Ong Mosannang nok Kopogulali, og Janjiꞌ nok Tuhan sok Piktowanin,
4
Sugaid bisan pa maꞌ nituꞌ ong miinang song mga pingapuꞌ ta kituꞌ,
ongon pa og janjiꞌ nok Tuhan pasal song mosannang nok kopogulali nog bogoyonin sampoy ningkomun.
Saan na mokpotubud ita tokodoy bagun daꞌdun dinita niyu og diꞌ mokampuꞌ song mosannang nok kopogulali nog jinanjiꞌ nok Tuhan kituꞌ.
2 Poꞌ pisampoy da sop dinita niyu ong mobais nok suksugan pasal song mosannang nok kopogulali kini,
mamaꞌ nong midongog nong mga pingapuꞌ ta kituꞌ.
Sugaid daꞌ ilon pokohampit sog janjiꞌ nok Tuhan,
poꞌ daꞌ ilon tombaꞌ sok pisampoy dinilon.
3 Na sosuku hadja nok tinumombaꞌ,
ong mokonanam nong mosannang nok kopogulali nog bogoyonin.
Sugaid pasal song mga tow nog daꞌ tombaꞌ,
miktaluꞌ ok Tuhan,
“Pasal sok kolingitu sinapahan ku nog diꞌ ilon mokonanam nong mosannang nok kopogulali nog bogoyon ku.”a
Tinaluꞌ in mamaꞌ niyon bisan ong mosannang nok kopogulali kituꞌ mitogama na dinsamaꞌ sok kopokpoongon nog dunya.
4 Motampal nong mitogama na ok kopogulalihan koyon poꞌ sinulat sok Kitab nong minulali ok Tuhan sog lam nog ginangin sog ikopituꞌ ondow.b
5 Bu tinaluꞌ da sop sok Kitab,
“Ondiꞌ ilon tokodoy mokonanam nong mosannang nok kopogulali nog bogoyon ku.”c
6 Dadi ong maana nin,
mipodinsamaꞌ na ok kopogulali koyon bagun mokonanam ong mga tow dun.
Sugaid ong mikuna mikodongog nong mobais nok suksugan kini,
daꞌ ilon pokonanam song mosannang nok kopogulali nog bogoyon nok Tuhan,
poꞌ dinumugtul ilon.
7 Dadi migbogoy puliꞌ ok Tuhan nog len waktu bagun mokonanam ong mga tow song mosannang nok kopogulali nog bogoyonin,
yonin na ong ningkomun kini.
Poꞌ dangan mikobiyan nong mobon nog waktu,d
miktaluꞌ ok Tuhan biyan ni Nabi Daud mamaꞌ nong milabit na,
“Ningkomun kini sog waktu nong modongog niyu ok tingog nok Tuhan,
ondiꞌ niyu potogason ok pongatoyan niyu.”e
8 Na si Yussa,
ok kounutan nok sinumukli ni Nabi Musa,
migoyit dinilon sog bonuwa Israelf.
Sugaid motampal nok kanaꞌ da og bonuwa koyon ong mosannang nok kopogulalihan nok pigbinaan kituꞌ nok Tuhan.
Poꞌ miktaluꞌ ok Tuhan nog ongon pa og waktu mokonanam ong mga tow sok kopogulali nog bogoyonin.
9 Dadi ongon pa ong mitogama para song mga tow sukuꞌ nok Tuhan,
ong mosannang nog Gondow Pogogulali.
10 Poꞌ ong mikonanam song mosannang nok kopogulali nog binogoy diyanin nok Tuhan,
mokulali da sop yanin song mga ginangin,
mamaꞌ nong minulali ok Tuhan sog ginangin.
11 Saan na mogmuhut-muhut ita niyu bagun mokampuꞌ song mosannang nok kopogulali kini.
Ondiꞌ ita mogdogiling sok pogdugtul nong mga pingapuꞌ ta kituꞌ,
poꞌ insunoy ondiꞌ ita da sop mokonanam dun.
12 Poꞌ ok Parman nok Tuhan mokobogoy nok kotubuꞌ bu landuꞌ kobisa,
mokutong pa tidu sok kalis nok sobolaꞌ-posobolaꞌ og babaꞌ in bu lumogbas sog longlonguan bug tulan nok tow.
Ok Parman nok Tuhan,
kosunanin ok pikilan bu diyalom pongatoyan nong manusiyaꞌ.
13 Daꞌdun ok piongon nong mokopoksolobuni sok Tuhan,
motongowin ok kotanan.
Kobuyaan og lam nok ponginangon ta sok ponontong nog humukum dinita.
Si Panghuꞌ Isa ok Kinotasan nog Gimam
14 Na ongon na ok Kinotasan nog Gimam ta nog diyon sok kilidan nok Tuhan sok surgaꞌ,
yonin na si Isa,
og Bataꞌ nok Tuhan.
Saan na popagonon ta ok kotombaꞌ ta diyanin.
15 Poꞌ yanin ok Kinotasan nog Gimam ta nong molilolatoy song mga manusiyaꞌ nong molomu mosassat,
pasal kibiyananin da sop og lam nog ginisan nok sassat,
sugaid daꞌ yanin pokodusa.
16 Dadi sok pongoni-ngoni ta,
sumboy diꞌ ita mogalang-alang mokpolani sok Tuhan nong molilolatoy bu molasa bagun tabanganin ita biyan sog lasa bug lolatin,
labi na sog waktu nok kologonan ita.