Og Ikosolobuk Sulat tidu ni
PETROS
1
Salam-duwaa diyon diniyu mga piniliꞌ nok Tuhan nong mikanat mamaꞌ nog dayow diyon song mga probinsiya nok Pontus,
Galatiya,
Kapadukiya,
Bataꞌ-bataꞌ Asiya bug Bitiniya.a
Akon kini si Petros,
ong mokpoposampoy ni Isa Al-Masih.
2 Dinsamaꞌ amu kiosunan bu piniliꞌ nok Tuhan,
og Gommaꞌ ta.
Bu sinutsi amu nog Ruh nin bagun amu mogunut ni Isa Al-Masih bu moampun ong mga dusa niyu biyan sog duguꞌ in nong mibuyus para diniyu sok kopatoyin.
Na bung mayan modiyon diniyu ong moglipuwas nok kosannangan bug kolasa-kololat nok Tuhan.
Ong Mobais nok Kodatongan ta
3 Dadi pudjihon ta niyu ok Tuhan nog yonin na og Gommaꞌ nok Panghuꞌ ta Isa Al-Masih.
Pasal sog landuꞌ kosolag nog lolat nok Tuhan dinita mamaꞌ ita nog binataꞌ mokpuliꞌ,
bu mibogu ok kotubuꞌ ta biyan sok pokpotubuꞌ in puliꞌ ni Isa Al-Masih.
Dadi miongon na og dodamahan ta nok kosurgaan.
4 Poꞌ pidinsamaan ita nok Tuhan dituꞌ sok surgaꞌ nok pusakaꞌ nong mosutsi,
diꞌ mobolong bu diꞌ mopinda solama-lama.
5 Na tamingan amu nok Tuhan nok kowasa nin biyan sok kopongandol niyu,
soliyan niyu mogbagad nog awononin amu sog binayaꞌ gondow.
6 Saan na mogloliyag amu tokodoy bisan mokonanam amu ningkomun nok kobinsanaan sog ginis-ginisan nok poksuloy poꞌ miyan da ong maꞌ niyon koyon.
7 Ong mga ginisan nok kobinsanaan koyon,
poksuloy tibuwa bagun motongow bilaꞌ ikhlas ok kopongandol niyu.
Poꞌ ok kopongandol labi pa mohalgaꞌ tidu sog bulawan.
Bu bisan og bulawan nog ongon pa ok toktobanin,
sumboy pobiyanon pa sog gapuy bagun ong motud dodaꞌ bulawan ong mosamaꞌ,
na ok pongandol niyu pa taꞌ?
Dadi bilaꞌ ikhlas ok kopongandol niyu,
sanglitan,
potason bug pogaddatan amu sog waktu nong mokpuliꞌ si Isa Al-Masih dini sog dunya.
8 Yanin da ok kolasahan niyu bisan ondaꞌ niyu pa kotongow,
bu yanin ok pongandolan niyu bisan ondiꞌ niyu yanin motongow sog waktu kini.
Na og loliyag niyu diꞌ motokkad
9 poꞌ soliyan niyu pa poktabukon ok kodoksuan nok kopongandol niyu diyon ni Isa Al-Masih nog yonin na ok kopogawon diniyu.
10 Ok kopogawon kini,
binogoy nok Tuhan diniyu biyan sok kolasa bug kololatin.
Na ong mga konabihan nong mikpodinsamaꞌ moktaluꞌ pasal sok kopogawon kini,
miktiksaꞌ ilon monglungkal pasal dun.
11 Piosunan na asal nog Ruh nog Al-Masihb ong mga konabihan kituꞌ nong mobinsanaꞌ og Al-Masih,
bu pogdoksuꞌ niyon potason yanin.
Saan na pingadjian tokodoy nilon bug andun kounut ok pidinsamaꞌ nilon tumaluꞌ,
bug ponoy da sop og hantangin.
12 Piosunan da sop nok Tuhan ong mga konabihan kituꞌ nok kanaꞌ mounut song masa nilon ok pidinsamaꞌ nilon tumaluꞌ kituꞌ,
sugaid mounut sog waktu ta niyu ningkomun.
