Mibogu na ok Tobiat nong mga Moktotombaꞌ ni Isa Al-Masih
4
Mikokosun ita nong mibinsanaꞌ bu minatoy si Isa Al-Masih sog waktu nog dini pa yanin sog dunya.
Dadi pagga mibinsanaꞌ da sop ita dunut diyanin,
sumboy tamingan ta song niyat kini nok sima-sima ong mibinsanaꞌ,
lumotaꞌ na monginang nog dusa.
2 Saan na diꞌ niyu na sumboy unuton nok konapsuhan sok kolaatan,
sugaid pokpotattap amu sok kolegan nok Tuhan sog bon niyu totubuꞌ.
3 Para na nok piggastahan niyu og waktu niyu tagnaꞌ mamaꞌ nong mga tow nog diꞌ tumombaꞌ.
Mikpoduhul amu mogjina,
moglangu-langu,
mongnapsu,
moglumpuk-lumpuk moginum bu monginang nong mokutaꞌ-utaꞌ,
bu moksumba song mga tuhan-tuhan nog hinaram nok Tuhan.
4 Sugaid ningkomun misobuꞌ ong mga tow koyon nog daꞌ amu na ampuꞌ sog ginang nilon nong mokosipog bu monglaat kituꞌ.
Saan na mogunda-unda ilon.
5 Tibuwa pasal song mga ginang nilon,
loma-dinglag sumboy ilon madap sok Tuhan,
ong miktogama humukum sok pinginang nok tow nok totubuꞌ bu minatoy.
6 Saan na pisampoy da sop ong Mobais nok Suksugan pasal sog Al-Masih song mga minatoy na.
Pisampoy koyon dinilon bagun bisan minanam nilon na ok kopatoy nong mosugat sog lam nong manusiyaꞌ pasal sog dusa,
motubuꞌ da ong nyawa nilon solama-lama dunut nok Tuhan.
Gamiton niyu ok Kopandoyan nog Binogoy diniyu nok Tuhan
7 Diꞌ na mobon og gondow binayaꞌ.
Saan na diꞌ amu moktulug-tulug sok kotombaꞌ niyu,
bu pogbayaan niyu og ginawa-baran niyu bagun daꞌdun na ong mokobolabag sok pongoni-ngoni niyu.
8 Labi-labi na,
sumboy kolasahan niyu tokodoy og duma niyu,
pasal ok kolasa mokodungmaꞌ nong modakol nog dusa.
9 Tolimaꞌ niyu nog ikhlas ong mga tow nong mongumbaloy diniyu nog daꞌdun ok pogdomuk-domuk.
10 Na monolokotow diniyu binogoyan nok Tuhan nok kopandoyan.
Dadi mamaꞌ nok sosuguon nok kopongandolan,
gamiton ta niyu ponabang para sog duma ta niyu.
Poꞌ ita niyu kini kiwakilan mokposampoy pasal sog labi-labi nok kolasa bug kololat nok Tuhan.
11 Bilaꞌ binogoyan amu nok kopandoyan mokposampoy,
sumboy posampoy niyu mounut sok Parman nok Tuhan.
Bu ok sosuku nog binogoyan nog barakat tumabang,
na sumboy tumabang yanin pahatul sok pagas nog binogoy nok Tuhan diyanin.
Inangon niyu kini bagun potason nong mga tow ok Tuhan biyan ni Isa Al-Masih.
Yanin ong mokowasa bu patut yanin potason solama-lama.
Amin.
Mobinsanaꞌ ong mga Moktotombaꞌ sog Al-Masih
12 Mga kolasahan,
kanaꞌ amu mosobuꞌ nok kodatongan amu nog landuꞌ nok kobinsanaan.
Na kanaꞌ koyon mokosobuꞌ poꞌ yonin koyon ok ponuloy nok Tuhan diniyu.
13 Tibuwa pogloliyag amu nok kobahagian amu sok kobinsanaan ni Isa Al-Masih.
Dadi moglanduꞌ og loliyag bug kolasig niyu bilaꞌ mopotongow niyu na ok kowasa bug kotasin sok pokpuliꞌ in dini sog dunya.
14 Bilaꞌ ponaluꞌ-naluan amu pasal sok pogunut niyu ni Isa Al-Masih,
mobarakat amu,
poꞌ mikposabut koyon nog diyon diniyu ong Mokowasa nog Ruh nok Tuhan.
15 Bilaꞌ binsanaon amu,
sumboy kanaꞌ pasal song mikopatoy amu nok tow,
atawa minakow,
minginang nong molaat,
atawa mingampuan sok kotubuꞌ nog duma niyu.
16 Sugaid bilaꞌ binsanaon amu pasal sok pogunut niyu sog Al-Masih,
diꞌ amu sumboy mosipog,
tibuwa moksukul amu sok Tuhan poꞌ koingalanan amu mga mogogunut ni Isa Al-Masih.
17 Poꞌ diꞌ na mobon matong da ok poghukum nok Tuhan,
bu moktagnaꞌ kini song mga sukuꞌ in.
Bu bilaꞌ moktagnaꞌ dinita,
olo na bayuꞌ ok posunguan nong mga dinumugtul song Mobais nok Suksugan nok Tuhan pasal sog Al-Masih?
18 Mamaꞌ nok tinaluꞌ sok Kitab,
“Bilaꞌ ong mga tow mologdong kologonan tanan moawon,
ponoy na bayuꞌ in ong mga baldusa bug mga ondaꞌ pogunut sok Tuhan?”
19 Dadi sima-sima diniyu ong mobinsanaꞌ pasal yonin na og bayaꞌ nok Tuhan,
podayunon niyu moginang nok kobaisan.
Bu poglillaꞌ niyu ok kotubuꞌ niyu sok Tuhan nong mikpoongon diniyu,
poꞌ diꞌ in amu tokodoy potiyangan.