2
Na mibogu na ok kotubuꞌ niyu,
saan na sumboy niyu bolongon ok kotanan nog ginang niyu nong molaat.
Naꞌ amu tokodoy monglimbung,
mogbaluꞌ-baluꞌ,
moima,
bu monaluꞌ nog ginis-ginisan nong mokolaton sog duma niyu.
2 Ilingoy niyu og bataꞌ popula nog gindowonin tokodoy og gatas nog ginaꞌ in.
Dadi amu sooy,
gindowon niyu ok Parman nok Tuhan bagun moksipagas ok kopongandol niyu toktob song mosurgaꞌ amu.
3 Poꞌ kinanaman niyu na bug andun ok kobais nok Panghuꞌ.
Mipononggiꞌ si Panghuꞌ Isa song Mohalgaꞌ nog Batu
4 Pokpolani amu lolayun sok Panghuꞌ Isa nong mamaꞌ sopantun nok totubuꞌ nog batu nong migoyit nok pagon nog baloy.
Ondaꞌ yanin bilangoy nong mga tow,
sugaid landuꞌ yanin kohalgaꞌ sok Tuhan nong mikpiliꞌ diyanin moimung nok pindogan nog Baloyin.
5 Dadi ningkomun ginamit amu nok Tuhan mamaꞌ sopantun nok totubuꞌ nog batu mokpotindog nog baloyin biyan ni Isa Al-Masih.
Bu pasal sok kotombaꞌ niyu diyanin mamaꞌ amu nong mga gimam nog inuwakilan moksarang-sukul bu mokpudji sok Tuhan nok kosuatan yanin dun.
6 Mamaꞌ na nok tinaluꞌ nok Tuhan sok Kitab bug ayin pinonggianin si Isa Al-Masih sog batu,
taluꞌ in,
“Poginongog amu!
Ongon dituꞌ sog Jerusalema og binotangu nog batu nong migoyit nok pagon nog baloy.
Og batu koyon piniliꞌ u bu landuꞌ kohalgaꞌ dinakon.
Sima-sima ong mongandol diyanin,
ondiꞌ na dodaꞌ kosipogan.”b
7 Dadi song mga tow nok tinumombaꞌ diyanin mamaꞌ diniyu,
mohalgaꞌ yanin tokodoy.
Sugaid ong mga tow nog daꞌ tombaꞌ,
tolikudan nilon yanin mamaꞌ nok sinulat sok Kitab,
“Og batu nog binolong nong mga pandoy,
og batu tokodoy kituꞌ ong migoyit nok pagon nog baloy.”c
8 Bu mamaꞌ da sop nok sinulat,
“Yanin kini og batu nong mokobuksak song mga tow nong mokosipaꞌ dun.”d
Na mobuksak ilon pasal dinugtul nilon ok pisampoy dinilon nok Tuhan.
Yonin kini ok pogbayaꞌ nok Tuhan para dinilon.
9 Sugaid amu koyon kanaꞌ mamaꞌ dinilon,
poꞌ piniliꞌ amu nok Tuhan Mahatinggi moimung nok koimaman sok pomarintahanin.
Amu ong mosutsi nok piktowanin nong moktolagad diyanin.
Sinakupin amu bagun mokoposampoy amu pasal sog landuꞌ kobais nog ininangin,
poꞌ inonggatin amu mawaꞌ tidu sok kodoloman bangka nin amu oyitoy sok sahaya nin.
10 Sok tagnaꞌ kituꞌ kanaꞌ amu pa piktowan nok Tuhan,
sugaid song ningkomun piktowanin na amu.
Tagnaꞌ ondaꞌ amu pa pokotabuk nog lolat nok Tuhan,
sugaid ningkomun mikotabuk amu na nok kololatin.e
11 Na ita niyu kini kanaꞌ mogbatu sog dunya,
mapit hadja.
Dadi mga kolasahan,
pongonihon ku tokodoy diniyu nog bagak niyu ok konapsuhan nong mokosaggaꞌ sok kotombaꞌ niyu bu mokopoglaat nong nyawa niyu.
