5
Na pobatukon ta na ong motud nok Kinotasan nog Gimam ta nok si Isa Al-Masih song mga kinotasan nog gimam dini sog dunya.
Piniliꞌ ok sosolokotow dinilon tidu song mga salu bangsa ta Yahudi,
bu winakil yanin bagun moktolagad sok Tuhan para song mga tow.
Binogoyan ok kinotasan nog gimam nok kopatut mogwakil nok sodokkaa bu mokkurban para song mga dusa nong mga tow.
2 Na molilolatoy yanin song mga tow nog awam bu mosuwoy sog dalan mologdong poꞌ yanin sooy taga kolamma song mga sassat.
3 Pasal mokoimung da ma sop yanin nog dusa,
sumboy na dodaꞌ yanin mokkurban para song mga dusa nog ginawa nin,
kana tibuwa para song mga dusa nog duma nin manusiyaꞌ.
4 Na mosolag ok kobantugan nong mga miimung nok kinotasan nog gimam.
Bu daꞌdun ok tow nong mopotasin og lawasin moimung mamaꞌ niyon,
sugaid ok Tuhan da ong mokpiliꞌ diyanin,
mamaꞌ nok kopiliꞌ in ni Harunb song masa tagnaꞌ kituꞌ.
5 Mamaꞌ nituꞌ da sop si Isa,
daꞌ in potasoy og lawasin moimung nok Kinotasan nog Gimam,
sugaid piniliꞌ yanin nok Tuhan,
taluꞌ in,
“Ika og Bataꞌ u,
posampoyon ku sog gondow kini nog akon og Gommaꞌ nu.”c
6 Bu miktaluꞌ pa tokodoy ok Tuhan sok Kitab,
longin,
“Ika na og gimam solama-lama.
Ok kopogimam nu mamaꞌ nok kopogimam ni Malkisedek.”d
7 Sog bon ni Isa mitubuꞌ dini sog dunya,
mingoni-ngoni yanin dunut gaduy posunguꞌ sok Tuhan nong mikotabang diyanin tidu sok kopatoy.
Dadi pasal sok pogunutin sok kolegan nok Tuhan,
tinolimaꞌ nok Tuhan ok pongoni-ngoni nin.
8 Bisan yanin og Bataꞌ nok Tuhan,
kimosun yanin mogunut sok kolegan nog Gommaꞌ in tidu sok kibiyananin nok kobinsanaan.
9 Dangan midoksuꞌ in ong mga ginang nok suguan diyanin nok Tuhan,
miimung yanin nog jukup nok piktiduhan nok kopogawon solama-lama sok kotanan nong mga tow nok tumombaꞌ diyanin.
10 Na yanin og inuwakil nok Tuhan Kinotasan nog Gimam,
mamaꞌ nok kopogimam ni Malkisedek.
Suboy Popagonon ta ok Kotombaꞌ ta niyu
11 Modakol pa bosiya ok taluon ku pasal sok kopogimam kini,
sugaid mologon potampalon poꞌ migbongol-bongol amu na.
12 Miobon amu na bosiya moimung nog guru song mga kodumahan niyu,
sugaid sampoy ningkomun sumboy amu pa tonduan pasal sok ponognaan nok pononduꞌ sok Parman nok Tuhan.
Mamaꞌ amu nog bataꞌ mikaan nog diꞌ mokokan nong mokotogas,
sumboy na hadja og gatas.
13 Poꞌ ok sosuku nong mitubuꞌ sog gatas mamaꞌ nog bataꞌ popula nog ondaꞌ pokokosun sok kologdongan.
14 Tibuwa ong mokotogas nok pongonganon para song mga mogulang nok tow nong mikokosun mokposolen song mobais bug molaton.