Bu ningkomun miposampoy na ong Mobais nok Suksugan kini diniyu tidu song mga mognasihat diniyu biyan sok kowasa nog Ruh Mahasutsi nok piponog tidu sok surgaꞌ.
Na bisan ong mga malaikat meleg kosunan ong Mobais nok Suksugan kini nok pisampoy diniyu.
Ok Kotubuꞌ-tubuꞌ nong Mologdong
13 Dadi pokpodinsamaꞌ amu moginang nok kolegan nok Tuhan,
diꞌ amu moktulug-tulug sok kotombaꞌ niyu,
bu sandalan niyu ong napsu.
Popagas niyu ok pogdodama bug kopongandol niyu sok kolasa bug kololat nog bogoyon diniyu nok Tuhan sog waktu nong mokpuliꞌ si Isa Al-Masih dini sog dunya.
14 Dadi amu mga gumbataꞌ nok Tuhan,
unutoy niyu yanin!
Kanaꞌ amu na mokpuliꞌ sok kotubuꞌ niyu kituꞌ tagnaꞌ nong mokpoduhul amu nok konapsuhan niyu sog daꞌ amu pa pokokilala sok Tuhan.
15 Na ok Tuhan nong migonggat diniyu,
mosutsi.
Saan tolop da sop nong mosutsi amu sog lam nog inangon niyu.
16 Poꞌ misulat sog diyalom nok Kitab,
taluꞌ in,
“Sumboy mosutsi amu,
poꞌ akon kini mosutsi.”c
17 Daꞌdun ok pilabi nok Tuhan,
bu yanin ong monghukum sok sosuku nong manusiyaꞌ mounut song mga miinang nilon.
Dadi pagga sinabbut niyu yanin nog Gommaꞌ sok pongoni-ngoni niyu,
pogaddatoy niyu yanin dunut gondok sog bon niyu dini sog dunya.
18 Kipusakaan amu nong mga gaddat nog daꞌdun guna nin tidu sok pingapuꞌ niyu.d
Bu mikokosun amu nok kanaꞌ ok sin atawa bulawan nog ongon da ok toktobanin ong mokobayad bagun moglokat diniyu sok kotubuꞌ-tubuꞌ kini.
19 Sugaid og gantiꞌ nok piglokat diniyu,
yonin na og duguꞌ ni Isa Al-Masih nog landuꞌ kohalgaꞌ.
Mamaꞌ yanin nog bilibilie nog daꞌdun ok sallaꞌ in nok kinurban para diniyu.
20 Sog daꞌ pa koongon og dunya pidinsamaꞌ na nok Tuhan nok si Isa Al-Masih og bayad nog dusa ta.
Sugaid ningkomun kini,
pitongow na nok Tuhan og Al-Masih diniyu.
21 Pasal sog ininang ni Isa Al-Masih,
mingandol amu na sok Tuhan nong mikpotubuꞌ puliꞌ diyanin bu mikpotas diyanin.
Saan na ok pingandolan bu pigdodamahan niyu,
yonin na ok Tuhan.
22 Dangan migunut amu sok kosobonnalan,
misutsi amu na,
bu kiongonan amu na nok kasi-lasa song mga koilugan niyu sok kotombaꞌ.
Dadi poglinasahoy amu nog ikhlas sok pongatoyan niyu.
23 Poꞌ mamaꞌ amu nog binataꞌ mokpuliꞌ,
sugaid ok pogbataꞌ diniyu kanaꞌ tidu song manusiyaꞌ nok taga kopatoy.
Og bogu kotubuꞌ niyu tidu sok Parman nok Tuhan nong mokobogoy nok kotubuꞌ solama-lama.
24 Misulat sog diyalom Kitab Sutsi,
taluꞌ in,
“Og lam nong manusiyaꞌ
mamaꞌ nok sigbot nong modaliꞌ molawos,
bu ok kolingkat nilon mobolong
mamaꞌ nog bulak-bulak nong modogdag.
25 Sugaid ok Parman nok Tuhan ondiꞌ mopinda solama-lama.f”
Na ok Parman kini,
yonin na ong Mobais nok Suksugan pasal ni Isa Al-Masih nok pisampoy diniyu.