12 Na sumboy mobais ok tobiat niyu song mga tow nog diꞌ tumombaꞌ ni Isa Al-Masih,
bagun bisan susunan amu nong mga tow nong miginang amu nong molaat,
motongow nilon nong mobais da og ginang niyu.
Dadi pokpuliꞌ ni Isa Al-Masih,
mokpotas ilon sok Tuhan pasal diniyu.
Pogaddat amu song mga Kounutan
13 Dadi pasal sok Panghuꞌ ta niyu Isa Al-Masih,
pogunut amu sok kotanan nok tow nok taga kopatut mogbayaꞌ,
mamaꞌ na nok sultan,
14 sampoy na song mga gubernur nog inuwakilanin.
Poꞌ ilon koyon taga kopatut sumiksaꞌ song mga tow moginang nong molaat,
bu ilon da sop koyon ong mogbantug song mga tow nong moginang nong mobais.
15 Dadi ok kolegan nok Tuhan nong monginang amu nok kobaisan,
bagun biyan dun polotaon niyu moktaluꞌ nok kodupangan ong mga tow nong moawam sok kosobonnalan.
16 Amu koyon piluhaya na nok Tuhan.
Tibuwa,
naꞌ niyu gamiton ok koluhayahan niyu monginang nok kolaatan.
Poktubuꞌ-tubuꞌ amu nong mamaꞌ nog gulipon nok Tuhan.
17 Pogaddat amu sok kotanan.
Kolasahoy niyu ok koilugan niyu sok kotombaꞌ diyon ni Isa Al-Masih.
Kondok amu sok Tuhan,
bu pogaddat amu sok sultan!
Ilingan ta si Panghuꞌ Isa
18 Dadi amu koyon mga gulipon,
tombaꞌ amu song mga gamu niyu pasal sog gondok niyu sok Tuhan,
kanaꞌ hadja song mga gamu nong mahatul,
sugaid bisan pa ong mga mobingis.
19 Poꞌ kosuatan diniyu ok Tuhan bilaꞌ tiggolan niyu ok kobinsanaan pasal sog leg niyu mogunut sok koleganin bisan daꞌdun og dusa niyu.
20 Bilaꞌ sabaran niyu ok kosiksaan pasal sog ginang niyu nong molaat,
patut taꞌ nok sanglitan amu dun?
Na,
kanaꞌ!
Sugaid bilaꞌ tiggolan niyu og binsanaꞌ bisan miginang amu nong mobais,
kosuatan diniyu ok Tuhan.
21 Mamaꞌ niyon ok kolegan nok Tuhan para diniyu mga sukuꞌ in,
poꞌ bininsanaꞌ og Al-Masih para sok kobaisan niyu.
Saan na dogilingan niyu da sop ok kotubuꞌ-tubuꞌ in.
22 Poꞌ tinaluꞌ sok Kitab,
“Daꞌdun og dusa nong miinangin,
bu ondaꞌ yanin sibon pokopogloput.”f
23 Bisan pinaluꞌ-naluan si Isa,
ondaꞌ da yanin tabal nong molaton.
Bininsanaꞌ yanin,
sugaid ondaꞌ da yanin poksad sumuliꞌ.
Pibayaꞌ-bayaꞌ in na sok Tuhan nong mologdong og hukumanin.
24 Mingaku si Isa Al-Masih sok kotanan nog dusa ta niyu sog waktu nog linansang yanin sok kayu bagun diꞌ ita na pogbayaan nog dusa,
sugaid motubuꞌ nong mologdong.
Miangol yanin pasal song mga dusa ta,
bu pasal sog gangolin,
kiulian ita.g
25 Sok tagnaꞌ kituꞌ mamaꞌ amu nog bilibili nong mibolongh,
sugaid mikpuliꞌ amu na ningkomun sog Al-Masih,
ong mogogipat diniyu bu ong mogbobantoy song mga nyawa niyu.