Og Halgaꞌ nok Kopogawon
2
Dadi saan na sumboy ta bologbogan pahatul ok kosobonnalan nok kiosunan ta tidu sok Tuhan bagun diꞌ ita mokosuwoy dun.
2 Poꞌ bisan ok taluꞌ nok pisampoy nong mga malaikat motud tokodoy,
bu ong mga tow nog dinumugtul dun,
siniksaꞌ nok Tuhan nog dait dinilon.
3 Dadi olohon ta poghalliꞌ ok kosiksaan,
bilaꞌ diꞌ ta halgaan og ilakad kosolag nok pogawon nok Tuhan.
Si Isa mismu ong mikposampoy pasal dun,
bu sinaksian da sop kini dinita nong mga tow nong mikodongog diyanin.
4 Minampuꞌ da sop ok Tuhan mokposobonnal nok pokposampoy nilon biyan song miglologinis nog gindanan,
mga mokosobuꞌ-sobuꞌ nog ginang bu biyan sok pogbogoyin nong mga kopandoyan nog Ruh Mahasutsi sok sima-sima ok koleganin.
Mikpotimaluy Manusiyaꞌ si Isa Al-Masih bagun Mogawon song mga Tow
5 Dadi ningkomun,
bilaꞌ pogabit-abitan ta niyu ok pasal sog bogu dunya nong matong posunguꞌ,
na kanaꞌ ong mga malaikat ok popogbayaon nok Tuhan dun.
6 Poꞌ misulat sog diyalom nok Kitab,
“U Tuhan,
olo buwan ong manusiyaꞌ nok pokpikilon nu ma?
Olo buwan og bataꞌ nong manusiyaꞌ nog ipaton nu ma?
7 Inimung nu yanin nong mobabaꞌ tidu song mga malaikat song mopolok nog waktu,
bu binogoyan nu yanin nok kotas bug kowasa.
8 Og lam nog olo-olo,
pidiyalom nu diyanin.”a
Pagga inuwakil na diyanin og lam nituꞌ,
daꞌdun og ondaꞌ kosunuꞌ sok pogbayaꞌ in.
Song ningkomun kini,
ondiꞌ ta pa motongow og lam nituꞌ sok kongkoman nok pogbayaꞌ in.
9 Sugaid mitongow ta dodaꞌ nong miimung si Isa mobabaꞌ tidu song mga malaikat podaliꞌ,
tibuwa ningkomun piotas bu pigaddatan yanin poꞌ miksandal yanin nok kopatoy.
Dadi pasal sok kolasa-kololat nok Tuhan,
mikonanam yanin nog hukuman patoy gantiꞌ dinita niyu.
10 Ok Tuhan ong mokpoongon nog lam nog olo-olo nituꞌ,
bu ok kotanan nituꞌ moongon bagun pogaddatan yanin.
Dadi dumait sok Tuhan nok pibiyanin si Isa sok kobinsanaan bagun miimung yanin mogogawaon solama-lama.
Poꞌ yanin ok piktiduhan nok kopogawon,
bu biyan diyanin modakol ong manusiyaꞌ nong moimung bataꞌ nok Tuhan bu mokampuꞌ sok kotasin.
11 Dadi si Isa ong mokosutsi song mga tow tidu song mga dusa nilon,
bu ong mga tow nok piksutsi nin,
solobuk da og Gommaꞌ nilon,
saan na ondiꞌ mosipog si Isa tumawag nog gilugin ilon.
12 Mamaꞌ na nok tinaluꞌ ni Isa sog Gommaꞌ in,
“Bantugon ku ong ngalan nu song mga pigilugan ku,
pudjihon ku ika biyan sok kolangan sok titongaꞌ nog jomaa nong mga moktotombaꞌ.”b
13 Bu miktaluꞌ da sop si Isa,
“Mongandolu sok Tuhan.”
Bu taluꞌ in pa,
“Dini u dunut mga gumbataꞌ nog binogoy nok Tuhan dinakon.”c
14 Dadi pagga taga gungod bug duguꞌ ong mga manusiyaꞌ nong moimung mga gumbataꞌ nok Tuhan,
mikpotimaluy da sop si Isa Al-Masih nong manusiyaꞌ bagun poglillaꞌ in og ginawa nin para dinilon.
Saan minatoy yanin sok kayu bagun dagonin ok taga bayaꞌ sok kopatoy,
yonin na og Iblis.
15 Na pasal sok kopatoyin,
mopuwasin ong mga tow nong miulipon nog gondok nilon sok kopatoy sog bon nilon totubuꞌ.
16 Tantu tokodoy nok kanaꞌ ong mga malaikat ong mikkogunahan nok tabang ni Isa Al-Masih,
sugaid ita niyu mga ponupuꞌ ni Nabi Ibrahim.
17 Saan na sumboy mokpotimaluy yanin nok tow batuk song mga pigiluganin,
bagun moimung yanin nok Kinotasan nog Gimam nong molilolatoy bu moliunungoy.
Dadi inimungin og ginawa nin nok kurban sok Tuhan gantiꞌ nog dusa nong manusiyaꞌ bagun moampun ilon.
18 Pagga mikobiyan yanin sok kobinsanaan,
bu sinuloyan yanin nog Iblis sumassat,
yonin da sop og dalanan nong mokotabang yanin song mga tow nong mosassat.