ong mga malaikat kini,
mga sosuguon hadja nok pioyit nok Tuhan bagun tabangan ok sosuku nok tow nong moawon.