Motas pa si Panghuꞌ Isa tidu ni Nabi Musa
3
Dadi mga sinutsi nok pigilugan ku,
mga kodumahan ku nog inonggat moimung nok piktowan nok Tuhan,
pondom niyu si Isa.
Inuwakilan yanin nok Tuhan mokpoposampoy,
bu yanin ok Kinotasan nog Gimam nog unutan ta niyu.
2 Moliunungoy yanin sok Tuhan nog yonin na og inuwakil diyanin,
mamaꞌ da sop ni Nabi Musa moliunungoy sog ginang nok sinuguꞌ diyanin diyon sog lam nok piktowan nok Tuhan.
3 Tibuwa patut tokodoy potason og Al-Masih tidu ni Nabi Musa,
poꞌ bilaꞌ pononggion ta sog baloya,
mobantug ong migimung tidu sog inimung.
4 Pasal kiosunan ta nog bilaꞌ ongon na og baloy midoksuꞌ,
maana nin ongon ong migimung dun.
Sugaid ok Tuhan ong migimung sok kotanan nog olo-olo.
5 Na si Nabi Musa,
ok sosuguon nok Tuhan nok kopongandolan mogipat sok piktowan nok Tuhan masa nituꞌ,
bu miktaluꞌ yanin pasal bug olo ok posampoyon nok Tuhan lomaꞌ-dinglag.
6 Sugaid og Al-Masih,
og Bataꞌ nok Tuhan nok kopongandolan mogbayaꞌ sok piktowan nok Tuhan.
Dadi ita kini ong mga piktowanin,
mamaꞌ sopantun nog baloyin bug ayin yanin migonong,
bilaꞌ ondiꞌ ta lukatan ok kopongandol bug pogdodama ta sog Al-Masih.
Ok Pomintangan bagun ita Tumombaꞌ
7 Saan na ok taluꞌ nog Ruh nok Tuhan,
“Ningkomun kini sog waktu nong modongog niyu ok tingog nok Tuhan,
8 ondiꞌ niyu potogason ok pongatoyan niyu
mamaꞌ nong mga pingapuꞌ niyu kituꞌ masa tagnaꞌ nong mingatu dinakon
dangan sinuloyan nilon akon dituꞌ sog ginlupaan mimala.
9 Bisan pitongowu dinilon og ginangu nong mokosobuꞌ-sobuꞌ sog bon nok pat puluꞌ tahun,
sinuloyan nilon da akon sok kolaatan nilon.
10 Saan na milingitu dinilon,
bu miktaluꞌ u,
‘Lolayun mosuwoy ok pongatoyan nong mga tow kini dinakon,
diꞌ nilon tokodoy unuton ok kolegan ku.’
11 Dadi pasal sog lingitu,
sinapahan ku
nog diꞌ ilon mokonanam nong mosannang nok kopogulali nog bogoyon ku.”b
12 Mga koilugan ku moktotombaꞌ,
pokpotubud amu bagun diꞌ moungod ok kolaatan sok pongatoyan niyu sampoy diꞌ amu na tumombaꞌ bu mokopolayuꞌ sok Tuhan ok totubuꞌ solama-lamac.
13 Saan na sumboy mokpondom-pinondomoy amu sog bon niyu totubuꞌ bagun diꞌ amu koakkalan nog dusa toktob tumogas ok pongatoyan niyu sok Tuhan.
14 Poꞌ kobahagian ita niyu sog lam nog barakat nog diyon sog Al-Masih bilaꞌ mopagon da ok kopongandol ta niyu tidu sog waktu nok tinumombaꞌ ita sampoy na sok kodoksuan.
15 Mamaꞌ na nog ugat pa kolabit,
“Ningkomun kini sog waktu nong modongog niyu ok tingog nok Tuhan,
ondiꞌ niyu potogason ok pongatoyan niyu
mamaꞌ nong mga pingapuꞌ niyu kituꞌ masa tagnaꞌ nong mingatu dinakon.”d
16 Sima ma ong mingatu kituꞌ sok Tuhan bisan midongog nilon na ok taluꞌ in?
Na yonin na ong mga tow nog inoyit ni Nabi Musa lumuwas tidu sog bonuwa Misire.
17 Bu sima ok kilingitan nok Tuhan sok solod nok pat puluꞌ tahun?
Kanaꞌ taꞌ ong mga towanan kituꞌ nong mingimung nok kodusahan bu mimatoy sog ginlupaan mimala?
18 Sima sop ok sinapahan nok Tuhan nog diꞌ na ilon mokonanam nong mosannang nok kopogulali nog bogoyonin?
Na,
yonin na ong mga tow nog dinumugtul diyanin.
19 Dadi kiosunan ta nog diꞌ ilon mokonanam nong mosannang nok kopogulali nog bogoyonin,
pasal ondaꞌ ilon tombaꞌ.