Mga Mikpobaluꞌ-baluꞌ nog Guru
2
Tagnaꞌ kituꞌ ongon ong mga tow nong mikpobaluꞌ-baluꞌ nabi.
Ningkomun ongon da sop tumuwaꞌ nog baluꞌ-baluꞌ nog guru.
Mokposampoy ilon diniyu,
mga moktotombaꞌ,
biyan song mobuni nok koponintuluꞌ nilon nong mga loput nong mokopoglaat sok kotombaꞌ.
Tolikudan nilon da sop ong mokowasa nok Panghuꞌ nog yanin na ong miglokat dinilon,
saan tokkow kodatongan ilon nok kosiksaan.
2 Bisan pa mamaꞌ nini,
modakol da ong mogunut song mokosipog-sipog nog ginang nilon.
Dadi pagga mogbaluꞌ-baluꞌ ilon mogunut sog Al-Masih,
pogunda-undahon nong mga tow ok pononduꞌ pasal diyanin nog yonin na ong motud nog dalan posunguꞌ sok Tuhan.
3 Pasal sok konapsuhan nong mga mogbaluꞌ-baluꞌ nog guru kini sog gartaꞌ,
dupangon nilon amu biyan song mga pingimung-imung nilon nok taluꞌ bagun mokosin ilon diniyu.
Ondaꞌ nilon kosunoy nong miobon ilon na sinimpanan nok siksaꞌ,
bu migbagad na dinilon ok konarkaan.
4 Ondaꞌ tanan kololatoy nok Tuhan ong mga malaikat nong migdusa.
Linabuꞌ in ilon sog luwang nog diꞌ motokkad,
bu kinodinahanin ilon sok kodoloman dituꞌ sampoy hukumon ilon.
5 Ondaꞌ da sop kololatoy nok Tuhan og dunya song masa tagnaꞌ dangan pilunupanin ong mga kanaꞌ molituhanoy.
Si Nabi Nuh dona ong mokpoposampoy nok kologdongan,
bug pitu kotow salu baloyin ong misamaꞌ.
6 Siniksaꞌ sop nok Tuhan ong mga siyudad nok Sodom bu Gomora biyan sok poktutung nini sampoy miampud.
Bu inimungin nok pomintangan song mga tow pasal sog olo ong mosugat song mga baldusa nog diꞌ meleg moktowbat.
7-8 Tibuwa song masa nituꞌ tinabang nok Tuhan si Lot.
Gondow-gondow motongow bu modongog ni Lot ong mga mokoutaꞌ-utaꞌ nog ginang nong mga tow sok salu bonuwa nin kituꞌ.
Mologdong nok tow si Lot,
dadi misusa bu misasow tokodoy yanin song mga pogdugtul nilon nong mga saraꞌ.
9 Dadi motampal nong mokosun ok Tuhan tumabang sok poksuloy nong mga boloammal.
Sugaid ong mga tow nong mokolaat,
siksaonin sog Gondow nok Poghukum,
10 labi na ong mga tow nog inunutan ong napsu nilon nong mokosipog-sipog bu momabaꞌ-mabaꞌ sok pogbayaꞌ nok Tuhan.
Ong mga tow kini motowakkal bu mokpotas-tas,
bu daꞌdun og gondok nilon ponaluꞌ-naluan nong molaat ong mga malaikat nok Tuhan.
11 Bisan ong mga malaikat nong mokowasa pa tidu dinilon,
ondaꞌ tanan ponaluꞌ nong molaat pasal dinilon sog gadapan nok Tuhan.
12 Tibuwa mga baluꞌ-baluꞌ nog guru kini ponaluꞌ-naluan nilon nong molaat ong mga olo-olo nituꞌ nog daꞌdun kosun-sunan nilon dun.
Na ok posunguan nilon ok komulahan.
Mamaꞌ ilon nong mga binatang nog daꞌdun ok pikilanin,
nok kodoksuanin saggowon bangka patoyoy.
13 Saan na dait nok siksaon ong mga tow kini pasal sok pogbinsanaꞌ nilon sog len nok tow.
Kosuatan ilon mokpoduhul nok konapsuhan nilon bisan motas og gondow.
Mogoyit ilon nok kosipogan diyon diniyu bilaꞌ dumongan ilon kuman sok poglumpuk-lumpuk niyu,
bu migloliyag ilon moglimbung diniyu.
14 Bilaꞌ tumontong ilon song mga kolibunan mokpikil ilon nong minam.
Ondaꞌ ilon koduhuloy monginang nog dusa,
bu inoyit nilon pa tokodoy mokodusa ong mga moguyaꞌ sok kotombaꞌ.
Mopandoy ilon mongalap nog olo-olo kolegan nong napsu nilon.
Na pogmulkaan ilon nok Tuhan.
15 Binagak nilon ong mologdong nog dalan posunguꞌ sok surgaꞌ,
saan misuwoy ilon.
Inunut nilon og ginang ni Balaam nog bataꞌ ni Beor nong meleg bosiya tindanan sog ginang nong molaat.
16 Sugaid pigbinaan ong nabi koyon sok kolaatan nog inangonin.
Miktaluꞌ diyanin sok tingog nong manusiyaꞌ ok kudaꞌ himar nok sinakoyanin,
bu sinaggaan yanin sok kodupanganin.a
17 Ong mga baluꞌ-baluꞌ nog guru kini,
daꞌdun og halgaꞌ nok pononduꞌ nilon,
mamaꞌ ilon nok tubud nok kinotihan,
bu mamaꞌ da sop nong namug nog inoyup nog galuꞌ.
Sinimpanan ilon nog bonuwa nog landuꞌ kodolom.
18 Ginang nilon mongbonsag nok taluꞌ nog daꞌdun tantu nin.
Bu mokpoima-ima ilon sok konapsuhan nong mga tow bogu da tinumolikod song molikoꞌ nog dalan.
19 Sinosaan nilon nok koluhayahan ong mga mogunut dinilon,
tibuwa pigbayaan tanan ilon nog dusa nong mingulipon dinilon.
Poꞌ ong mga tow mamaꞌ hantang nog gulipon sog bisan olo nong mogbayaꞌ dinilon.
20 Na soupama ongon ong mga mikawaꞌ song mokolomuꞌ-lomuꞌ nog ginang bug pikilan kododunyahoy poꞌ mikokilala na ilon ni Isa Al-Masih nog yonin na ok Panghuꞌ bug Mogogawon ta.
Tibuwa bilaꞌ polosili,
moyit ilon bangka pogbayaoy puliꞌ song mokolomuꞌ-lomuꞌ nog ginang kituꞌ,
labi pa mokololat ok kobotang nilon tidu sok kobotang nilon tagnaꞌ sog ondaꞌ ilon pa pongandol ni Isa Al-Masih.
21 Golom pa nog daꞌ nilon kosunoy og dalan mologdong,
gabaꞌ sok kiosunan nilon,
sugaid tolikudan da nilon bangka bolongoy ong mosutsi nok pononduꞌ nok Tuhan nok pisampoy dinilon.
22 Pasal song mga ginang nilon ong mga pinonggian kituꞌ nong mga migmokogulang mingmattan na,
“Og gayam kanonin na og gutaꞌ in.”b
Bu ongon da sop ok taluꞌ,
“Ok kolabowc doksuꞌ poliguon,
mangoy da lumobug sog basakan.”