Ok Pokposun
pasal sog Ikosolobuk Sulat tidu ni Yahiya
Mga koilugan,
Salam diniyu kotanan.
Yonin kini ong mopolok nok pokposun pasal sog ikosolobuk sulat ni Yahiya nok posunguꞌ niyu na bastahon. Si Yahiya kini solobuk yanin sok sopuluꞌ bu duwaꞌ mulid nok piniliꞌ ni Isa Al-Masih mogogunut diyanin bu mokpoposampoy.
Dadi mikosaksiꞌ si Yahiya sog lam nok taluꞌ bug ginang ni Isa Al-Masih tidu sog waktu nong miktagnaꞌ si Isa mognasihat. Mikpomotud si Yahiya nong minatoy si Isa bu mitubuꞌ yanin puliꞌ, bu mikosaksiꞌ da sop yanin dangan minuliꞌ si Isa sok surgaꞌ. Mokobasta ita niyu nok suksugan nok sinulat ni Yahiya pasal dun sog bahagiꞌ nok Kitab Injil nok tinawag nog Yahiya.
Na ok sulat ni Yahiya kini, pinoyitin song mga moktotombaꞌ ni Isa Al-Masih bagun polasigonin ok kotombaꞌ nilon. Pipondomin dinilon nog diꞌ ilon potiyangan nok Tuhan bisan olo ok koposunguan nilon. Tinaluanin ong mga moktotombaꞌ nok sumboy diꞌ ilon mogunut song mga baluꞌ-baluꞌ nog guru nong mikpinda nok kosobonnalan, poꞌ miktonduꞌ ilon nok si Isa kanaꞌ og Al-Masih nok piniliꞌ nok Tuhan, bu miktonduꞌ da sop ilon nok kanaꞌ yanin og Bataꞌ nok Tuhan. Tinonduꞌ da sop nong mga baluꞌ-baluꞌ nog guru song mga mogogunut ni Isa Al-Masih nog diꞌ nilon sumboy lotaan monginang nong mga dusa. Sugaid ok pononduꞌ nilon kini ondaꞌ poksugat. Dadi mikpomotud si Yahiya nok si Isa og Al-Masih nok piniliꞌ nok Tuhan, bu og Bataꞌ nok Tuhan nong miimung manusiyaꞌ. Tinintuluan da sop ni Yahiya ong mga moktotombaꞌ ni Isa Al-Masih nok sumboy ilon lumotaꞌ sog ginang nilon nok kolaatan, poꞌ miimung na ilon nog gumbataꞌ nok Tuhan. Dadi diyon na ilon sok kodolagan poꞌ ok Tuhan ok sahaya. Saan na pipondomin dinilon nog akuhon nilon ong mga dusa nilon bangka pongoni nok koampunan. Tinaluꞌ in nok polabihon nilon ok poglasa sok Tuhan sampoy sok pokasi nilon manusiyaꞌ.
Inimung ok sulat kini dangan miniyan mga 60 tahun tidu sok kotubuꞌ puliꞌ ni Isa Al-Masih bangka uliꞌ sok surgaꞌ.
Bung mayan tonduan ita niyu nok Tuhan sok pogbasta ta kini, bu potontulonin ita niyu sog dalan nok posunguꞌ sok surgaꞌ.
Wassalam
Og Ikosolobuk Sulat tidu ni
YAHIYA