Ok Pituwa song Moglaki-bini
3
Amu mga kolibunan nong moktotombaꞌ,
sumboy mogunut amu sok kolegan nog laki niyu.
Dadi bilaꞌ ong mga kolakihan niyu ondaꞌ tombaꞌ sok Parman nok Tuhan,
moyit niyu ilon tumombaꞌ pobiyan song mobais nok tobiat niyu,
bisan ondiꞌ niyu na ilon tintuluan.
2 Poꞌ motongow nilon da bug ponoy kosutsi nok kotubuꞌ niyu bug gondok niyu sok Tuhan.
3 Og lingkat niyu sumboy kanaꞌ tidu song mga pomakoyan,
sog landuꞌ pokpolingkat nog buk,
kanaꞌ da sop song mga bulawan,
atawa song mga ponapoton nong mokohalgaꞌ.
4 Sugaid ong motud nog lingkat,
yonin na ong motonaꞌ bu molunuk nok pongatoyan nog diꞌ mogboluba.
Yonin na koyon og landuꞌ kohalgaꞌ sok ponontong nok Tuhan.
5 Maꞌ niyon og lingkat nong mga kolibunan sukuꞌ nok Tuhan song masa tagnaꞌ kituꞌ.
Mingandol ilon sok Tuhan,
bu mokpobabaꞌ ilon sog laki nilon.
6 Mamaꞌ na ni Sarah nok tinumombaꞌ sok tinaluꞌ nog laki nin nok si Nabi Ibrahim,
bu tinawagin og laki nin nok kounutan.
Dadi amu mga kolibunan sok timpu ningkomun kini,
mamaꞌ amu ni Sarah bilaꞌ mokpohatul amu,
bu ondiꞌ amu mondok sog bisan olo.
7 Na pasal sop diniyu mga kolakihan,
sumboy mobais ok pogoyit niyu sog libun niyu,
poꞌ ok pagas nilon kanaꞌ mokobatuk dinita.
Pogaddatoy niyu ilon,
poꞌ binogoyan ilon da sop nok Tuhan nok kotubuꞌ solama-lama mamaꞌ dinita.
Inang niyu kini,
bagun daꞌdun ong mokobolabag sok pongoni-ngoni niyu.
Pituwa sok Kotanan nong mga Moktotombaꞌ
8 Na ongon pa ok taluon ku diniyu kotanan.
Sumboy moksolobuk ok pikilan niyu bu sumboy sabuton niyu ok porossahan nong mga kodumahan niyu.
Poglinasahoy bu poglinolatoy amu dunut pokpobabaꞌ nok pongatoyan.
9 Ondiꞌ niyu sulian nong molaat ok tow nong mikinang diniyu nong molaat,
bu diꞌ niyu sop sulian ponaluꞌ-naluan ong mga tow nong monaluꞌ-naluꞌ diniyu.
Sugaid tumbasan niyu ilon biyan sok pongoni-ngoni niyu dinilon nog barakat,
pasal yonin koyon ok kolegan nok Tuhan diniyu bagun bogoyanin da sop amu nog barakat.
10 Poꞌ maꞌ nini ok tinaluꞌ sog diyalom nok Kitab,
“Sima-sima ong meleg nong mokololiyag nok kotubuꞌ bu mobais nok kobotang-botang,
sumboy hallianin moktaluꞌ nong molaton,
bu diꞌ sop yanin mogloput.
11 Sumboy bolongonin ong molaton,
bu inangonin ok kobaisan.
Sumboy poktuyuanin lolayun ok kopoksulut-sulut.
12 Poꞌ mogbantoy da ok Tuhan nok sosuku monginang nong mologdong,
bu monginongog yanin song mga pongoni-ngoni nilon.
Sugaid tumolikud ok Tuhan song mga tow nong monginang nong molaat.”a
13 Bilaꞌ mogloliyag amu monginang nong mobais,
daꞌdun ok tow nong mokomula diniyu.
14 Sugaid bisan mobinsanaꞌ amu sog waktu nong moginang amu nok kologdongan,
barakatan amu da.
Diꞌ amu mondok bu mosusa bisan olo-olo na molaton ok poksad atawa inangon nong mga tow diniyu.b
15 Sugaid pogaddatoy niyu lolayun si Isa Al-Masih poꞌ yanin ok Panghuꞌ niyu.
Bu pokpodinsamaꞌ amu lolayun tumabal bisan sima ong moksak diniyu pasal sok kopongandol bu pogdodama niyu diyanin.
16 Tibuwa tabal niyu ilon song molunuk nok pongatoyan dunut pogaddat.
Bilaꞌ molonuꞌ ok pongatoyan niyu,
kosipogan da ong mga tow nong momabaꞌ-babaꞌ bu mominasa diniyu,
poꞌ motongow nilon ong mobais nok tobiat niyu pasal sok pogunut niyu ni Isa Al-Masih.
17 Bilaꞌ kolegan nok Tuhan nong mobinsanaꞌ amu,
golom pa mobinsanaꞌ amu pasal sog ginang niyu nong mobais,
gabaꞌ song moksandal amu nok kobinsanaan sog ginang molaat.
18 Poꞌ si Isa Al-Masih nog daꞌdun og dusa nin mibinsanaꞌ tokodoy para dinita mga baldusa bagun moampun ong mga dusa ta.
Matoy og ginawa nin insan bagun mooyitin ita posunguꞌ sok Tuhan,
sugaid pitubuꞌ da yanin puliꞌ biyan sog Ruh nok Tuhan.
19-20 Bu biyan sog Ruh nok Tuhan minangoy da sop si Isa mokposampoy song mga minatoy na nong mipirisu ong mga nyawa nilon.
Yonin na ong mga dinumugtul sok Tuhan song masa ni Nabi Nuh.
Tagnaꞌ kituꞌ miksabar mogbagad ok Tuhan nok tumombaꞌ ilon diyanin soliyan inimung ni Nabi Nuh og gadjung.
Tibuwa walu kotow da ok tinumombaꞌ bu mikosolod sog gadjung.
Miglantung-lantung og gadjung nilon,
bu inawon ilon pobiyan sog gadjung bug tubig kituꞌ.
21 Ok tubig kituꞌ pobatukon sok kopogliguꞌ dinita,
poꞌ miawon ita sok kosiksaan pasal sok kopongandol ta ni Isa Al-Masih.
Ok kopogliguꞌ kini,
ong maana nin kanaꞌ ok pogugas nong mokoliksok sog lawas ta,
sugaid og gindanan nong mingoni ita na nok koampun bu molonuꞌ na ok pongatoyan ta.
Mikopoksulut ita na sok Tuhan,
poꞌ mitubuꞌ na puliꞌ si Isa Al-Masih.
22 Si Isa Al-Masih dituꞌ na sok surgaꞌ sog dapit lintu nok Tuhan.
Na og lam nong mga malaikat sok surgaꞌ sampoy na ong mga taga kowasa bug kopatut mikpobabaꞌ ilon diyanin.