Ok Pongaddatan nok Kosuatan ok Tuhan
13
Podayun niyu ok poglinasahoy song mga koilugan niyu sok kotombaꞌ.
2 Hurmat niyu mahatul ong mga dayu nong mongumbaloy diyon diniyu.
Poꞌ ongon og duma nong mikoinang nong mamaꞌ nini,
bu daꞌ nilon kosunoy nong malaikat ma saan ok tinolagad nilon.a
3 Kololat amu song mga pinirisu kituꞌ nong mamaꞌ nog amu sooy mipirisu.
Kololat amu da sop song mga tow nok pigbinsanaꞌ nong mamaꞌ nong mibatik niyu da sop sog lawas niyu.
4 Halgaoy niyu tokodoy ok kopoglaki-bini,
bu ondiꞌ niyu sammalon biyan sok pogjina bug pogbais-bais,
poꞌ hukumon nok Tuhan ong mamaꞌ niyon nok tow.
5 Hallioy niyu da sop ok konapsu sog gartaꞌ,
sugaid poksarang-sukul amu sog olo-olo og diyon diniyu.b
Poꞌ miktaluꞌ ok Tuhan,
“Ondiꞌ u dodaꞌ amu bagakon,
ondiꞌ u tokodoy amu potiyangan.”c
6 Dadi ita mga moktotombaꞌ,
moktowakkal ita na moktaluꞌ,
“Ok Tuhan ong moktotabang dinakon.
Daꞌdun na ok kondokan ku,
poꞌ olo buwan ong moinang nong manusiyaꞌ dinakon?”d
7 Pondom niyu ong mga miglokounutan diniyu nong miktintuluꞌ nok taluꞌ nok Tuhan.
Pikil niyu da sop ok kobais nok kotubuꞌ-tubuꞌ bu kopatoy nilon,
bu dogilingan niyu ok kopongandol nilon.
8 Poꞌ si Isa Al-Masih,
yanin da ok tagnaꞌ,
bu ningkomun,
bu solama-lama.
Ondaꞌ da yanin kopinda.e
9 Naꞌ amu tokodoy moyit song miglologinis nong mga pononduꞌ nong mokosuwoy diniyu sok kosobonnalan.f
Poꞌ ok kolasa-kololat nok Tuhan dinita,
yonin na ong mokpopagon nok pongatoyan ta,
kanaꞌ ong mga suguan pasal sok kan nog halal atawa haram.
Poꞌ ok kan kanaꞌ mokopogawon sog bisan sima nong migunut song mga suguan koyon.
10 Mongandol ita nong miglillaꞌ si Isa Al-Masih nog ginawa nin moimung kurban para dinita bagun mopapas ong mga dusa ta.
Tibuwa ong mga salu bangsa ta nog ondiꞌ pa tumombaꞌ diyanin,
mogdayun pa ilon mokkurban nong mga potubuon mounut sok saraꞌ song mikuna pigjanjian kituꞌ.
Saan na ondiꞌ ilon mokohampit sog barakat nok pogampun nog bogoyon dinita biyan sok kopatoy nog Al-Masih.
11 Na sog Dan Pigjanjian kituꞌ,
inoyit nong mga kinotasan nog gimam og duguꞌ nong mga potubuon dituꞌ sog Bilik Mahasutsi gantaꞌ kurban song mga dusa.
Sugaid og lawas nong mga pikkurban kituꞌ,
tinutung dituꞌ sog luwasan nok kowman.g
12 Saan na si Isa sooy mibinsanaꞌ bangka patoy sog luwasan nok siyudad bagun biyan sog duguꞌ in mosutsi nin og dusa nong mga tow.h
13 Dadi mangoy ita dituꞌ diyanin sog luwasan nok siyudad,
bu unungan ta yanin sok kosipoganin.
14 Poꞌ kanaꞌ kini ok tantu bonuwa ta,
sugaid migdodama ita nog ongon ok pidinsamaꞌ nok Tuhan dinita nok pogonongan dituꞌ sok surgaꞌ lomaꞌ-dinglag.
15 Dadi pudjihon ta lolayun ok Tuhan biyan ni Isa,
mamaꞌ sopantun nok kurban nog bogoyon ta diyanin.i
Koyon og bunga babaꞌ ta nong mangkon song ngalanin.
16 Na ondiꞌ niyu kolingowan monginang nok kobaisan bu mogbogoy song mga duma tow nok kilogonan,
poꞌ kosuatan tokodoy ok Tuhan nok sodokka koyon.j
17 Unutoy niyu ong mga tow moglokounutan diniyu bu tombaan niyu ok tinaluꞌ nilon.
Poꞌ ilon koyon ong mogipat song nyawa niyu,
bu ilon ok sakan dituꞌ sog hadarat nok Tuhan.
Dadi bilaꞌ tumombaꞌ amu nok tintuluan nilon,
mogloliyag ilon,
sugaid bilaꞌ ondiꞌ,
kologonan ilon,
bu ondiꞌ da sop kini mokobogoy nok kobaisan diyon diniyu.
18 Mga koilugan nami,
pongoni-ngonihoy niyu ami poꞌ bisan ondaꞌ nami kosayuhoy nog ongon ginang nami nok kotuntutan ami dun,
kolegan nami nok pogaddatan ok Tuhan biyan sog lam nog ginang nami.
19 Pongonihon ku tokodoy diniyu nok pongoni-ngonihan niyu da sop akon,
bagun mokopuliꞌ u da diyon diniyu nong mosompun.
Pongoni-ngoni bu Pomilin-milin
20 Na ok Tuhan ong mogbobogoy nok kosannangan,
yanin ong mikpotubuꞌ puliꞌ sok Panghuꞌ ta Isa Al-Masih,
ong Mokowasa nong Mogogipat dinita,
poꞌ mamaꞌ ita sopantun nong mga bilibili nin.
Poꞌ biyan sog duguꞌ in miongon na solama-lama og Bogu Pigjanjian nok Tuhan bug mga piktowanin.
21 Bung mayan bogoyon diniyu nok Tuhan og olo-olo nong mobais bagun moinang niyu ok koleganin.
Bu bung mayan inangonin dinita niyu ong mokososuat diyanin biyan ni Isa Al-Masih.
Patut yanin potason solama-lama.
Amin.
22 Dadi pongonihon ku tokodoy diniyu mga koilugan ku,
nog ungodon niyu sok pongatoyan ok tintuluꞌ u sok sulat kini nok kanaꞌ da tantu moyabaꞌ.
23 Na melegu da sop mokposun diniyu nok piluwas na sok pirisuhan og gilug ta nok si Timutik.
Bilaꞌ mokangoy yanin dini nong mosompun,
podunuton ku yanin pogangoyu diyon diniyu.
24 Dadi posampoy niyu ok salam-duwaa u song mga kounutan niyu bug mga sukuꞌ nok Tuhan diyon.
Ong mga koilugan niyu sog Italya mikposampoy da sop diniyu nong mga salam-duwaa nilon.
25 Bung mayan diyon diniyu ok kolasa-kololat nok Tuhan.
Amin.
Wassalam