Ok Pokpuliꞌ ni Panghuꞌ Isa dini sog Dunya
3
Mga koilugan ku kolasahan,
yonin kini og ikoduwaꞌ nok sulat nok pinoyitu diniyu.
Song mikuna u sulat bu ikoduwaꞌ kini batuk-batuk da ok poktuyuꞌ u diniyu.
Pogmuhut-muhutan ku nok polasigon amu bu ikhlas pa ok pomikil niyu biyan sok pokpopondom diniyu nong mga motud nok pononduꞌ.
2 Og legu nok kosunan niyu ok Parman nok Tuhan nok tidu song mga sutsi nok konabihanin bug mga suguan ni Isa Al-Masih nok pisampoy diniyu nong mga kiwakilanin mokposampoy.
Yanin ok Panghuꞌ bug Mogogawon dinita.
3 Labi-labi sumboy kosunan niyu sog waktu kini nok posunguꞌ na ok kodoksuan nog dunya,
ongon tumuwaꞌ nong mga tow nong mopagas mogunda-unda.
Mokpoduhul ilon song napsu nilon.
4 Moktaluꞌ ilon,
“Kanaꞌ taꞌ jinumanjiꞌ si Isa Al-Masih nong mokpuliꞌ yanin dini?
Ayin na ma yanin?
Mikpomatoy na tanan ong mga mokogulangan ta,
sugaid yonin da og bayuꞌ-bayuꞌ nog dunya tidu sok koimung nini!”
5 Ong mga moktaluꞌ nong mamaꞌ niyon migbuta-bongol ilon sok kosobonnalan nog lam nong mikobiyan.
Tagnaꞌ inimung nok Tuhan og langit bug lupaꞌ biyan sok Parmanin.
Og lupaꞌ tinumuwaꞌ tidu sok tubig,
bu inimung biyan da sop sok tubig.
6 Bu pobiyan da sop sok tubig,
pilunupan nok Tuhan bu inugasananin og dunya tagnaꞌ toktob miglaat na.
7 Pobiyan da sop sok Parman nok Tuhan,
ginantaꞌ nok tutungon og langit bug lupaꞌ kini bilaꞌ matong na og Gondow Poghukum.
Sog gondow koyon narkaon ong mga diꞌ molituhanoy.
8 Sugaid mga kolasahan ku,
diꞌ niyu kolingowan nok kanaꞌ batuk mogitung ok Tuhan bug manusiyaꞌ.
Ok sondow nok Tuhan mamaꞌ na nok songibu tahun dini,
bu ok songibu tahun mamaꞌ na nok sondow hadja para diyanin.
9 Kanaꞌ motud ok taluꞌ nog duma nong miglata-lata ok Panghuꞌ sog janjiꞌ in mokpuliꞌ dini sog dunya,
sugaid mosabar yanin diniyu.
Poꞌ diꞌ yanin meleg nog ongon ok siksaon song narkaꞌ,
sugaid ok koleganin nok kotanan moktowbat bangka koawon.
10 Sugaid og gondow pokpuliꞌ nok Panghuꞌ,
mamaꞌ sopantun nok polonakow nog diꞌ kosunan bug olo waktuhoy dun matong.
Sog gondow koyon motokkow kobolong og langit dunut lugung,
ok kotanan nog diyon sog langit kanon nog gapuy,
bu og lupaꞌ dunut kotanan nog gungodin,
moampud.
11 Na pagga kiosunan ta na nok papason na kotanan,
olo bayuꞌ ong mobais ta inangon?
Sumboy mosutsi bu molituhanoy ok kotubuꞌ ta niyu
12 soliyan ta bagadan bu moginang bagun modaliꞌ ok pokpuliꞌ ni Isa Al-Masih sog gondow nog ginantaꞌ nok Tuhan.
Sog gondow koyon tutungon bu papason og langit,
bu motipot kotunag ok kotanan kobalan nok koinit.
13 Sugaid mogbagad ita sog jinanjiꞌ nok Tuhan,
yonin na og bogu nok kolangitan bug bogu lupaꞌ nok pogbayaan mounut sok kologdongan.
14 Dadi mga kolasahan,
soliyan amu mogbagad nong matong og gondow koyon,
pogmuhut-muhutoy niyu tokodoy nong motubuꞌ amu nong mosutsi bu mosannang,
bagun daꞌdun ok susunan diniyu nok Tuhan.
15 Pondomon ta nong mosabar ok Tuhan dinita bagun kobogoyan ong mga manusiyaꞌ nog waktu moawon.
Miksulat ok kolasahan nog gilug ta nok si Pol diniyu pasal nini mounut sok kokosun nog binogoy diyanin nok Tuhan.
16 Linabitin da sop ok pasal nini sog lam nog duma sulatin kituꞌ.
Og duma diyon mologon sabuton,
dadi ong mga miawam sok kosobonnalan bu mga moguyaꞌ sok kotombaꞌ,
polikoon nilon ong maana ni Pol.
Bu yonin da sop ok pinginang nilon sog duma bahagiꞌ nok Kitab.
Na yonin na ong mogoyit dinilon sok kosiksaan solama-lama.
Pomilin-milin
17 Na mga kolasahan ku,
pidinsamaan amu na asal pasal nini.
Saan na poghalliꞌ amu bagun diꞌ amu moyit song molikoꞌ nok pononduꞌ nong mga molaat nok tow bangka suwoy sok kosobonnalan.
18 Podalom niyu ok kokosun bug kopongandol niyu sok kolasa bug kololat nok Panghuꞌ bug Mogogawon ta niyu,
Isa Al-Masih.
Patut yanin potason ningkomun bu sampoy solama-lama.
Amin.
Wassalam